ଭୋପାଳ,୨୩/୧: ଭବ୍ୟା ମିତ୍ତଲ । ଏବେ ଏହି ନାମକୁ ନେଇ ଖୁବ ଚର୍ଚ୍ଚା । ଭବ୍ୟା ମିତ୍ତଲ ଜଣେ ଆଇଏଏସ ଅଧିକାରୀ । ମଧ୍ୟପ୍ରଦେଶ ବୁରହାନପୁର ଜିଲ୍ଲାର ସେ କଲେକ୍ଟର ଅଛନ୍ତି । ତେବେ ଆପଣ ଭାବୁଥିଲେ ଏଥିରେ ନୂଆ କଣ ତାଙ୍କୁ ନେଇ କାହିଁକି ଚର୍ଚ୍ଚା । ନାମ ନୁହେଁ ବରଂ କାମକୁ ନେଇ ଚର୍ଚ୍ଚାରେ ରହିଛନ୍ତି ଆଇଏଏସ୍ ମାଡାମ ଭବ୍ୟା ମିତ୍ତଲ । ଭାରି ଶକ୍ତ । ଦୁର୍ନୀତିଗ୍ରସ୍ତଙ୍କୁ ବିଲକୁଲ ବରଦାସ୍ତ କରନ୍ତି ନାହିଁ । ତାଙ୍କ ନାମ ଶୁଣିଲେ ଥରନ୍ତି ସରକାରୀ କର୍ମଚାରୀ । ଏକ ଭ୍ରଷ୍ଟାଚାର ମାମଲାରେ ଜଣେ ସରକାରୀ ବାବୁଙ୍କୁ ଚପରାସି ବନେଇବା ପରେ ଚର୍ଚ୍ଚାକୁ ଆସିଛନ୍ତି ଭବ୍ୟା ମିତ୍ତଲ ।
ବାବୁଙ୍କୁ କରିଦେଲେ ଚପରାସି- ମଧ୍ୟପ୍ରଦେଶ ବୁରହାନପୁର ଜିଲ୍ଲାପାଳ ଅଛନ୍ତି ଭବ୍ୟା ମିତ୍ତଲ । ଭ୍ରଷ୍ଟାଚାର ମାମଲାରେ ଜଣେ ଦୋଷୀ ହୋଇଥିବା ଜଣେ କିରାଣୀଙ୍କୁ ଚପରାସି ବନେଇ ଦେଇଛନ୍ତି । କଲେକ୍ଟର ମାଡାମଙ୍କର ଏହି ଶକ୍ତ ନିଷ୍ପତ୍ତି ପରେ ସରକାରୀ କାର୍ଯ୍ୟାଳୟରେ ଧଡପଗଡ ହୋଇଛି । ମାଡାମଙ୍କ ନାମ ଶୁଣିଲେ ଭୟରେ ଥରୁଛନ୍ତି ସରକାରୀ କର୍ମଚାରୀ ।
କଲେକ୍ଟର ଭବ୍ୟା ମିତ୍ତଲ କହିଛନ୍ତି, ଜଣଶୁଣାଣି ସମୟରେ ସୁଭାଷ କାକଡେଙ୍କ ବିରୋଧରେ ଅଙ୍ଗନାୱାଡି ସହୟକ ନିଯୁକ୍ତି ପାଇଁ ଲାଞ୍ଚ ଦାବି କରିଥିବା ଅଭିଯୋଗ ହୋଇଥିଲା । ୨୦୨୪ରେ କାକଡେ ନିଲମ୍ବିତ ହୋଇଥିଲେ । ବିଭାଗୀୟ ତଦନ୍ତ ଆରମ୍ଭ ହୋଇଥିଲା । ମହିଳା ଓ ଶିଶୁ ବିକାଶ ବିଭାଗର ପ୍ରକଳ୍ପ କାର୍ଯ୍ୟାଳୟ ଖକନାରରେ ସହାୟକ ଗ୍ରେଡ-୩ ପଦରେ ନିଯୁକ୍ତି ଦିଆଯାଇଥିଲା । ପ୍ରଥମେ କରିଥିବା ଭୁଲ ପାଇଁ ସୁଭାଷ ସନ୍ତୋଷଜନକ ସ୍ପଷ୍ଟୀକରଣ ଦେଇପାରି ନଥିଲେ । ସୁଭାଷ ମଧ୍ୟପ୍ରଦେଶ ସିଭିଲ ସର୍ଭିସେସ୍ ଆଚରଣ ନିୟମ ୧୯୬୫ ୧୩ ଓ ୧୪ର ଉଲ୍ଲଘଂନ କରିଥିବା ତଦନ୍ତରେ ପ୍ରମାଣିତ ହୋଇଥିଲା । ଯାହା ପଦବୀର ଅପବ୍ୟବହାର ଅନ୍ତର୍ଭୁକ୍ତ । ତେଣୁ କଲେକ୍ଟର ଭବ୍ୟା ମିତ୍ତଲ ସୁଭାଷ କାକଡେଙ୍କ ଉପରେ କାର୍ଯ୍ୟାନୁଷ୍ଠାନ ଗ୍ରହଣ କରିଥିଲେ । ନେପାନଗରରେ ଖାଲି ପଡିଥିଲା ଚପରାସି ପଦବୀକୁ ସ୍ଥାନାନ୍ତର କରିଥିଲେ ।
ଏହା ବି ପଢନ୍ତୁ...' ଆମେ ଆପଣଙ୍କ ସହ ଅଛୁ ...' : ଏସଡିଏମ୍ଙ୍କୁ ଚାପୁଡ଼ା ମାରିବା ଘଟଣାରେ କହିଲେ ଟିନା ଡାବି
ଦୁର୍ନୀତି ବିରୋଧରେ କଲେକ୍ଟର ମାଡମଙ୍କର ଏହି ଆକ୍ସନକୁ ବେଶ୍ ପ୍ରଶଂସା କରାଯାଉଛି । ତାଙ୍କର ଏହି କାମକୁ ନେଇ ସମସ୍ତେ କହୁଛନ୍ତି କଲେକ୍ଟର ହେବ ତ ଏମିତି ।
