ଉମରକୋଟ,୧୭/୦୭: ଚୋରି କରିବାକୁ ଆସି ଧରାପଡ଼ିଲେ ଦୁଇ ଚୋର । ରାତିସାରା ଗୋଡ଼ ହାତ ବାନ୍ଧି ପିଟିଲେ ଗ୍ରାମବାସୀ । ସକାଳେ ପୋଲିସକୁ ଦେଲେ ସ୍ଥାନୀୟ ଲୋକେ । ଏଭଳି ଘଟଣା ଘଟିଛି ନବରଙ୍ଗପୁର ଜିଲ୍ଲା ଚନ୍ଦାହାଣ୍ଡି ଥାନା କୋଦୋଭଟାଗାଁରେ।
ସୂଚନା ଅନୁଯାୟୀ, ମଙ୍ଗଳବାର ରାତି ପ୍ରାୟ ୧୨ଟା ବେଳେ ଘରର ସମସ୍ତେ ଖାଇ ସାରି ଶୋଇପଡ଼ିଥିଲେ । ଏହି ସମୟ ଜଗନ୍ନାଥ ଝଙ୍କାରଙ୍କ ଘରେ ଦୁଇଜଣ ଚୋର କବାଟ ଭାଙ୍ଗି ଘର ଭିତରକୁ ପଶିବାକୁ ଉଦ୍ୟମ କରିଥିଲେ । ସେହି ସମୟରେ ଘର ମାଲିକର ସାନ ପୁଅ ଡମାର ଝାଙ୍କର ବାହାରକୁ ଆସିଥିଲେ। ଲୁଟେରାଙ୍କୁ ଦେଖିବା ପରେ କାବୁ କରିବାକୁ ଉଦ୍ୟମ କରୁଥିବା ବେଳେ ଘରମାଲିକକୁ ଧକା ମାରି ଚୋର ଚମ୍ପଟ ମାରିଥିଲା । ପଡ଼ୋଶୀ ଲୋକଙ୍କୁ ଖବର ଦେଇ ଘର ମାଲିକ ଏବଂ ସ୍ଥାନୀୟ ଲୋକେ ମିଶି ଚୋରକୁ ଗୋଡାଇଥିଲେ । ଗୋଟିଏ ଚୋର ଧରାଡିଥିବା ବେଳେ ଅନ୍ୟ ଜଣଙ୍କ ଖସି ପଳାଇଥିଲା । ଧରା ପଡିଥିବା ଚୋରକୁ ଚତୁରତା ସହ ସାଙ୍ଗରେ ଆସିଥିବା ଚୋରକୁ ଡାକିଲେ ତତେ ଛଡାଯିବ ବୋଲି କହିଥିଲେ ଗ୍ରାମବାସୀ । ସେ ଅନ୍ୟ ଚୋରକୁ ଡାକିଥିଲା । ପରେ ଦୁଇ ଚୋରକୁ ହାତ ଗୋଡ଼ ବାନ୍ଧି ତାଙ୍କର ପରିଚୟ ପଚାରିବାରୁ ସେମାନେ ନୂଆପଡା ଜିଲ୍ଲା ଝାରବନ୍ଧ ଗାଁର ବୋଲି କହିଥିଲେ । ଉଭୟଙ୍କ ନାମ ବେଦକୁମାର ବିଶି ଓ ଭବାନୀ ନାଗେଶ ବୋଲି ଜଣା ପଡିଥିଲା। ସକାଳ ହେବାରୁ ଗ୍ରାମବାସୀ ଦୁଇ ଚୋରକୁ ପୋଲିସ ଜିମା ଦେଇଛନ୍ତି । ସେମାନଙ୍କ ପାଖରୁ ଦୁଇଟି ବାଇକ୍ ଏବଂ ଗୋଟେ ମୋବାଇଲ ଜବତ କରି ଥାନାରେ ଅଟକ ରଖିଛି ପୋଲିସ ।