ଟାଙ୍ଗୀ,୧୧/୦୭: ଡ୍ୟୁଟି ସମୟରେ ରାତ୍ର ଜଗୁଆଳିଙ୍କ ସନ୍ଦେହ ଜନକ ମୃତ୍ୟୁ । ଏଭଳି ଅଭାବନୀୟ ଘଟଣା  ଖୋର୍ଦ୍ଧା ଜିଲ୍ଲାର ବାଲୁଗାଁ ବଡ଼କୁଳ ସ୍ଥିତ ଓଟିଡିସି ପାନ୍ଥ ନିବାସରେ ଘଟିଛି। ମୃତ ଜଗୁଆଳିଙ୍କ ତପନ ଚିନାରା ବୋଲି ପରିଚୟ ମିଳିଛି । ଘଟଣାସ୍ଥଳରେ ବାଲୁଗାଁ ପୋଲିସ ପହଞ୍ଚି ମୃତଦେହ ଜବତ କରିବା ସହ ଏନେଇ ତଦନ୍ତ ଆରମ୍ଭ କରିଛି।

ସୂଚନା ଅନୂଯାୟୀ, ତପନ ଚିନାରା ଜଣେ ରାତ୍ର ସିକ୍ୟୁରିଟି ଗାର୍ଡ ଭାବେ ବାଲୁଗାଁର ବଡ଼କୁଳରେ ଥିବା ଓଟିଡିସି ପାନ୍ଥ ନିବାସରେ ଡ୍ୟୁଟି କରୁଥିଲେ । ଅଚାନକ କୌଣସି କାରଣରୁ ତାଙ୍କର ସ୍ୱାସ୍ଥ୍ୟ ଖରାପ ହୋଇଥିଲା । ପରେ ତାଙ୍କୁ ଓଟିଡିସି ତରଫରୁ ବାଲୁଗାଁ ଡାକ୍ତରଖାନାରେ ଚିକିତ୍ସା ପାଇଁ ଭର୍ତ୍ତି କରାଯାଇଥିଲା। ସେଠାରେ ଡାକ୍ତର ତାଙ୍କୁ ମୃତ୍ୟୁ ଘୋଷଣା କରିଥିଲେ । ମୃତ ସିକ୍ୟୁରିଟି ଗାର୍ଡ ତପନ ଚିନାରାଙ୍କର ମୃତ୍ୟୁର କାରଣ ଅସ୍ପଷ୍ଟ ରହିଛି। ତଦନ୍ତ ପରେ ମୃତ୍ୟୁର କାରଣ ଜଣା ପଡିବ ବୋଲି ବାଲୁଗାଁ ଥାନା ନିରୀକ୍ଷକ ସୂଚନା ଦେଇଛନ୍ତି । ଅନ୍ୟ ପଟରେ ଘଟଣା ସ୍ଥଳକୁ ଯାଇ ପୋଲିସ ପ୍ରାଥମିକ ତଦନ୍ତ ଆରମ୍ଭ କରିଛି । ମୃତ ସିକ୍ୟୁରିଟି ଗାର୍ଡଙ୍କର ପୁତ୍ର ପ୍ରୀତମ ଚିନାରା ବାଲୁଗାଁ ଥାନାରେ ଏତଲା ଦେଇଛନ୍ତି ।