ମାଲକାନଗିରି ୧୬/୯ : ବେଆଇନ ପିସ୍ତଲ ଏବଂ ଅଫୁଟା ଗୁଳି ରଖିବା ଅଭିଯୋଗରେ ଜଣେ ଯୁବକକୁ ଗିରଫ କରିଛି ମାଲକାନଗିରି ପୋଲିସ । ଯୁବକଙ୍କ ନିକଟରୁ ପିସ୍ତଲ ଓ ତିନୋଟି ଅଫୁଟା ଗୁଳି ଜବତ ହୋଇଛି । ଏ ସମ୍ପର୍କରେ ମାଲକାନଗିରି ଆଦର୍ଶ ଥାନା ଅଧିକାରୀ ରିଗନ କିଣ୍ଡୋ ସୂଚନା ଦେଇଛନ୍ତି।

ପୁଲିସ ସୂଚନା ଅନୁଯାଇ ରବିବାର ରାତିରେ ମାଲକାନଗିରି ଥାନା ସବ ଇନିସପେକ୍ଟର ପ୍ରଭାତ ଗୌଡ଼ ଓ କୃତିବାସ ବେହେରାଙ୍କ ନେତୃତ୍ୱରେ ମାଲକାନଗିରି ଜୟପୁର ୩୨୬ ନମ୍ବର ଜାତୀୟ ରାଜପଥ ଚମ୍ପାଖାରି ପୁଲିସ ଚେକ ଗେଟ ନିକଟରେ ରାତ୍ର ପାଟ୍ରୋଲିଙ୍ଗ ସହିତ ଯାନ ବାହନ ଯାଞ୍ଚ କରା ଯାଉଥିଲା । ଏହି ସମୟରେ ମାଲକାନଗିରିରୁ ଏକ ସ୍କୁଟି ଚାଳକ ଦ୍ରୁତଗତିରେ ମାଥିଲି ଆଡ଼କୁ ପଳାଉଥିବା ବେଳେ ପୁଲିସ ତାଙ୍କୁ କାବୁ କରି ନେଇଥିଲେ । ସ୍କୁଟିର ଡିକି ଖୋଲି ଯାଞ୍ଚ କରିବାରୁ ଏକ ଅତ୍ୟାଧୁନିକ ପିସ୍ତଲ ଓ ତିନୋଟି ଅଫୁଟା ଗୁଳି ମିଳିଥିଲା । ଅଭିଯୁକ୍ତ ହେଲେ ମାଲକାନଗିରି ବସ ଷ୍ଟାଣ୍ଡ ସାହିର ଟୁନୁ ସଗରିଆ । ଅଭିଯୁକ୍ତକୁ ଗିରଫ କରି ଥାନାକୁ ନେଇ ପଚରା ଉଚରା କରିବାରୁ ତା ନାମରେ ଗତ ୨୦୧୦ ମସିହାରୁ ମାଲକାନଗିରି ଥାନାରେ ଏ ପର୍ଯ୍ୟନ୍ତ ବିଭିନ୍ନ ହିଂସାକାଣ୍ଡ ଘଟଣା ରେ ୮ ଟି ମାମଲା ରହିଛି । ସୋମବାର ମାଲକାନଗିରି ଥାନା ପୁଲିସ ଟୁନୁ ସଗରିଆକୁ କୋର୍ଟ ଚାଲାଣ କରି ଏହି ଘଟଣାରେ ଅନ୍ୟ କାହାର ସମ୍ପୃକ୍ତି ଅଛି କି ନାହିଁ ତଦନ୍ତ ଆରମ୍ଭ କରିଛି ।