ରାଜକୋଟ୍, ୨୮/୦୧: ଘରୋଇ ଭାରତ ଓ ଇଂଲଣ୍ଡ ମଧ୍ୟରେ ମଙ୍ଗଳବାର ଖେଳାଯିବ ତୃତୀୟ ଟି-ଟ୍ୱେଣ୍ଟି । ଭାରତ ପ୍ରଥମ ୨ଟି ମ୍ୟାଚ୍ ଜିତିସାରିଛି । ମଙ୍ଗଳବାର ଆଉ ଏକ ବିଜୟ ସହ ସିରିଜ ଅକ୍ତିଆର କରିବାକୁ ଘରୋଇ ଦଳ ଲକ୍ଷ୍ୟ ରଖିଛି । ଇଂଲଣ୍ଡ ପାଇଁ ଏହି ମ୍ୟାଚ୍ ‘କର ବା ମର’ ପରିସ୍ଥିତି ସୃଷ୍ଟି କରିଛି ।
ସିରିଜକୁ ଫେରିବା ପାଇଁ ଇଂଲଣ୍ଡ ସବୁ ଶକ୍ତି ଖଟାଇବାକୁ ପ୍ରସ୍ତୁତ । ହେଲେ ଭାରତୀୟ ଦଳର ସ୍ପିନ୍ ବାହିନୀ ଇଂଲଣ୍ଡ ଖେଳାଳିଙ୍କ ନିଦ ହଜାଇ ଦେଇଛନ୍ତି । କେବଳ ଜୋସ ବଟଲରଙ୍କୁ ଛାଡ଼ି ଦେଲେ ଅନ୍ୟ କୌଣସି ବ୍ୟାଟର ଭାରତୀୟ ସ୍ପିନରଙ୍କ ମୁକାବିଲା କରିପାରୁ ନାହାନ୍ତି । ବିଶେଷ କରି ବରୁଣ ଚକ୍ରବର୍ତ୍ତୀଙ୍କ କୌଶଳକୁ ପଢିବାରେ ଦଳ ସମ୍ପୂର୍ଣ୍ଣ ବିଫଳ ହୋଇଛି । ରାଜକୋଟ ପିଚ୍ ପାରମ୍ପରିକ ଭାବେ ସ୍ପିନରଙ୍କୁ ସହାୟତା କରୁଥିବାରୁ ଇଂଲଣ୍ଡ ଦଳର ଚିନ୍ତା ବଢି ଯାଇଛି । ତଥାପି ବରୁଣଙ୍କୁ ମୁକାବିଲା କରିବା ପାଇଁ ଇଂଲଣ୍ଡ ବ୍ୟାଟରମାନେ ମ୍ୟାଚ୍ ପାଇଁ କିଛି ନୂଆ ରଣନୀତି ପ୍ରସ୍ତୁତ କରିବେ ।
ଦକ୍ଷତା, ପ୍ରଦର୍ଶନ ଓ ରେକର୍ଡକୁ ଦେଖିଲେ ଭାରତର ପଲା ଭାରି ରହିବ । ରାଜକୋଟ୍ରେ ଭାରତ ୫ଟି ଟି-ଟ୍ୱେଣ୍ଟି ଖେଳିଛି ଓ ଏଥିରୁ ୪ଟି ମ୍ୟାଚ୍ରେ ବିଜୟ ହାସଲ କରିଛି । ଶେଷ ଥର ପାଇଁ ଭାରତ ୨୦୧୩ରେ ଏଠାରେ ଅଷ୍ଟ୍ରେଲିଆ ବିପକ୍ଷରେ ଏକ ଟି-ଟ୍ୱେଣ୍ଟି ଖେଳିଥିଲା ଓ ୬ ୱିକେଟ୍ରେ ବିଜୟ ହାସଲ କରିଥିଲା ।
ମଙ୍ଗଳବାର ମ୍ୟାଚ୍ରେ ତିଳକ ବର୍ମାଙ୍କ ଉପରେ ସମସ୍ତଙ୍କ ନଜର ରହିବ । ଚେନ୍ନାଇରେ ଅନୁଷ୍ଠିତ ମ୍ୟାଚ୍ରେ ସେ ଅପରାଜିତ ୭୨ ରନ୍ର ଇନିଂସ ଖେଳି ଦଳକୁ ବିଜୟୀ କରାଇଥିଲେ । ଏହି ପ୍ରଦର୍ଶନ ପାଇଁ ସେ ପ୍ଲେୟାର ଅଫ ଦ ମ୍ୟାଚ୍ ବିବେଚିତ ହୋଇଥିଲେ । ସେ ଖେଳିଥିବା ଶେଷ ୪ଟି ମ୍ୟାଚ୍ରେ ୩୧୮ ରନ୍ ସଂଗ୍ରହ କରିଛନ୍ତି ଓ ଥରେ ହେଲେ ଆଉଟ୍ ହୋଇନାହାନ୍ତି । ଇଂଲଣ୍ଡ ଏକାଦଶ ଅପରିବର୍ତ୍ତିତ ରଖିଛି । ଫଳରେ ଜାକବ ବେଥେଲ ଏକାଦଶକୁ ଫେରିବେ ନାହିଁ । ତାଙ୍କ ସ୍ଥାନରେ ଦ୍ୱିତୀୟ ମ୍ୟାଚ୍ ଖେଳିଥିବା ବ୍ରାଇଡନ କାର୍ସ ଅଲ୍ରାଉଣ୍ଡ ପ୍ରଦର୍ଶନ କରି ବିଜୟ ଆଶା ସଂଚାର କରିଥିଲେ । ହେଲେ ଅନ୍ତିମ ମୁହୂର୍ତ୍ତରେ ତିଳକ ବିଜୟ ଛଡ଼ାଇ ନେଇଥିଲେ ।
ଭାରତ ୨ଟି ମ୍ୟାଚ୍ ଜିତି ସାରିଥିବାରୁ ମଙ୍ଗଳବାର ମଧ୍ୟ ମହମ୍ମଦ ସାମିଙ୍କୁ ବିଶ୍ରାମ ଦେବା ନିଶ୍ଚିତ । ଆଗକୁ ଚାମ୍ପିଅନ୍ସ ଟ୍ରଫି ରହିଛି । ୧୫ମାସ ପରେ ଦଳକୁ ଫେରିଥିବା ସାମିଙ୍କୁ ଏହି ଟୁର୍ଣ୍ଣାମେଣ୍ଟ ପାଇଁ ପ୍ରସ୍ତୁତ ରଖିବା ଟିମ ମ୍ୟାନେଜମେଣ୍ଟର ଗୁରୁଦାୟିତ୍ୱ । ଟସ ଜିତିଲେ
ଫିଲ୍ଡିଂ: ପୂର୍ବ ୨ ମ୍ୟାଚ୍ ଭଳି ମଙ୍ଗଳବାର ମଧ୍ୟ ଟସ୍ ନିର୍ଣ୍ଣାୟକ ଭୂମିକା ଗ୍ରହଣ କରିପାରେ । ରାଜକୋଟ୍ ପିଚ୍ ପାରମ୍ପରିକ ଭାବେ ବ୍ୟାଟିଂ ପାଇଁ ଅନୁକୂଳ । ବ୍ୟାଟିଂ ଅନୁକୂଳ ପିଚ୍ ଓ ଦ୍ରୁତ ଆଉଟ୍ ଫିଲ୍ଡରେ ବିଶାଳ ସ୍କୋର ସଂଗୃହୀତ ହେବା ନିଶ୍ଚିତ । ମାତ୍ର ରାତ୍ରିରେ କାକର ପଡ଼ୁଥିବାରୁ ଦ୍ୱିତୀୟ ଭାଗରେ ବ୍ୟାଟିଂ ସହଜ ହେବ । ଟସ୍ ବିଜୟୀ ଦଳ ଫିଲ୍ଡିଂ ନିଷ୍ପତ୍ତି ନେବା ଏକ ପ୍ରକାର ନିଶ୍ଚିତ । ଭାରତ ପ୍ରଥମ ୨ଟି ଯାକ ମ୍ୟାଚ୍ରେ ଟସ ଜିତିଥିଲା ଓ ଫିଲ୍ଡିଂ ନିଷ୍ପତ୍ତି ନେଇ ଉଭୟ ମ୍ୟାଚ ଜିତିଥିଲା ।
ସମ୍ଭାବ୍ୟ ଦଳ
ଭାରତ: ସଞ୍ଜୁ ସାମସନ, ଅଭିଷେକ ଶର୍ମା, ତିଳକ ବର୍ମା, ସୂର୍ଯ୍ୟକୁମାର ଯାଦବ (ଅଧିନାୟକ), ହାର୍ଦ୍ଦିକ ପାଣ୍ଡ୍ୟା, ଶିବମ ଦୁବେ/ରମଣଦୀପ ସିଂହ, ୱାସିଂଟନ ସୁନ୍ଦର, ଅକ୍ଷର ପଟେଲ, ରବି ବିଷ୍ଣୋଇ, ଅର୍ଶଦୀପ ସିଂହ, ବରୁଣ ଚକ୍ରବର୍ତ୍ତୀ ।
ଇଂଲଣ୍ଡ: ଫିଲ ସଲ୍ଟ, ବେନ ଡକେଟ୍, ଜୋସ ବଟଲର (ଅଧିନାୟକ), ହ୍ୟାରୀ ବ୍ରୁକ୍, ଲାଏମ ଲିଭିଙ୍ଗଷ୍ଟୋନ, ଜାମି ସ୍ମିଥ, ଜାମି ଓଭରଟନ, ବ୍ରାଇଡନ କାର୍ସ, ଜୋଫ୍ରା ଆର୍ଚର, ଆଦିଲ ରସିଦ, ମାର୍କ ଉଡ୍ ।
