ନୂଆଦିଲ୍ଲୀ: ରୋହିତ ଶର୍ମା, ବିରାଟ କୋହଲିଙ୍କ ଭଳି ଭାରତୀୟ ଷ୍ଟାର କ୍ରିକେଟର ରଣଜୀ ଟ୍ରଫି ଖେଳୁଛନ୍ତି । ଏହାରି ମଧ୍ୟରେ କୁଲଦୀପ ଯାଦବ ମଧ୍ୟ ରଣଜୀ ଖେଳିବେ ବୋଲି ସ୍ପଷ୍ଟ ହୋଇଛି । ଉତ୍ତର ପ୍ରଦେଶ ଜାରି କରିଥିବା ୧୮ ଜଣିଆ ଟିମ୍ରେ କୁଲଦୀପ ଯାଦବ ସାମିଲ ଅଛନ୍ତି । ଷ୍ଟାର ସ୍ପିନର କୁଲଦୀପ ଯାଦବ ହାର୍ନିଆ ସମସ୍ୟାରେ ପୀଡ଼ିତ ଥିଲେ ଏବଂ ବର୍ଡର ଗାଭାସ୍କର ଟ୍ରଫି ପରେ ତାଙ୍କର ସର୍ଜରୀ ହୋଇଥିଲା । ବେଙ୍ଗାଲୁରୁର ନ୍ୟାସନାଲ୍ କ୍ରିକେଟ ଏକାଡେମୀରେ ସେ ସୁସ୍ଥ ହେବାକୁ ଖୁବ ପରିଶ୍ରମ କରିଛନ୍ତି । ଏହା ସହ ସେ ଏବେ ରଣଜୀ ଟ୍ରଫି ୨୦୨୫ ଖେଳିବାକୁ ପ୍ରସ୍ତୁତ ହୋଇଛନ୍ତି ।
ସେପଟେ ୩୦ ବର୍ଷୀୟ କ୍ରକେଟର ଇଂଲଣ୍ଡ ବିପକ୍ଷ ୩ ମ୍ୟାଚ୍ ବିଶିଷ୍ଟ ଦିନିକିଆ ସରିଜ୍ ଏବଂ ଚାମ୍ପିଅନ୍ସ ଟ୍ରଫି ଲାଗି ଭାରତୀୟ ଟିମ୍ରେ ସାମିଲ ହୋଇଛନ୍ତି । ତେବେ ଜାତୀୟ ଦଳକୁ ଫେରିବା ପୂର୍ବରୁ ମଧ୍ୟପ୍ରଦେଶ ବିପକ୍ଷରେ କୁଲଦୀପ ଯାଦବ ନିଜର ଫିଟନେସ୍ର ପ୍ରମାଣ ଦେବେ । ମଧ୍ୟପ୍ରଦେଶ ଟିମ୍ରେ ରଜତ ପାଟିଦାର, ଭେଙ୍କଟେଶ ଆୟର ଏବଂ ଶୁଭମ ଶର୍ମା ଭଳି ଖେଳାଳି ସାମିଲ ଅଛନ୍ତି । କୁଲଦୀପ ଯାଦବଙ୍କ ଭଳି ଏକାଧିକ ଷ୍ଟାର କ୍ରିକେଟର ରଣଜୀ ଟ୍ରଫିରେ ସାମିଲ ହୋଇଛିନ୍ତି ।
ବିରାଟ କୋହଲି ଦିଲ୍ଲୀ ଟିମ୍ରେ ଥିବା ବେଳେ ସେ ଅଭ୍ୟାସ ଜାରି ରଖିଛନ୍ତି । କେଏଲ ରାହୁଲ, ରବୀନ୍ଦ୍ର ଜାଡେଜା ଏବଂ ରିୟାନ ପରାଗଙ୍କ ଭଳି କ୍ରିକେଟର ମଧ୍ୟ ରଣଜୀରେ ନିଜ ଭାଗ୍ୟ ପରୀକ୍ଷା କରୁଛନ୍ତି । କେଏଲ ରାହୁଲ କର୍ଣ୍ଣାଟକ ଟିମ୍ର ହୋଇଥିବା ବେଳେ ଜାଡେଜା ସୌରାଷ୍ଟ୍ର ଟିମ୍ରେ ସାମିଲ ଅଛନ୍ତି । ଜାଡେଜା ରଣଜୀରେ ବହୁତ ଭଲ ପ୍ରଦର୍ଶନ କରିବା ସହ ଗତ ମ୍ୟାଚ୍ରେ ୧୨ ଓ୍ବିକେଟ ନେଇଥିଲେ । ଆଗାମୀ ଚାମ୍ପିଅନ୍ସ ଟ୍ରଫିରେ ଜାଡେଜା ଭଲ ପ୍ରଦର୍ଶନ କରିପାରିବେ ବୋଲି ଖେଳପ୍ରେମୀଙ୍କ ଗହଣରେ ଚର୍ଚ୍ଚା ଲାଗି ରହିଛି ।
