ନୂଆଦିଲ୍ଲୀ: ଥାଇଲ୍ୟାଣ୍ଡରେ ଏବେ ସମଲିଙ୍ଗୀ ଯୋଡି ମାନେ ବିବାହ କରିପାରିବେ। ଗୁରୁବାର ଦିନ, ଥାଇଲ୍ୟାଣ୍ଡରେ ସମଲିଙ୍ଗୀ ବିବାହ ସମାନତା ଆଇନକୁ ମାନ୍ୟତା ଦିଆଯାଇଛି । ଯାହା ପରେ ଥାଇଲ୍ୟାଣ୍ଡ ଏପରି କରିବାରେ ଦକ୍ଷିଣ ପୂର୍ବ ଏସିଆର ପ୍ରଥମ ଦେଶ ହୋଇଛି । ଏହା ବ୍ୟତୀତ, ଏପରି ନିୟମ ଆଣିବାରେ ନେପାଳ ଏବଂ ତାଇୱାନ ପରେ ଏହା ଏସିଆର ତୃତୀୟ ଦେଶ ହୋଇଛି । 

ଏହି ଆଇନକୁ ସ୍ୱୀକୃତି ମିଳିବା ପରେ, ଏବେ ୧୮ ବର୍ଷରୁ ଅଧିକ ବୟସର ଯେକୌଣସି ଯୋଡି ସେଠାରେ ବିବାହ କରିପାରିବେ। ଏହାକୁ LGBTQ+ ସମ୍ପ୍ରଦାୟ ପାଇଁ ଏକ ବଡ଼ ବିଜୟ ଭାବରେ ଦେଖାଯାଉଛି। ସମାନ ବିବାହ ଅଧିକାର ପାଇଁ ଏହି ସମ୍ପ୍ରଦାୟ ଏକ ଦଶନ୍ଧିରୁ ଅଧିକ ସମୟ ଧରି ଲଢ଼ିଆସୁଥିଲା।

ଏହି ଆଇନ ଥାଇଲ୍ୟାଣ୍ଡରେ ସମଲିଙ୍ଗୀ ଯୋଡି ମାନଙ୍କୁ ସେମାନଙ୍କର ବିବାହକୁ ଆଇନଗତ ଭାବରେ ପଞ୍ଜୀକରଣ କରିବାର ଅଧିକାର ପ୍ରଦାନ କରିବ । ଏହା ସହିତ, ଏହା ସେମାନଙ୍କୁ ଆଇନଗତ, ଆର୍ଥିକ ଏବଂ ଚିକିତ୍ସା ଅଧିକାର ସହିତ ପୋଷ୍ୟ ଗ୍ରହଣ ଏବଂ ଉତ୍ତରାଧିକାର ଅଧିକାର ମଧ୍ୟ ପ୍ରଦାନ କରିବ।

ସମଲିଙ୍ଗୀ ବିବାହ ସମାନତା ଆଇନ ପାସ୍ ହେବା ପରେ ଗୁରୁବାର ଥାଇଲ୍ୟାଣ୍ଡରେ ଶହ ଶହ ସମଲିଙ୍ଗୀ ଦମ୍ପତି ବିବାହ କରିବାକୁ ଯାଉଛନ୍ତି। ବ୍ୟାଙ୍କକ୍ ପ୍ରାଇଡ୍ ଏ ବିଷୟରେ ସୂଚନା ଦେଇଛି। ସେ କହିଛନ୍ତି ଯେ ସିଆମ୍ ପାରାଗନ୍ ସପିଂ ସେଣ୍ଟରରେ ବିବାହ କରିବା ପାଇଁ ୨୦୦ ରୁ ଅଧିକ ଦମ୍ପତି ପଞ୍ଜିକରଣ କରିଛନ୍ତି।

ଥାଇଲ୍ୟାଣ୍ଡ ବ୍ୟତୀତ, ବର୍ତ୍ତମାନ ବିଶ୍ୱରେ ୩୩ଟି ଦେଶ ଅଛି ଯେଉଁଠାରେ ସମଲିଙ୍ଗୀ ବିବାହକୁ ଆଇନଗତ ଭାବରେ ଅନୁମୋଦନ କରାଯାଇଛି। ତଥାପି, ଅଧିକାଂଶ ଦେଶରେ, ସମଲିଙ୍ଗୀ ମାନେ କେବଳ କୋର୍ଟ ନିଷ୍ପତ୍ତି ପରେ ଏହି ଅଧିକାର ପାଇଥିଲେ। ସମଲିଙ୍ଗୀ ବିବାହକୁ ଆଇନଗତ ମାନ୍ୟତା ଦେବାରେ ନେଦରଲ୍ୟାଣ୍ଡ ପ୍ରଥମ ଦେଶ ହୋଇଥିଲା । ଏହା ବ୍ୟତୀତ ଅଷ୍ଟ୍ରିଆ, ତାଇୱାନ, କଲମ୍ବିଆ, ଆମେରିକା, ବ୍ରାଜିଲ, ଫ୍ରାନ୍ସ, ଜର୍ମାନୀ, ଅଷ୍ଟ୍ରେଲିଆ, କାନାଡା, କ୍ୟୁବା, ଡେନମାର୍କ, ସ୍ୱିଡେନ, ଦକ୍ଷିଣ ଆଫ୍ରିକା, ମାଲ୍ଟା, ଫିନଲ୍ୟାଣ୍ଡ ଏବଂ ବ୍ରିଟେନ ଭଳି ଦେଶରେ ମଧ୍ୟ ସମଲିଙ୍ଗୀ ବିବାହକୁ ଆଇନଗତ ଭାବରେ ଅନୁମୋଦନ କରାଯାଇଛି।