ମାଲକାନଗିରି /କୋରକୁଣ୍ଡା,୭/୯ : ଚିତ୍ରକୋଣ୍ଡା ଘାଟିରେ ଓଲଟିଲା ମାଲ ବୋଝଇ ଟ୍ରକ । ଶନିବାର ଓରକେଲ ଥାନାସ୍ଥିତ ବାଲିମେଳା-ଚିତ୍ରକୋଣ୍ଡା ମୁଖ୍ୟ ରାସ୍ତାର ଚିତ୍ରକୋଣ୍ଡା ଘାଟି ଉପର ଭାଲବ ହାଉସ ଛକ ନିକଟରେ ଏଭଳି ଏକ ଦୁର୍ଘଟଣା ଘଟିଛି । 

ପ୍ରକାଶ ଯେ, ମାଲକାନଗିରିରୁ ଆନ୍ଧ୍ରପ୍ରଦେଶ ଆଡକୁ ଯାଉଥିଲା । ଏହି ସମୟରେ ଭାଲବ ହାଉସ ଛକ ନିକଟରେ ଟ୍ରକଟି ଭାରସାମ୍ୟ ହରାଇ ରାସ୍ତା କଡ଼କୁ ଓଲଟି ପଡିଛି । ଫଳରେ ଗାଡି ଚାଳକ ଆହତ ହୋଇଛନ୍ତି । ସ୍ଥାନୀୟ ଲୋକେ ଆହତ ଡ୍ରାଇଭରଙ୍କୁ ଚିକିତ୍ସା ପାଇଁ ବାଲିମେଳା ହସ୍ପିଟାଲକୁ ପଠାଇଛନ୍ତି। ଖବରପାଇ ଘଟଣାସ୍ଥଳରେ ପୋଲିସ ପହଞ୍ଚି ଦୁର୍ଘଟଣା ଗସ୍ତ ଟ୍ରକଟିକୁ ଜବତ କରି ତଦନ୍ତ ଆରମ୍ଭ କରିଛି । ଏହି ଦୁର୍ଘଟଣା ଗ୍ରସ୍ତ ଟ୍ରକଟି ତାମିଲନାଡୁର ହୋଇଥିବା ଜଣାପଡିଛି । ବାଲିମେଳାଠାରୁ ଚିତ୍ରକୋଣ୍ଡା ୨୬ କିଲୋମିଟର ହୋଇଥିବା ବେଳେ କେବଳ ଚିତ୍ରକୋଣ୍ଡା ଘାଟି ରାସ୍ତା ୧୪ କିଲୋମିଟରରୁ ଊର୍ଦ୍ଧ୍ବ ରହିଛି । ଏହି ଘାଟି ରାସ୍ତାଟି ଅଣ ଓସାରିଆ ଅଙ୍କା ବଙ୍କା ହୋଇଥିବାରୁ ଅଧିକାଂଶ ସମୟରେ ଯାନ ବାହନ ଦୁର୍ଘଟଣା ଘଟି ଧନ ଜୀବନ ହାନି ଘଟୁଛି । ଏଣୁ ରାସ୍ତାକୁ ଓସାର କରିବା ସହ ରାସ୍ତାପାର୍ଶ୍ଵରେ ଗାର୍ଡ ୱାଲ ନିର୍ମାଣ କରିବାକୁ ଜନସାଧାରଣରେ ଦାବି ହେଉଛି ।