ନୂଆଦିଲ୍ଲୀ,୨୧/୧୨: ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଆଜିଠୁ ଦୁଇ ଦିନିଆ କୁଏତ ଗସ୍ତରେ ଯିବେ । ପିଏମଙ୍କ ଏହି ଗସ୍ତ ବିଶେଷ ରହିଛି । ୪୩ ବର୍ଷ ପରେ ପ୍ରଥମ ଭାରତୀୟ ପ୍ରଧାନମନ୍ତ୍ରୀ ଭାବେ କୁଏତ ଯିବେ ନରେନ୍ଦ୍ର ମୋଦି । ଯାହା ଦୁଇ ଦେଶ ସମ୍ପର୍କକୁ ଆହୁରି ମଜଭୂତ କରିବ । କୁଏତର ଆମିର ଶେଖ ମେଶଲ ଅଲ ଶବାହଙ୍କ ନିମନ୍ତ୍ରଣରେ ଦୁଇ ଦିନିଆ ଗସ୍ତରେ ଯିବେ ମୋଦି । ଶେଷ ଥର ପାଇଁ ୧୯୮୧ ମସିହାରେ ଇନ୍ଦିରା ଗାନ୍ଧୀ ପ୍ରଧାନମନ୍ତ୍ରୀ ଥିବା ସମୟରେ କୁଏତ ଗସ୍ତରେ ଯାଇଥିଲେ ।
୨ ଦିନର କାର୍ଯ୍ୟକ୍ରମ- ସକାଳ ୯ଟା ୧୫ରୁ ଦିଲ୍ଲୀ ବିମାନବନ୍ଦରୁ ପଶ୍ଚିମ ଏସୀଯ ଦେଶ କୁଏତ ଅଭିମୁଖେ ବାହାରିବେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି । ୧୧ଟା ୧୫ରେ କୁଏତରେ ପହଞ୍ଚିବେ । ଏହା ପରେ ଅପରାହ୍ନ ୨ଟା ୫୦ ମିନିଟରେ ସ୍ଥାନୀୟ ଶ୍ରମ ଶିବିରରେ ଯୋଗ ଦେବେ । ସେଠାରେ ପ୍ରମୁଖ ନେତାଙ୍କ ସହ ଆଲୋଚନା କରିବେ । ଏହା ପରେ ଶେଖ ସାଦ ଅଲ ଅବଦ୍ଦୁଲା ଇଣ୍ଡୋର ସ୍ପୋଟ୍ସ କମ୍ପ୍ଲେକ୍ସ ଯିବେ । ସେଠାରେ ୪୦୦୦ରୁ ୫୦୦୦ ହଜାର ପ୍ରବାସୀ ଭାରତୀୟଙ୍କୁ ସମ୍ବୋଧିତ କରିବେ । କୁଏତରେ ରହୁଥିବା ଭାରତୀୟ ସମୁଦାୟ ସବୁଠୁ ବଡ ପ୍ରବାସୀ ସମୁଦାୟ । ମୋଦିଙ୍କ ସ୍ବାଗତ ପାଇଁ ପ୍ରବାସ ଭାରତୀୟଙ୍କ ପକ୍ଷରୁ ଜୋରଦାର ପ୍ରସ୍ତୁତି ହୋଇଛି । ଏହା ପରେ ଗଲ୍ଫ କପ ଫୁଟବଲ ଉଦଘାଟନୀ ସମାରୋହରେ ସାମିଲ ହେବେ । ଆସନ୍ତାକାଲି (ରବିବାର) ଅଧିକାରୀଙ୍କ ଏକ କାର୍ଯ୍ୟକ୍ରମରେ ଯୋଗ ଦେବେ । ଯେଉଁଥିରେ କୁଏତର ଅମିର ଏବଂ କ୍ରାଉନ ପ୍ରିନ୍ସଙ୍କ ସହ ଏକ ସରକାରୀ ବୈଠକ କରିବେ ।
ମଜଭୂତ ହେବ ଭାରତ-କୁଏତ ସମ୍ପର୍କ- ବୈଦେଶିକ ମନ୍ତ୍ରଣାଳୟ ପକ୍ଷରୁ ମିଳିଥିବା ସୂଚନା ଅନୁସାରେ ଦୁଇ ଦେଶ ମଧ୍ୟରେ ଦ୍ବିପାକ୍ଷିକ ସମ୍ପର୍କକୁ ମଜଭୂତ କରିବାକୁ ଏହି ଗସ୍ତ ସହାୟକ ହେବ । ୪୩ ବର୍ଷ ପରେ କୌଣସି ଭାରତୀୟ ପ୍ରଧାନମନ୍ତ୍ରୀଙ୍କ କୁଏତ ଗସ୍ତ ଦୁଇ ଦେଶ ମଧ୍ୟରେ ପ୍ରତିରକ୍ଷା, ବ୍ୟବସାୟ ଓ ଅନ୍ୟ ପ୍ରସଙ୍ଗରେ ଆଲୋଚନା ହେବ ।
