ଚଣ୍ଡିଖୋଲ,୨୧/୦୯: ଖୁଦୁରୁକୁଣୀ ମୂର୍ତ୍ତି ବିସର୍ଜନ ସମୟରେ ପୋଖରୀରେ ବୁଡ଼ି ନବମ ଶ୍ରେଣୀ ଛାତ୍ରଙ୍କ ମୃତ୍ୟୁ । ମୃତ ଛାତ୍ର ଜଣକ ସଞ୍ଜୟ ସେନାପତିଙ୍କ ପୁଅ ହିତେଶ (୧୪) ବୋଲି ଜଣାପଡ଼ିଛି । ଯାଜପୁର ଜିଲ୍ଲା ବଡ଼ଚଣା ଥାନା ଅଧୀନ କୋଲସାହି ଗ୍ରାମରେ ଏଭଳି ଅଭାବନୀୟ ଘଟଣା ଘଟିଛି । 

ସୂଚନା ମୁତାବକ, କୋଲସାହି ଗ୍ରାମରେ ଅତି ଧୁମଧାମ୍‌ରେ କରାଯାଇଥିଲା ଖୁଦୁରୁକୁଣୀ ପୂଜା । ତେବେ ଶନିବାର ଖୁଦୁରୁକୁଣୀ ମୂର୍ତ୍ତି ବିସର୍ଜନ ହେଉଥିଲା । ସେଥିପାଇଁ ଗ୍ରାମର ଅନେକ ଲୋକ ଏବଂ ଛୋଟ ପିଲା ନିକଟସ୍ଥ ପୋଖରୀକୁ ଯାଇଛିଲେ । ସେଠାରେ ବିସର୍ଜନ କରିବା ସମୟରେ ହିତେଶ ପୋଖରୀରେ ବୁଡି ଯାଇଥିଲେ । ଏହା ଦେଖି ସ୍ଥାନୀୟଲୋକେ ପୋଖରୀରେ ଖୋଜାଖୋଜି କରି ହିତେଶଙ୍କୁ ଉଦ୍ଧାର କରିଥିଲେ । ପୋଖରୀରୁ ଉଦ୍ଧାର କରି ତୁରନ୍ତ ତାଙ୍କୁ ବଡ଼ଚଣା ଗୋଷ୍ଠୀ ସ୍ୱାସ୍ଥ୍ୟ କେନ୍ଦ୍ରରେ ଚିକିତ୍ସା ପାଇଁ ଭର୍ତ୍ତି କରାଇଥିଲେ । ସେଠାରେ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ । ହିତେଶଙ୍କ ପରିବାର ଲୋକେ ଏହି ଘଟଣା ସମ୍ୱନ୍ଧରେ ବଡ଼ଚଣା ପୋଲିସକୁ ଖବର ଦେଇଥିଲା । ଖବର ପାଇ ଘଟଣାସ୍ଥଳରେ ପୋଲିସ ପହଞ୍ଚି ମୃତଦେହକୁ ଜବତ କରି ବ୍ୟବଚ୍ଛେଦ ପାଇଁ ପଠାଇଛି ପୋଲିସ । ଏଥି ସହିତ ଘଟଣାର ଅଧିକ ତଦନ୍ତ କରୁଛି ବଡ଼ଚଣା ପୋଲିସ । ହିତେଶଙ୍କ ମୃତ୍ୟୁକୁ ନେଇ ସ୍ଥାନୀୟ ଅଞ୍ଚଳରେ ଶୋକର ଛାୟା ଖେଳି ଯାଇଛି।