ନୂଆଦିଲ୍ଲୀ,୨୮।୨: ପାର୍ବତ୍ୟ ଅଞ୍ଚଳରେ ଜାରି ରହିଛି ବର୍ଷା ଓ ହିମପାତ। ହିମାଚଳ ପ୍ରଦେଶରୁ ନେଇ ଉତ୍ତରାଖଣ୍ଡ ପର୍ଯ୍ୟନ୍ତ ସବୁଠି ପ୍ରକୃତିର ତାଣ୍ଡବ। ଶୁକ୍ରବାର ଉତ୍ତରାଖଣ୍ଡ ବଦ୍ରିନାଥରେ ବଡ ଧରଣର ହିମସ୍ଖଳନ ହୋଇଥିବା ନେଇ ଖବର ମିଳିଛି । ଚମୋଲିର ମାଣା ଗାଁରେ ରାସ୍ତା ନିର୍ମାଣ ବେଳେ ଏହି ହିମସ୍ଖଳନ ଘଟିଛି। ବରଫ ତଳେ ପ୍ରାୟ ୫୭ ଜଣ ଶ୍ରମିକ ଫସି ଯାଇଥିଲେ। ବର୍ତ୍ତମାନ ସୁଦ୍ଧା ସେମାନଙ୍କ ମଧ୍ୟରୁ ୧୦ ଜଣଙ୍କୁ ସୁରକ୍ଷିତ ଉଦ୍ଧାର କରାଯାଇଛି।
ମିଳିଥିବା ସୂଚନା ଅନୁସାରେ, ବରଫ ଅତଡା ଧସି ଯିବା କାରଣରୁ ବର୍ଡର ରେଡସ୍ ଅର୍ଗାନାଇଜେସନ୍ (ବିଆରଓ)ର ୫୭ ଶ୍ରମିକ ପୋତି ହୋଇଯାଇଥିଲେ। ଏସଡିଆରଏଫ୍, ଏନ୍ଡିଆରଏଫ୍, ଜିଲ୍ଲା ପ୍ରଶାସନ, ଆଇଟିବିପି ଓ ବିଆରଓର ଟିମ୍ ଘଟଣାସ୍ଥଳରେ ଉପସ୍ଥିତ ଅଛନ୍ତି। ବର୍ତ୍ତମାନ ସୁଦ୍ଧା ୧୦ ଜଣଙ୍କୁ ଉଦ୍ଧାର କରାଯାଇଥିବା ବେଳେ ଆଗକୁ ଜାରି ରହିଛି ରେସକ୍ୟୁ ଅପରେସନ୍।
ଉତ୍ତରାଖଣ୍ଡର ଚମୋଲି ଜିଲ୍ଲାରେ ଚୀନ୍ ସୀମାର ଖୁବ୍ ନିକଟରେ ଭାରତର ପ୍ରଥମ ଗାଁ ଭାଗରେ ମିଣାକୁ ଜଣାଯାଏ। ଗ୍ଲାସିୟର ଭାଙ୍ଗିବା କାରଣରୁ ଏଭଳି ଅଘଟଣ ଘଟିଛି। ମାଣା ନିକଟରେ ଥିବା ପୋଷ୍ଟ ତଳେ ଗ୍ରିଫ କ୍ୟାମ୍ପର କ୍ଷୟକ୍ଷତି ହୋଇଥିବାର ସୂଚନା ମିଳିଛି। ଦୁଇ ଦିନ ହେବ ପାହାଡିଆ ଅଞ୍ଚଳରେ ପାଗ ବହୁତ ଖରାପ ଥିଲା । ଉତ୍ତରାଖଣ୍ଡ ସହ ହିମାଚଳ, ପ୍ରଦେଶର କିଛି ଅଞ୍ଚଳରେ ଖୁବ୍ ଜୋରରେ ବର୍ଷା ଲାଗି ରହିଛି । କିଛି ନଦୀ ମାନଙ୍କରେ ପାଣି ଫୁଲିକି ରହିଛି । କେବଳ ସେତିକି ନୁହେଁ ପ୍ରବଳ ତୁଷାରପାତ ପରେ ଭୟଙ୍କର ହିମସ୍ଖଳନ ଏବେ ଆହୁରି ବିପଦ ପାଲଟିଛି।
