ଭୁବନେଶ୍ବର,୨୩।୧ : ଭୁବନେଶ୍ବର ସହର ଦେଇ ଯାଇଥିବା ଜାତୀୟ ରାଜପଥ ଏବଂ ରାଜ୍ୟ ରାଜପଥରେ ସନ୍ଧ୍ୟା ସମୟରେ ଟ୍ରାଫିକ ସମସ୍ୟା ଦେଖା ଦେଉଛି। ଏହାକୁ ଦୃଷ୍ଟିରେ ରଖି କମିଶନରେଟ ପୋଲିସ ପକ୍ଷରୁ ଭାରୀ ଯାନ ଚଳାଚଳ ଉପରେ କଟକଣା ଜାରି କରାଯାଇଛି। ସନ୍ଧ୍ୟା ୫ଟାରୁ ରାତି ୧୦ ଟା ପର୍ଯ୍ୟନ୍ତ ଏହି କଟକଣା ଲାଗୁ କରିଛନ୍ତି ଭୁବନେଶ୍ବର-କଟକ ପୋଲିସ କମିଶନର ଏସ. ଦେବବତ୍ତ ସିଂହ।
କଟକଣା ସମୟରେ ଖୋର୍ଦ୍ଧା ପଟୁ କଟକ ଆସୁଥିବା ଭାରୀ ଯାନ ଯଥା ଟ୍ରକ ଓ ଟ୍ରେଲର ପିତାପଲ୍ଲୀ ଛକଠାରୁ ଭୁବନେଶ୍ବର ଭିତରକୁ ଆସିପାରିବେ ନାହିଁ। ସେହି ଯାନ ଗୁଡିକ ପିତାପଲ୍ଲୀ ଛକଠାରୁ ଚନ୍ଦକା ଛକ ଦେଇ କଟକ ଯାଇପାରିବେ।ସେହିପରି ମଞ୍ଚେଶ୍ବର ଶିଳ୍ପାଞ୍ଚଳ ପଟୁ କୌଣସି ପ୍ରକାରର ଭାରୀ ଯାନ ରସୁଲଗଡ ଛକ ଆଡକୁ ଆସିପାରିବ ନାହିଁ। ଏହି ନିୟମ ଖିଲାପ କଲେ ୫୦୦ ଟଙ୍କା କିମ୍ବା ସର୍ବାଧିକ ଏକ ହଜାର ଟଙ୍କା ପର୍ଯ୍ୟନ୍ତ ଜରିମାନା ଆଦାୟ କରାଯିବ ବୋଲି କମିଶନର ନିର୍ଦେଶ ଦେଇଛନ୍ତି।
