ନୂଆଦିଲ୍ଲୀ: ମଧ୍ୟପ୍ରଦେଶର ଉଜ୍ଜୟିନୀ ନିକଟରେ ବିକାନେର-ବିଳାସପୁର ସୁପରଫାଷ୍ଟ ଏକ୍ସପ୍ରେସ ଟ୍ରେନରେ ନିଆଁ ଲାଗିଯାଇଛି। ଅଗ୍ନିକାଣ୍ଡ ଯୋଗୁଁ ଟ୍ରେନ୍ର ଦୁଇଟି ବଗି ଜଳି ପାଉଁଶ ହୋଇଯାଇଥିବା ସୂଚନା ମିଳିଛି । ନିଆଁକୁ ନିୟନ୍ତ୍ରଣ କରାଯାଇଛି ଏବଂ ରେଳ ଅଧିକାରୀମାନେ ଘଟଣାର ତଦନ୍ତ କରୁଛନ୍ତି।
ରିପୋର୍ଟ ମୁତାବକ ଉଜ୍ଜୟିନୀ ଜିଲ୍ଲାରେ ରବିବାର ସନ୍ଧ୍ୟାରେ ଯାତ୍ରୀ ଭର୍ତ୍ତି ବିକାନେର-ବିଳାସପୁର ସୁପରଫାଷ୍ଟ ଏକ୍ସପ୍ରେସ (୨୦୮୪୬)ର ଏକ ଅଂଶରେ ନିଆଁ ଲାଗିଯାଇଥିଲା। ଅଧିକାରୀ କହିଛନ୍ତି ଯେ ନିଆଁକୁ ନିୟନ୍ତ୍ରଣ କରାଯାଇଛି ଏବଂ ଅଗ୍ନିକାଣ୍ଡରେ କେହି ଆହତ ହୋଇନାହାଁନ୍ତି।
ପଶ୍ଚିମ ରେଳବାଇର ରତଲାମ ଡିଭିଜନର ଲୋକସମ୍ପର୍କ ଅଧିକାରୀ ଖେମରାଜ ମୀନା ପିଟିଆଇକୁ କହିଛନ୍ତି ଯେ, ସନ୍ଧ୍ୟା ପ୍ରାୟ ୫ଟା ସମୟରେ ତରାନା ଏବଂ ତାଜପୁର ଷ୍ଟେସନ ମଧ୍ୟରେ ବିକାନେର-ବିଳାସପୁର ସୁପରଫାଷ୍ଟ ଏକ୍ସପ୍ରେସ (୨୦୮୪୬)ର ପାୱାର କାର୍ (ଟ୍ରେନର ଅଂଶ ଯାହା ଟ୍ରେନ୍କୁ ବିଦ୍ୟୁତ୍ ଯୋଗାଣ କରେ)ରେ ନିଆଁ ଲାଗିଯାଇଥିଲା। ତେବେ ଟ୍ରେନର 'ପାୱାର କାର୍'ରେ ଲାଗିଥିବା ନିଆଁକୁ ନିୟନ୍ତ୍ରଣ କରାଯାଇଥିଲା ଏବଂ ମରାମତି ପରେ, ସନ୍ଧ୍ୟା ୬.୩୦ ରେ ଟ୍ରେନକୁ ତା'ର ଗନ୍ତବ୍ୟସ୍ଥଳକୁ ପଠାଯାଇଥିଲା।
