ନୂଆଦିଲ୍ଲୀ: ଭାରତ ଏବଂ ପାକିସ୍ତାନ ମଧ୍ୟରେ ଚାଲିଥିବା ଉତ୍ତେଜନା ମଧ୍ୟରେ ଏକ ଚାଞ୍ଚଲ୍ୟକର ଖବର ସାମ୍ନାକୁ ଆସିଛି। ସୂତ୍ର ଅନୁଯାୟୀ, ତୁର୍କୀ ପାକିସ୍ତାନ ସେନାକୁ ଭାରତ ବିରୋଧରେ ଆକ୍ରମଣ ଯୋଜନା କରିବାରେ ସାହାଯ୍ୟ କରିଥିଲା। ଖାଲି ଏତିକି ନୁହେଁ ୩୫୦ରୁ ଅଧିକ ଡ୍ରୋନ ସହ ସାମରିକ ଅପରେଟିଭ ମଧ୍ୟ ଯୋଗାଇ ଦେଇଥିଲା। ଯାହାର ପ୍ରମାଣ ଭାରତୀୟ ସେନା ହାତରେ ଲାଗିଛି।
ଅପରେସନ ସିନ୍ଦୁର ଅଧୀନରେ ଭାରତୀୟ ସେନା ପାକିସ୍ତାନ ଓ ପାକିସ୍ତାନ ଅଧିକୃତ କାଶ୍ମୀରରେ ଆତଙ୍କବାଦୀ ଶିବିରଗୁଡ଼ିକ ଉପରେ ଆକ୍ରମଣ କରିଥିଲା। ଏହି ଅପରେସନ ମଧ୍ୟରେ ଦୁଇ ଜଣ ତୁର୍କୀ ସାମରିକ ଅପରେଟିଭ ମଧ୍ୟ ନିହତ ହୋଇଥିବା ଜଣାପଡ଼ିଛି। ସୂତ୍ର ଅନୁସାରେ, ତୁର୍କୀ ପାକିସ୍ତାନକୁ କେବଳ ଡ୍ରୋନ ଯୋଗାଇ ନଥିଲା, ବରଂ ଡ୍ରୋନ ଆକ୍ରମଣ ପାଇଁ ପାକିସ୍ତାନୀ ସେନା ଅଧିକାରୀମାନଙ୍କୁ ପରାମର୍ଶ ମଧ୍ୟ ଦେଇଥିଲା। ପାକିସ୍ତାନ ଭାରତ ବିରୋଧରେ ତୁର୍କୀ ନିର୍ମିତ ବେୟରକ୍ତାର ଟିବି୨ ଏବଂ ଯୀହା ଡ୍ରୋନ ବ୍ୟବହାର କରିଥିବା ସୂଚନା ମିଳିଛି। ଏହି ଡ୍ରୋନଗୁଡ଼ିକ ଲକ୍ଷ୍ୟ ନିର୍ଦ୍ଧାରଣ ଏବଂ ସମ୍ଭବତଃ କାମିକାଜୀ ଆକ୍ରମଣ ପାଇଁ ବ୍ୟବହୃତ ହୋଇଥିଲା। ଯାହା ଭାରତୀୟ ସେନାର ଅଗ୍ରଗାମୀ ଅବସ୍ଥାନ ଏବଂ ସାମଗ୍ରୀ ଯୋଗାଣ କନଭୟ ପାଇଁ ବିପଦ ସୃଷ୍ଟି କରିଥିଲା।
ଭାରତୀୟ ସେନା ଏହି ଡ୍ରୋନ ଆକ୍ରମଣର ମୁକାବିଲା ପାଇଁ କାଇନେଟିକ୍ ଏବଂ ନନ୍-କାଇନେଟିକ୍ ଉପାୟ ବ୍ୟବହାର କରି ଅନେକ ଡ୍ରୋନକୁ ନଷ୍ଟ କରିଥିଲା। ଏନେଇ କର୍ନେଲ ସୋଫିୟା କୁରେଶୀ କହିଛନ୍ତି, "ଏହି ବୃହତ୍ତର ଆକାଶମାର୍ଗ ଅନୁପ୍ରବେଶର ସମ୍ଭାବ୍ୟ ଉଦ୍ଦେଶ୍ୟ ଥିଲା ଭାରତର ବାୟୁ ପ୍ରତିରକ୍ଷା ବ୍ୟବସ୍ଥାକୁ ପରୀକ୍ଷା କରିବା ଏବଂ ଗୁଇନ୍ଦା ସୂଚନା ସଂଗ୍ରହ କରିବା।" ଭାରତ ବୁଧବାର ଦିନ ତୁର୍କୀର ସରକାରୀ ଖବର ସଂସ୍ଥା ଟିଆରଟିର ଏକ୍ସ ପ୍ଲାଟଫର୍ମକୁ ଭାରତରେ ନିଷିଦ୍ଧ କରିଛି। ତୁର୍କୀର ପାକିସ୍ତାନକୁ ସାମରିକ ସମର୍ଥନ ପ୍ରଦାନ କରିବାର ପ୍ରତିବାଦ ସ୍ଵରୂପ ଭାରତ ଏହି ନିଷ୍ପତ୍ତି ଗ୍ରହଣ କରିଛି ବୋଲି ସୂଚନା ମିଳିଛି।
ସୂତ୍ର ଅନୁଯାୟୀ, ତୁର୍କୀ ଏବଂ ପାକିସ୍ତାନ ମଧ୍ୟରେ ସାମରିକ ସମ୍ପର୍କ ବିଗତ କିଛି ବର୍ଷ ଧରି ନାଟକୀୟ ଢଙ୍ଗରେ ବୃଦ୍ଧି ପାଇଛି। ତୁର୍କୀ ପାକିସ୍ତାନକୁ ଗୁରୁତ୍ଵପୂର୍ଣ୍ଣ ସାମରିକ ହାର୍ଡୱେୟାର ଯୋଗାଇ ଦେବା ସହ ପାକିସ୍ତାନୀ ସେନା ପାଇଁ ତାଲିମ ମଧ୍ୟ ପ୍ରଦାନ କରିଛି। ଏହାଛଡ଼ା, ତୁର୍କୀ ପାକିସ୍ତାନକୁ ଚାରୋଟି ମିଲଗେମ-ଶ୍ରେଣୀ କର୍ଭେଟ, ବେୟରକ୍ତାର ଟିବି୨ ଏବଂ ଆକିନସି ଡ୍ରୋନ ଯୋଗାଇ ଦେଇଛି। ୨୦୨୪ରେ ତୁର୍କୀ ଏବଂ ପାକିସ୍ତାନ ମିଳିତ ଭାବେ ବିୟଣ୍ଡ-ଭିଜୁଆଲ-ରେଞ୍ଜ ଏୟାର-ଟୁ-ଏୟାର ମିସାଇଲ (ବିଭିଆରଏଏଏମ) ନିର୍ମାଣ ପାଇଁ ମଧ୍ୟ ଆଲୋଚନା କରିଥିଲେ।
ଏହି ଖବର ଅନୁଯାୟୀ, ତୁର୍କୀ ଏବଂ ପାକିସ୍ତାନ ମଧ୍ୟରେ ବୃଦ୍ଧି ପାଉଥିବା ସାମରିକ ସମ୍ପର୍କ ଏବଂ ତୁର୍କୀର ଭାରତ ବିରୋଧୀ କାର୍ଯ୍ୟକଳାପ ଭାରତ ପାଇଁ ଚିନ୍ତାର ବିଷୟ ପାଲଟିଛି। ଭାରତୀୟ ସେନା ଏହି ପରିସ୍ଥିତିରେ ସତର୍କ ରହିଛି ଏବଂ ପାକିସ୍ତାନର ଯେକୌଣସି ଆକ୍ରମଣର ମୁକାବିଲା ପାଇଁ ପ୍ରସ୍ତୁତ ରହିଛି।
