ମାଲକାନଗିରି /ମାଥିଲି ୧୬/୦୯: ମାଲକାନଗିରି ଜିଲ୍ଲା ମାଥିଲି ବ୍ଲକସ୍ଥ ଦୁର୍ଗମ ଅଞ୍ଚଳରେ ଡାଇରିଆ ଆତଙ୍କ ଥମିବା ବଦଳରେ ଦିନକୁ ଦିନ ବୃଦ୍ଧି ପାଇବାରେ ଲାଗିଛି । ଏହାକୁ ରୋକିବା ପାଇଁ ସ୍ୱାସ୍ଥ୍ୟ ବିଭାଗ ପକ୍ଷରୁ ଆକ୍ରାନ୍ତ ଗ୍ରାମ ଗୁଡିକରେ ଚିକିତ୍ସା ସହ ଚାଲିଛି ସଚେତନତା । ହେଲେ ଗ୍ରାମବାସୀ ମାନେ ସ୍ୱାସ୍ଥ୍ୟ ବିଭାଗ ଉପରେ ଆସ୍ଥା ତୁଟାଇ ସୀମାନ୍ତ ଛତିଶଗଡ଼ରୁ ବଡ଼ବଡ଼ ଦିଶାରୀ ଗୁଣିଆ ଆଣି ଗାଁ ଗାଁରେ ଡୁମା ଡଙ୍ଗର ଦେବୀଙ୍କୁ ପୂଜାର୍ଚ୍ଚନା କରୁଛନ୍ତି ।
ସୂଚନା ମୁତାବକ ମାଲକାନଗିରି ଜିଲ୍ଲା ମାଥିଲିରେ ଡାଇରିଆ ତଥା ଝାଡାବାନ୍ତିରେ ବର୍ତ୍ତମାନ ସୁଦ୍ଧା ୬ ଜଣଙ୍କ ମୃତ୍ୟୁ ହୋଇଥିବା ବେଳେ ୫୦ରୁ ଅଧିକ ଏହି ରୋଗରେ ପୀଡିତ ଅଛନ୍ତି । ତେବେ ମାଥିଲି ବ୍ଲକର ବିଭିନ୍ନ ଦୁର୍ଗମ ଗ୍ରାମରେ ଏହି ରୋଗ ନିଜର କାୟା ବିସ୍ତାର କରିଥିବା ବେଳେ ଜିଲ୍ଲାର ସ୍ୱାସ୍ଥ୍ୟ ଟିମ ବହୁ କଷ୍ଟରେ ଦୁର୍ଗମ ଅଞ୍ଚଳରେ ନଦୀ, ନାଳ ପାର ହୋଇ ଲୋକଙ୍କ ନିକଟରେ ପହଞ୍ଚି ସ୍ୱାସ୍ଥ୍ୟସେବା ଯୋଗାଉଛନ୍ତି । ଜୀବନକୁ ବାଜି ଲଗାଇ ସ୍ୱାସ୍ଥ୍ୟ ଟିମ ଦୁର୍ଗମ ଗ୍ରାମରେ ସ୍ୱାସ୍ଥ୍ୟ ସେବା ଯୋଗଉଥିବା ସତ୍ତ୍ବେ ଲୋକଙ୍କ ମଧ୍ୟରେ ଏହି ରୋଗର ଭୟ ବଢିବାରେ ଲାଗିଥିବାରୁ ଲୋକେ ବର୍ତ୍ତମାନ ଗୁଣିଆ, ଦିଶାରି ଓ ପୂଜକଙ୍କ ଦ୍ଵାରା ବିଭିନ୍ନ ପୂଜାର୍ଚ୍ଚନା କରୁଥିବା ଦେଖିବାକୁ ମିଳିଛି ।
ମାଥିଲି ବ୍ଲକର ବାରା, ତୁଳସୀ, ଲୁଲେର ଓ ଅଟାଳଗୁଡାରେ ଏହି ରୋଗ କାୟା ବିସ୍ତାର କରିଥିବା ବେଳେ ଡାକ୍ତରୀ ଟିମ ବିଭିନ୍ନ ଗ୍ରାମରେ ପହଞ୍ଚି ଅସ୍ଥାୟୀ କ୍ୟାମ୍ପ କରି ରୋଗୀଙ୍କୁ ଚିକିତ୍ସା ଯୋଗାଇ ଆସୁଛନ୍ତି । ସ୍ୱାସ୍ଥ୍ୟ ବିଭାଗ ଏହି ରୋଗ ଉପରେ ରୋକ ଲଗାଇବା ପାଇଁ ଜୋରସୋର ଉଦ୍ୟମ କରୁଥିବା ବେଳେ ଲୋକଙ୍କୁ ଔଷଧ ଦିଆଯାଉଛି । ତୁଳସୀ ଘାଟି ଅଂଚଳରେ ରୋଗ ନିୟନ୍ତ୍ରଣ ପାଇଁ ତିନି ଦିନ ହେବ ଜିଲ୍ଲା ଜନସ୍ବାସ୍ଥ୍ୟ ଅଧିକାରୀଙ୍କ ସହ ୫ ଜଣିଆ ଡାକ୍ତରୀ ଟିମ ରହି ଘର ଘର ବୁଲି ଅସ୍ଥାୟୀ କ୍ୟାମ୍ପ କରି ଚିକିତ୍ସା ଯୋଗାଇ ଆସୁଛନ୍ତି । ଲୋକେ ଦୁଷିତ ପାଣି ଓ ଜଂଗଲ ଜାତ ଖାଦ୍ୟ ଖାଇବା ଓ ନଦୀ ନାଳ ପୋଖରୀର ଦୂଷିତ ଜଳ ଦ୍ବାରା ଏଭଳି ସଂକ୍ରାମକ ରୋଗ ହୋଇଥାଇପାରେ ବୋଲି ଅନୁମାନ କରାଯାଉଛି ।