କୁଆଖିଆ,୦୨/୧୦: କୁଆଖିଆ-ଜେନାପୁର ରାସ୍ତାର କୁଆଖିଆ ବଜାର ଅଞ୍ଚଳରେ ଏକ ଭଡ଼ାଘରୁ ଜଣେ ମହିଳାଙ୍କ ମୃତଦେହ ମଙ୍ଗଳବାର ବିଳମ୍ବିତ ରାତିରେ ଉଦ୍ଧାର ହୋଇଛି। ମୃତ ମହିଳା ଜଣକ ଭୋଟକା ଗାଁର କୈଳାସ ରାଉତଙ୍କ ଝିଅ ଦୀପାଞ୍ଜଳୀ (୨୨) ଜଣାପଡ଼ିଛି । ଯାଜପୁର ଜିଲ୍ଲା କୁଆଖିଆ ବଜାରରେ ଏଭଳି ଘଟଣା ଘଟିଛି ।
ସୂଚନା ମୁତାବକ, ଦୀପାଞ୍ଜଳୀ ଗତ ୩ ବର୍ଷ ତଳେ ଭୋଟକା ଗାଁର ବିଷ୍ଣୁ ଚରଣ ବେହେରାଙ୍କ ପୁଅ ସତ୍ୟ ରଞ୍ଜନ ବେହେରାଙ୍କୁ ପ୍ରେମ ବିବାହ କରିଥିଲେ ।ବିବାହ ପରେ ପାରିବାରିକ ବିବାଦ ଯୋଗୁଁ ଉଭୟ ପତି ଓ ପତ୍ନୀ କୁଆଖିଆ ମଧୁବନ ରୋଡ ଗ୍ରାମ୍ୟ ବ୍ୟାଙ୍କ ନିକଟରେ ରହି ଆସୁଥିଲେ l ବାରମ୍ବାର ଅର୍ଥ ଦାବି କରି ଦୀପାଞ୍ଜଳିଙ୍କ ସ୍ୱାମୀ ତାଙ୍କୁ ଅତ୍ୟାଚାର କରିଆସୁଥିଲେ । ଏନେଇ ବହୁ ଆଗରୁ ଝିଅ ଘର ପରିବାର ପକ୍ଷରୁ କୁଆଖିଆ ଥାନାରେ ଅଭିଯୋଗ ମଧ୍ୟ ହୋଇଥିଲା । ମଙ୍ଗଳବାର ଝିଅ ଘର ପରିବାର ଲୋକେ ଫୋନ ଯୋଗେ ଯୋଗାଯୋଗ କରିଥିଲେ ମଧ୍ୟ କୌଣସି ଉତ୍ତର ନ ମିଳିବାରୁ ସ୍ବାମୀ ସତ୍ୟରଞ୍ଜନଙ୍କୁ ଫୋନ କରିଥିଲେ । ସେ ମଧ୍ୟ କୌଣସି ସନ୍ତୋଷ ଜନକ ଉତ୍ତର ନ ଦେବାରୁ ପରିବାର ଲୋକଙ୍କୁ ସନ୍ଦେହ ହୋଇଥିଲା । ସନ୍ଦେହ ହେବାରୁ ଆସି ଦେଖିବାରୁ ଘର ଭିତରୁ ଦୁର୍ଗନ୍ଧ ବାହାରୁଥିବା ଜାଣିବାକୁ ପାଇଥିଲେ ପରିବାର ଲୋକେ । ସତ୍ୟରଞ୍ଜନ ପ୍ରମାଣ ନଷ୍ଟ ପାଇଁ ଉଦ୍ୟମ କରୁଥିବା ଦେଖି ପରିବାର ଲୋକେ ପୋଲିସକୁ ଖବର ଦେଇଥିଲେ । ତେବେ ଏହା ଏକ ସୁଚିନ୍ତିତ ହତ୍ୟାକାଣ୍ଡ ବୋଲି ମହିଳାଙ୍କ ପରିବାର ପକ୍ଷରୁ କୁଆଖିଆ ଥାନାରେ ଅଭିଯୋଗ କରାଯାଇଛି ।
ଉକ୍ତ ଅଭିଯୋଗ ଆଧାରରେ ପୁଲିସ ବିଳମ୍ବିତ ରାତିରେ ଘଟଣାସ୍ଥଳରେ ପହଞ୍ଚି ଘଟଣାର ତଦନ୍ତ କରି ଅଭିଯୁକ୍ତ ସ୍ୱାମୀ ସତ୍ୟରଞ୍ଜନକୁ ଗିରଫ କରି ଆଣିଥିଲେ । ସେହି ସମୟରେ ଉତ୍ୟକ୍ତ ଲୋକେ ସତ୍ୟକୁ ଆକ୍ରମଣ କରି ମାଡ ମାରିଥିଲେ l ଏହି ଆକ୍ରମଣରେ କୁଆଖିଆ ପୋଲିସି ମଧ୍ୟ ଆକ୍ରମଣର ଶିକାର ହୋଇଥିଲା l ବୁଧବାର ସକାଳେ ମାଜିଷ୍ଟ୍ରେଟ ଭାବେ ରସୁଲପୁର ତହସିଲଦାରଙ୍କ ଉପସ୍ଥିତିରେ ସାଇଣ୍ଟିଫିକ ଟିମ ସହାୟତାରେ ତଦନ୍ତ କରାଯାଇଛି । ଶବ ଜବତ କରି ବ୍ୟବଛେଦ ପାଇଁ ପଠାଯାଇ ତଦନ୍ତ ଚଲାଇଥିବା ଜଣାପଡିଛି l
