ନୂଆଦିଲ୍ଲୀ,୨୩/୦୧: ଜଳୁଛି ଲସ ଏଞ୍ଜେଲେସ। ଲସ ଏଞ୍ଜେଲେସ ଉତ୍ତରରେ ଥିବା କାଷ୍ଟିକ ହ୍ରଦ ନିକଟର ଆଉ ଏକ ଜାଗାରେ ଲାଗିଛି ନିଆଁ। ଫଳରେ ହଜାର ହଜାର ଲୋକଙ୍କୁ ନିଜ ଘର ଛାଡ଼ିବାକୁ ପଡ଼ୁଛି । ଏହି ଅଗ୍ନିକାଣ୍ଡର କିଛି ଘଣ୍ଟା ମଧ୍ୟରେ ୮ ହଜାର ଏକରରୁ ଅଧିକ ଚାଷଜମି ଜଳିପୋଡ଼ି ପାଉଁଶ ହୋଇଯାଇଛି।
ଏହି ଅଗ୍ନିକାଣ୍ଡ ସାନ୍ତା କ୍ଲୋରିଟାର କାଷ୍ଟିକ ହ୍ରଦ ନିକଟରେ ହୋଇଛି। ଏହି କାରଣରୁ ୩୧ ହଜାର ଲୋକଙ୍କୁ ଘର ଖାଲି କରିବାକୁ ନିର୍ଦ୍ଦେଶ ଦିଆଯାଇଛି। ସେପଟେ ଘଟଣାସ୍ଥଳରେ କାଲିଫର୍ନିଆ ଅଗ୍ନିଶମ ବିଭାଗ ଏବଂ ଏଞ୍ଜେଲେସ ନ୍ୟାସନାଲ ଫରେଷ୍ଟ କର୍ମଚାରୀମାନେ ଏହି ନିଆଁକୁ ନିୟନ୍ତ୍ରଣ କରିବାକୁ ଚେଷ୍ଟା କରୁଛନ୍ତି। ତେବେ ଜଙ୍ଗଲରେ ନିଆଁ ଲାଗିବା ପରେ ସ୍ଥାନୀୟ ଲୋକମାନେ ଘରୁ ବାହାରିବା ପାଇଁ ଜରୁରୀକାଳୀନ ସତର୍କ ସୂଚନା ପାଇଥିଲେ। ଏନେଇ ଜଣେ ସ୍ଥାନୀୟ ବାସିନ୍ଦା କହିଛନ୍ତି ଯେ, ମୁଁ କେବଳ ପ୍ରାର୍ଥନା କରୁଛି ଯେ ଆମ ଘର ଜଳୁ ନାହିଁ। ସେହିପରି ପ୍ରାୟ ୫୦୦ କଏଦୀଙ୍କୁ ଅନ୍ୟ ସ୍ଥାନକୁ ସ୍ଥାନାନ୍ତର କରାଯାଇଛି। ଲସ୍ ଏଞ୍ଜେଲେସ କାଉଣ୍ଟି ସରିଫ୍ କହିଛନ୍ତି ଯେ, ସ୍ଥିତି ଆହୁରି ଖରାପ ହେଲେ ୪,୬୦୦ ଅନ୍ତେବାସୀଙ୍କୁ ସ୍ଥାନାନ୍ତର କରିବାକୁ ପ୍ରସ୍ତୁତି ଚାଲିଛି। ଅଗ୍ନିଶମ ବିଭାଗର କହିବାନୁସାରେ, ପ୍ରବଳ ପବନ ଯୋଗୁଁ ହେଲିକପ୍ଟର ଉଡ଼ାଣ ପ୍ରଭାବିତ ହୋଇପାରେ । ନିଆଁ ଭେଣ୍ଟୁରା କାଉଣ୍ଟିରେ ବ୍ୟାପିପାରେ ବୋଲି ଆଶଙ୍କା ରହିଛି। ମନୁଷ୍ୟ କାର୍ଯ୍ୟକଳାପ ଯୋଗୁଁ ଜଳବାୟୁ ପରିବର୍ତ୍ତନ ହେଉଛି । ଭୂତଳ ଇନ୍ଧନ ଜାଳିବା ଦ୍ୱାରା ସାରା ବିଶ୍ୱର ହାରାହାରି ତାପମାତ୍ରା ବୃଦ୍ଧି ପାଉଛି। ଯାହା ଦ୍ବାରା ଦକ୍ଷିଣ କାଲିଫର୍ନିଆ ପରି ଅଞ୍ଚଳରେ ନିଆଁ ବୃଦ୍ଧି ପାଉଛି।
