ଧର୍ମଶାଳା, ୩୦।୯(ସ୍ୱପ୍ର): ଧର୍ମଶାଳା ଥାନା ଜାରକା ସ୍ଥିତ ପଣ୍ଡା ଢ଼ାବା ସନ୍ନିକଟ ୧୬ ନମ୍ୱର ଜାତୀୟ ରାଜପଥ ଉପରେ ଯାତ୍ରୀବାହୀ ବସ ଓ ସାର ବୋଝେଇ ଟ୍ରକ ମଧ୍ୟରେ ଦୁର୍ଘଟଣା ଘଟିଛି। ଏଥିରେ ବସ ହେଲପରଙ୍କ ମୃତ୍ୟୁ ଘଟିଥିବା ବେଳେ ୨୩ ଜଣ ଯାତ୍ରୀ ଆହତ ହୋଇଛନ୍ତି। ରବିବାର ରାତି ପ୍ରାୟ ୩ଟା ସମୟରେ ଏହି ଦୁର୍ଘଟଣା ଘଟିଛି।
ଉଦଳାରୁ ଭୁବନେଶ୍ୱର ଅଭିମୁଖେ ଯାତ୍ରୀ ନେଇ ଯାଉଥିବା ରାଜା ବସ(ଓଡ଼ି ୧୧ ପି ୬୩୯୯) ଜାରକା ଠାରେ ପୂର୍ବରୁ ଖରାପ ହୋଇ ରାସ୍ତା ପାର୍ଶ୍ବରେ ଛିଡ଼ା ହୋଇଥିବା ଏକ ସାର ବୋଝେଇ ଟ୍ରକ(ଓଡ଼ି ୨୯ ଜେ ୨୫୭୯) ପଛକୁ ଦ୍ରୁତ ଗତିରେ ଆସି ଧକ୍କା ଦେଇଥିଲା। ସମ୍ଭବତଃ ଡ୍ରାଇଭର ଆଖିରେ ନିଦ ଲଗାଯାଇଥିବାରୁ ଭାରସାମ୍ୟ ହରାଇ ଏହି ଦୁର୍ଘଟଣା ଘଟିଥିବା ଅନୁମାନ କରାଯାଉଛି। ଘଟଣା ସ୍ଥଳେ ଧର୍ମଶାଳା ପୁଲିସ ପହଞ୍ଚି ଦମକଳ ବାହିନୀ କର୍ମଚାରୀଙ୍କ ଦ୍ଵାରା କଟର ସହାୟତାରେ ଟ୍ରକ ପଛରୁ ବସ ସମ୍ମୁଖ ଭାଗକୁ ଅଲଗା କରିଥିଲା। ଏହା ପରେ ଯାତ୍ରୀମାନେ ଭିତରୁ ବାହାରିଥିଲେ। କେତେକ ଯାତ୍ରୀ ବସ କାଚ ଓ ପଛ ଝରକା ବାଟେ ବାହାରିଯାଇଥିଲେ। ଘଟଣା ସ୍ଥଳରେ ହେଲପର ଉଦଳା ଥାନା ଲୁଣିଆବଣୀ ଗ୍ରାମର ସର୍ଦ୍ଦାର ସତୀଶ ହାଁସଦାଙ୍କର ମୃତ୍ୟୁ ଘଟିଥିବା ବେଳେ ୨୩ ଜଣ ଆହତ ହୋଇଥିଲେ। ସେମାନଙ୍କୁ ପୁଲିସ ଗାଡ଼ି ଓ ଆମ୍ବୁଲାନ୍ସ ଯୋଗେ ସ୍ଥାନୀୟ ଲୋକମାନଙ୍କ ସହାୟତାରେ ଧର୍ମଶାଳା ମେଡ଼ିକାଲରେ ଭର୍ତ୍ତି କରିଥିଲା। ସେମାନଙ୍କ ମଧ୍ୟରୁ ୩ଜଣଙ୍କ ଅବସ୍ଥା ଗୁରୁତର ଥିବାରୁ ପ୍ରାଥମିକ ଚିକିତ୍ସା ପରେ କଟକ ସ୍ଥାନାନ୍ତର କରାଯାଇଥିଲା। ପୁଲିସ ବସ ଓ ଟ୍ରକକୁ ଜବତ କରି ଏକ ମାମଲା ରୁଜୁ କରିଛି । ଟ୍ରକଟି ସାର ନେଇ ବିହାର ପାଟନାରୁ ଭୁବନେଶ୍ୱର ଯାଉଥିଲା।
