କ୍ୱାଲାଲୁମ୍ପୁର,୨୮/୦୧: ୧୯ବର୍ଷରୁ କମ୍ ମହିଳା ଟି-ଟ୍ୱେଣ୍ଟି ବିଶ୍ୱକପ୍ରେ ଡିଫେଣ୍ଡିଂ ଚାମ୍ପିଅନ୍ ଭାରତ ଆଧିପତ୍ୟ ଜାରି ରଖି ସେମି ଫାଇନାଲ୍ରେ ପ୍ରବେଶ କରିଛି । ଗତ ରବିବାର ଅନୁଷ୍ଠିତ ସୁପର-୬ (ଗ୍ରୁପ୍-୧)ର ପ୍ରଥମ ମ୍ୟାଚ୍ରେ ଦଳ ୮ ୱିକେଟ୍ରେ ବାଂଲାଦେଶକୁ ପରାସ୍ତ କରିଥିଲା । ଏଥିସହ ଦଳ ମୋଟ ୬ପଏଣ୍ଟ ପାଇ ତାଲିକାରେ ଶୀର୍ଷ ସ୍ଥାନ ବଜାୟ ରଖିଛି । ଅନ୍ୟ ପଟରେ ଏହି ଗ୍ରୁପ୍ରେ ଅଷ୍ଟ୍ରେଲିଆ ସମାନ ସଂଖ୍ୟକ ପଏଣ୍ଟ ସହ ଦ୍ୱିତୀୟ ସ୍ଥାନରେ ରହି ସେମିରେ ପ୍ରବେଶ କରିଛି । ଗ୍ରୁପ୍-୨ରେ ଦକ୍ଷିଣ ଆଫ୍ରିକା ଓ ଇଂଲଣ୍ଡ ମଧ୍ୟ ସେମିରେ ସ୍ଥାନ ପକ୍କା କରିଛନ୍ତି । ମଙ୍ଗଳବାର ଭାରତ ଅନ୍ତିମ ସୁପର-୬ ମୁକାବିଲାରେ ସ୍କଟଲାଣ୍ଡକୁ ଭେଟିବ ।
ଭାରତଠୁ ବ୍ୟାଟିଂ ଆମନ୍ତ୍ରଣ ପାଇ ବାଂଲାଦେଶ ୮ ୱିକେଟ୍ ହରାଇ ୬୪ରନ୍ ସଂଗ୍ରହ କରିଥିଲା । ଦଳ ପକ୍ଷରୁ ଜନ୍ନତୁଲ ମୌଆ ୧୪, ଅଧିନାୟିକା ସୁମାଇୟା ଅକତର ଅପରାଜିତ ୨୧ରନ୍ କରିଥିଲେ । ଭାରତ ପକ୍ଷରୁ ବୈଷ୍ଣବୀ ଶର୍ମା ୧୫ରନ୍ ଦେଇ ୩ଟି ୱିକେଟ୍ ଅକ୍ତିଆର କରିଥିଲେ । ଏହାର ଜବାବରେ ଭାରତ ୭୭ଟି ବଲ୍ ବାକି ଥାଇ ୨ ୱିକେଟ୍ ବିନିମୟରେ ବିଜୟ ହାସଲ କରିଥିଲା । ଓପନର ଗଙ୍ଗୋଦି ତ୍ରିଶା ୮ଚୌକା ବଳରେ ୪୦ରନ୍ କରି ଦଳ ବିଜୟରେ ଅନ୍ୟତମ ଭୂମିକା ଗ୍ରହଣ କରିଥିଲେ । ସାନିକା ଚଲକେ ୧୧ ଓ ନିକି ପ୍ରସାଦ ୫ରନ୍ କରି ଅପରାଜିତ ଥିଲେ ।
ଇଣ୍ଡିଆ-ଇଂଲଣ୍ଡ ତୃତୀୟ ଟି-ଟ୍ବେଣ୍ଟି: ସିରିଜ କବଜା ଲକ୍ଷ୍ୟରେ ସୂର୍ଯ୍ୟସେନା, କର ବା ମର ସ୍ଥିତିରେ ବଟଲରବାହିନୀ
