ନୂଆଦିଲ୍ଲୀ: ଆମେରିକାରେ ରାଷ୍ଟ୍ରପତି ନିର୍ବାଚନ ପୂର୍ବରୁ ଭାରତୀୟ ସଂଗୀତକାର ଏଆର୍ ରହମାନଙ୍କୁ ଡାକରା ଆସିଛି। ଏହି ଡାକରା ଆମେରିକାର ରାଷ୍ଟ୍ରପତି ପଦ ପାଇଁ ଡେମୋକ୍ରାଟିକ୍ ପ୍ରାର୍ଥୀ କମଲା ହାରିସଙ୍କ ପକ୍ଷରୁ ଆସିଛି। କୁହାଯାଉଛି ଯେ, ହ୍ୟାରିସଙ୍କ ଐତିହାସିକ ପ୍ରାର୍ଥୀତାକୁ ପାଳନ କରିବା ପାଇଁ ଏକ ଲାଇଭ୍ କନ୍ସର୍ଟରେ ପ୍ରଦର୍ଶନ କରିବାକୁ ଏ.ଆର ରହମାନଙ୍କୁ ଏହି ନିମନ୍ତ୍ରଣ ପଠାଯାଇଛି। 

ସୂଚନାଥାଉକି, ଆମେରିକାର ରାଷ୍ଟ୍ରପତି ନିର୍ବାଚନ ପାଇଁ ପାଣ୍ଠି ସଂଗ୍ରହ କରୁଥିବା ଏକ ଭାରତୀୟ-ଆମେରିକୀୟ ସଂସ୍ଥା ଏହି ସୂଚନା ଦେଇଛି। ଏସୀୟନ ଆମେରିକନ ପାସିଫିକ୍ ଆଇସଲ୍ୟାଣ୍ଡ (AAPI) ଭିକ୍ଟ୍ରି ଫଣ୍ଡ୍ ଗୁରୁବାର ସନ୍ଧ୍ୟାରେ ଏହି ସୂଚନା ଦେଇ କହିଛି ଯେ, କମଲା ହାରିସଙ୍କ ଐତିହାସିକ ପ୍ରାର୍ଥୀତା ପାଳନ କରିବାକୁ ଏ.ଆର୍ ରହମାନଙ୍କୁ ନିମନ୍ତ୍ରଣ କରାଯାଇଛି । ଆସନ୍ତା ମାସର ରାଷ୍ଟ୍ରପତି ନିର୍ବାଚନ ପାଇଁ AAPI କମଲା ହାରିସଙ୍କୁ ସମର୍ଥନ କରିଛି ।

AAPI ଭିକ୍ଟ୍ରି ଫଣ୍ଡ୍ ଘୋଷଣା କରିଛି ଯେ,"ଏ ଆର ରହମାନଙ୍କ ସହ ଏକ ବିଶେଷ ସନ୍ଧ୍ୟା ରାଷ୍ଟ୍ରପତି ପଦ ପାଇଁ କମଲା ହାରିସଙ୍କ ଐତିହାସିକ ପ୍ରାର୍ଥୀତାକୁ ପାଳନ କରିବା ପାଇଁ ହେବ । ଏହାର ଅର୍ଥ ହେଉଛି, ଆଗାମୀ ଦିନରେ ଆମେରିକା ଭାରତୀୟ ସଂଗୀତକାର ଏ.ଆର ରହମାନଙ୍କ ସଙ୍ଗୀତରେ ଝୁମିବାକୁ ଯାଉଛି । ତେବେ କାର୍ଯ୍ୟକ୍ରମ ପାଇଁ କୌଣସି ତାରିଖ ସ୍ଥିର କରାଯାଇ ନାହିଁ ଏବଂ ରହମାନ ସୋସିଆଲ ମିଡିଆରେ ଏପର୍ଯ୍ୟନ୍ତ କିଛି ପୋଷ୍ଟ କରିନାହାଁନ୍ତି ।