ନୂଆଦିଲ୍ଲୀ,୭।୪: ମୁମ୍ବାଇରୁ ବାରାଣସୀ ଯାଉଥିବା ଇଣ୍ଡିଗୋ ଏୟାରଲାଇନ୍ସର ଏକ ବିମାନର ଜରୁରୀ ଅବତରଣ। ରବିବାର ରାତିରେ ମହାରାଷ୍ଟ୍ରର ଛତ୍ରପତି ସମ୍ଭାଜୀନଗର ବିମାନବନ୍ଦରରେ କରିବାକୁ ପଡିଥିଲା ଅବତରଣ । ବିମାନ ଉଡ଼ାଣ ଆରମ୍ଭ କରିବା ମାତ୍ରେ, ମଝି ଆକାଶରେ ଜଣେ ୮୯ ବର୍ଷୀୟା ମହିଳା ଯାତ୍ରୀଙ୍କ ସ୍ୱାସ୍ଥ୍ୟାବସ୍ଥା ଖରାପ ହୋଇପଡିଥିଲା। ଅବତରଣ କରିବା ପରେ, ଡାକ୍ତରୀ ଦଳ ତୁରନ୍ତ ଯାଞ୍ଚ ପାଇଁ ପହଞ୍ଚିଥିଲେ କିନ୍ତୁ ସେତେବେଳକୁ ମହିଳାଙ୍କ ମୃତ୍ୟୁ ହୋଇସାରିଥିଲା।

ଇଣ୍ଡିଗୋ ଅନୁଯାୟୀ, ଉତ୍ତର ପ୍ରଦେଶର ମିର୍ଜାପୁର ଜିଲ୍ଲାର ବାସିନ୍ଦା ସୁଶୀଳା ଦେବୀ ମୁମ୍ବାଇରୁ ବାରାଣସୀ ଯାଉଥିବା ବିମାନରେ ଚଢ଼ିଥିଲେ। ବିମାନ ଉଡ଼ାଣ ଆରମ୍ଭ କରିବା ମାତ୍ରେ ସୁଶୀଳାଙ୍କ ସ୍ୱାସ୍ଥ୍ୟାବସ୍ଥା ଖରାପ ହେବାକୁ ଲାଗିଲା, ଯାହା ଫଳରେ ରାତି ପ୍ରାୟ ୧୦ଟା ବେଳେ ବିମାନକୁ ଚିକଲଥାନା ବିମାନବନ୍ଦରରେ ଜରୁରୀକାଳୀନ ଅବତରଣ କରିବାକୁ ପଡିଲା।

ବିମାନ ଅବତରଣ କରିବା ମାତ୍ରେ, ଡାକ୍ତରୀ ଦଳ ଶୀଘ୍ର ଯାଞ୍ଚ ପାଇଁ ପହଞ୍ଚିଲେ ଏବଂ ଜଣାପଡିଲା ଯେ ସୁଶୀଳା ଦେବୀଙ୍କ ମୃତ୍ୟୁ ହୋଇସାରିଛି। ଏହା ପରେ, ବିମାନ ଛାଡ଼ିବା ପୂର୍ବରୁ, MIDC CIDCO ପୋଲିସ ଷ୍ଟେସନ ଆବଶ୍ୟକୀୟ ଔପଚାରିକତା ଶେଷ କରିଥିଲା, ତା'ପରେ ବିମାନଟି ବାରାଣସୀ ଅଭିମୁଖେ ଯାତ୍ରା କରିଥିଲା। ଏୟାରଲାଇନ୍ସ ପକ୍ଷରୁ କୁହାଯାଇଛି ଯେ, ପୋଲିସ ଯାତ୍ରୀଙ୍କ ମୃତଦେହକୁ ଛତ୍ରପତି ସମ୍ଭାଜୀନଗରର ଏକ ସରକାରୀ ମେଡିକାଲ କଲେଜକୁ ସ୍ଥାନାନ୍ତର କରିଛି। ଘଟଣା ପରେ, କିଛି ସମୟ ପାଇଁ ବିମାନରେ ଥିବା ଅନ୍ୟ ଯାତ୍ରୀମାନେ ଭୟଭୀତ ହୋଇପଡିଥିଳେ। ଏହି ଦୁଃଖଦ ଘଟଣାରେ ଇଣ୍ଡିଗୋ ଏୟାରଲାଇନ୍ସ ପୀଡିତଙ୍କ ପରିବାର ପ୍ରତି ସମବେଦନା ବ୍ୟକ୍ତ କରିଛି।