ନୂଆଦିଲ୍ଲୀ,୨୧/୧୨: ମହାନ କ୍ରିକେଟର ତଥା ଭାଷ୍ୟକାର ସୁନୀଲ ଗାଭାସ୍କର ଏକଦା କହିଥିଲେ ଏମିତି ସମୟରେ ଅବସର ଗ୍ରହଣ କରିବା ଉଚିତ୍ ଯେମିତି ସମସ୍ତେ ପଚାରିବେ 'ଏବେ କାହିଁକି' । ଭାରତକୁ ଏକାଧିକ ବିଜୟ ମୁକୁଟ ପିନ୍ଧାଇଥିବା ରବିଚନ୍ଦ୍ରନ ଅଶ୍ବିନୀ ଅନ୍ତର୍ଜାତୀୟ କ୍ରିକେଟରୁ ଅବସର ଘୋଷଣା କରିଛନ୍ତି । ସ୍ପିନ ଯାଦୁଗରଙ୍କ ଯୁଗ ଶେଷ ହୋଇଛି । ବର୍ଡର ଗାଭାସ୍କର ଟ୍ରଫି ଟେଷ୍ଟ ଚାଲିଥିବା ସମୟରେ ଅଶ୍ବିନୀ ଅବସର ଘୋଷଣା କରିଥିଲେ । ଅସବର ଘୋଷଣାକୁ ୨ ଦିନ ବିତି ଗଲାଣି ତଥାପି ଚର୍ଚ୍ଚା ଲାଗି ରହିଛି । ତେବେ ଜାଣିଛନ୍ତି ଅଶ୍ବିନୀଙ୍କ ଅବସର ଘୋଷଣାର ସମୟ ସହ ପୂର୍ବତନ କ୍ରିକେଟର ଅନୀଲ କୁମ୍ବେଲଙ୍କ ଅବସର ସହ ମେଳ ଖାଉଛି । ଦୁଇ କ୍ରିକେଟରଙ୍କ ଅବସରର ଅଜବ ସଂଯୋଗ ଦେଖିବାକୁ ମିଳିଛି ।
ଅଷ୍ଟ୍ରେଲିଆ ବିପକ୍ଷ ମ୍ୟାଚରେ ଉଭୟଙ୍କ ଅବସର- ଭାରତ ଓ ଅଷ୍ଟ୍ରେଲିଆ ମଧ୍ୟରେ ବର୍ଡର-ଗାଭାସ୍କର ଟ୍ରଫି ଟେଷ୍ଟ ସିରିଜ ୨୦୨୪-୨୫ ଜାରି ରିହିଛି । ୩ଟି ଟେଷ୍ଟ ମ୍ୟାଚ ଖେଳା ସରିଛି । ବାକି ଦୁଇଟି ମ୍ୟାଚ ବାକି ରହିଛି । ତୃତୀୟ ଟେଷ୍ଟ ଗାବାରେ ଖେଳା ଯାଇଥିଲା । ଏହି ସମୟରେ ଅଚାନକ ଅନ୍ତର୍ଜାତୀୟ କ୍ରିକେଟରୁ ଅବସର ଘୋଷଣା କରିଥିଲେ ସ୍ପିନ୍ ଯାଦୁଗର ଆର ଅଶ୍ବିନୀ । ଏହି ସମୟ ଠିକ୍ ଅନୀଲ କୁମ୍ବେଲଙ୍କ ଅବସର ସମୟ ସହ ମ୍ୟାଚ କରୁଛି । ଅନୀଲ କୁମ୍ବେଲ ମଧ୍ୟ ଅଷ୍ଟ୍ରେଲିଆ ବିପକ୍ଷରେ ମ୍ୟାଚ ଖେଳୁଥିବା ସମୟରେ ଅବସର ଘୋଷଣା କରିଥିଲେ । ସେ ୨୦୦୮ରେ ଟେଷ୍ଟ ମ୍ୟାଚ ଖେଳିବା ପରେ ସନ୍ୟାସ ନେଇଥିଲେ । ଉଭୟ ସେମାନଙ୍କ ଶେଷ ମ୍ୟାଚ ଅଷ୍ଟ୍ରେଲିଆ ବିପକ୍ଷରେ ଖେଳିଥିଲେ ।
ଦୁହିଁଙ୍କ ନାମରେ ୫୦୦ୱିକେଟ- ଅଶ୍ବିନୀ ୧୦୬ ଟେଷ୍ଟ ମ୍ୟାଚ ଖେଳି ୫୩୭ ୱିକେଟ ନେଇ ଅବସର ଘୋଷଣା କରିଥିଲେ । ସେହିପରି ଅନୀଲ କୁମ୍ବଲେ ଭାରତର ସର୍ବାଧିକ ୱିକେଟ ହାସଲକାରୀ ଖେଳାଳି ସହ ୧୩୨ ଟେଷ୍ଟ ଖେଳି ୬୧୯ଟି ୱିକେଟ ନେଇଛନ୍ତି ।
ମିଚେଲ କନେକ୍ସନ- ଅଶ୍ବିନୀ ଓ ଅନୀଲ କୁମ୍ବଲେ ବର୍ଡର-ଗାଭାସ୍କର ଟ୍ରଫି ଟୁର୍ଣ୍ଣାମେଣ୍ଟର ତୃତୀୟ ଟେଷ୍ଟ ମ୍ୟାଚ ପରେ ଅବସର ନେଇଛନ୍ତି । ଦୁହିଁଙ୍କର ଶେଷ ୱିକେଟ ମିଲେଚ ଥିଲେ । ଅଶ୍ବିନୀଙ୍କ ଶେଷ ୱିକେଟ ମିଚେଲ ମାର୍ଶ ଥିଲେ ଅନୀଲଙ୍କ ଶେଷ ଟେଷ୍ଟ ୱିକେଟ ମିଚେଲ ଜନସନ ଥିଲେ ।
ବିନା ଫେରୱାଲରେ ଅବସର- ଦୁଇ ଭାରତୀୟ ଖେଳାଳି ଅଚାନକ ଅବସର ଘୋଷଣା କରିଥିଲେ । ସେମାନଙ୍କୁ କୌଣସି ଅବସର ସମ୍ବର୍ଦ୍ଧନା ଦିଆଯାଇନାହିଁ । ଅଶ୍ବିନୀ ଗାବା ଟେଷ୍ଟ ଖେଳି ନଥିଲେ । ଅନୀଲ କୁମ୍ବେଲ ମଧ୍ୟ ଦିଲ୍ଲୀ ଟେଷ୍ଟ ଖେଳିନଥିଲେ ମାତ୍ର ନାଗପୁର ଟେଷ୍ଟ ଖେଳିଥିଲେ ।
