ଯାଜପୁର/କଟକ,୨୫/୧୧: ଧର୍ମଶାଳା ବିଧାୟକ ହିମାଂଶୁ ସାହୁଙ୍କୁ ଯାଜପୁର ସଦର ଥାନା ବୁଢ଼ାଘାଟ ନିକଟସ୍ଥ ରାସ୍ତାରେ ସଂଘବଦ୍ଧ ଆକ୍ରମଣ ଘଟଣାର କ୍ରାଇମ୍ବ୍ରାଞ୍ଚ୍ ତଦନ୍ତ ଆରମ୍ଭ ହୋଇଛି । ଡିଜିପି ଯୋଗେଶ ବାହାଦୂର ଖୁରାନିଆ ରବିବାର ସନ୍ଧ୍ୟାରେ ଏହି ଘଟଣାରେ କ୍ରାଇମବ୍ରାଞ୍ଚ୍ ତଦନ୍ତ ନିର୍ଦ୍ଦେଶ ଦେଇଛନ୍ତି । କ୍ରାଇମ୍ବ୍ରାଞ୍ଚ୍ର ଜଣେ ଡିଏସ୍ପିଙ୍କୁ ଏହାର ତଦନ୍ତ ଭାର ଦିଆଯାଇଛି । ଏହାପରେ ରାତି ପ୍ରାୟ ୧୦ଟାରେ କ୍ରାଇମ୍ବ୍ରାଞ୍ଚ ଟିମ୍ ଯାଜପୁର ଟାଉନ୍ ଥାନାରେ ପହଞ୍ଚି ତଦନ୍ତ ଆରମ୍ଭ କରିଛନ୍ତି ।
ଅପରପକ୍ଷରେ, ରବିବାର ସନ୍ଧ୍ୟାରେ ହଠାତ୍ ଯାଜପୁର ଏସ୍ଡିପିଓ ସତ୍ୟବ୍ରତ ଲେଙ୍କାଙ୍କୁ ରାଜ୍ୟ ପୁଲିସ ମୁଖ୍ୟାଳୟକୁ ବଦଳି କରାଯାଇଛି । ଯାଜପୁରରେ ଲାଗି ରହିଥିବା ଅଶାନ୍ତ ବାତାବରଣ ବେଳେ ପୁଲିସ ଉଚ୍ଚ ଅଧିକାରୀ ଏସ୍ଡିପିଓଙ୍କ କାର୍ଯ୍ୟଧାରାରେ ସନ୍ତୁଷ୍ଟ ନାହାନ୍ତି । ସେଥିପାଇଁ ତାଙ୍କୁ ବଦଳି କରାଯାଇଥିବା ଚର୍ଚ୍ଚା ହେଉଛି । ତାଙ୍କ ସ୍ଥାନରେ ଅସ୍ଥାୟୀ ଭାବେ କୈଳାସ ଚନ୍ଦ୍ର ସେଠୀଙ୍କୁ ଏସ୍ଡିପିଓ ଦାୟିତ୍ୱ ଦିଆଯାଇଛି । ଶ୍ରୀ ସେଠୀ ଏବେ ଯାଜପୁର ଆଇୟୁସିଏଡବ୍ଲୁ ଡିଏସ୍ପି ଅଛନ୍ତି ।
ଉଲ୍ଳେଖଯୋଗ୍ୟ, ଚଳିତ ମାସ ୨୦ ତାରିଖରେ ବିରଜା ହାଟ ପୂର୍ବ ସ୍ଥାନକୁ ଫେରିବା ସଂପର୍କରେ ପ୍ରଚାର କରାଯାଇଥିଲା । ଯାହାକୁ ନେଇ ବିଜେଡି କର୍ମୀମାନେ ସେହିଦିନ ସନ୍ଧ୍ୟା ସମୟରେ ୨୦ନଂ ଜାତୀୟ ରାଜପଥର ଯାଜପୁର ସଦର ଥାନା ଅନ୍ତର୍ଗତ ବୁଢ଼ାଘାଟ ନିକଟରେ ରାସ୍ତାରୋକ କରିଥିଲେ । ଧର୍ମଶାଳା ବିଧାୟକ ଶ୍ରୀ ସାହୁ ସେହି ସମୟରେ ଖଣି ବିଭାଗ ଉପନିର୍ଦ୍ଦେଶକଙ୍କୁ ଦେଖା କରିବା ପାଇଁ ଯାଜପୁର ଯାଉଥିବା ବେଳେ ରାସ୍ତାରୋକ ଚାଲିଥିବା ଦେଖିବାକୁ ପାଇଥିଲେ । ସେଠାରେ ସେ ଅଟକି ଥିବା ବେଳେ ତାଙ୍କ କାର୍ ଉପରକୁ ଆକ୍ରମଣ ହୋଇଥିଲା । ଏନେଇ ଯାଜପୁର ସଦର ଥାନାରେ ଅଭିଯୋଗ ପରେ ପୁଲିସ ବିଏନ୍ଏସ୍ର ଏକାଧିକ ଧାରାରେ ମାମଲା ରୁଜୁ କରିଥିଲା । ଏହି ଘଟଣାକୁ ନେଇ ଗଲା ୪ ଦିନ ହେବ ଯାଜପୁରରେ ରାଜନୈତିକ ଉଷ୍ମତା ଲାଗିରହିଛି । ଡିଜିପି ଶ୍ରୀ ଖୁରାନିଆ ଏକ ନିର୍ଦ୍ଦେଶନାମା ଜାରି କରି ବିଧାୟକଙ୍କୁ ମାଡ଼, ରାସ୍ତାରୋକ ଓ ଥାନା ଘେରାଉ ଭଳି ମାମଲା ଗୁଡ଼ିକର ତଦନ୍ତ କ୍ରାଇମବ୍ରାଞ୍ଚ୍ କରିବ ବୋଲି ନିର୍ଦ୍ଦେଶ ଦେଇଛନ୍ତି । ସଦର ଥାନାରେ ରୁଜୁ ହୋଇଥିବା ମାମଲା ନଂ ୩୦୩/୨୪, ଯାଜପୁର ଟାଉନ୍ ଥାନାରେ ରୁଜୁ ହୋଇଥିବା ମାମଲା ନଂ ୪୬୯/୨୪ ଓ ୪୭୦/୨୪ ଭଳି ତିନୋଟି ମାମଲାରେ କ୍ରାଇମବ୍ରାଞ୍ଚ ତଦନ୍ତ କରିବ ।
ଏନେଇ କ୍ରାଇମ୍ବ୍ରାଞ୍ଚ୍ରେ କେସ୍ ନଂ. ୧୪/୨୪, ୧୫/୨୪ ଓ ୧୬/୨୪ରେ ତିନୋଟି ମାମଲା ରୁଜୁ ହୋଇଛି । କ୍ରାଇମ୍ବ୍ରାଞ୍ଚ୍ର ଡିଏସ୍ପି ସରୋଜକାନ୍ତ ମହନ୍ତଙ୍କ ନେତୃତ୍ୱରେ ୬ ଜଣିଆ ତଦନ୍ତକାରୀ ଦଳ ଗଠନ କରାଯାଇଛି । ଗୋଟିଏ ମାମଲାର ତଦନ୍ତକାରୀ ଅଧିକାରୀ ଶ୍ରୀ ମହନ୍ତ ଥିବା ବେଳେ ଅନ୍ୟ ଦୁଇଟି ମାମଲାରେ ଡିଏସ୍ପି ମମତା ଜେନା ଓ ଇନ୍ସପେକ୍ଟର ବିଜିତ କୁମାର ବେହେରାଙ୍କୁ ଦିଆଯାଇଛି । ଏହି ତଦନ୍ତକାରୀ ଟିମ୍ ଯାଜପୁର ଟାଉନ୍ ଥାନାରେ ବରିଷ୍ଠ ପୁଲିସ ଅଧିକାରୀ ଓ ଯାଜପୁର ଟାଉନ୍ ଥାନା ଅଧିକାରୀ ଶରତ ପାତ୍ରଙ୍କ ଉପସ୍ଥିତିରେ କାଗଜପତ୍ର ଯାଞ୍ଚ ଆରମ୍ଭ କରିଛନ୍ତି । ଏହି ମାମଲାରେ ଏଯାବତ୍ ୧୯ଜଣ ଅଭିଯୁକ୍ତ ଗିରଫ ହୋଇଛନ୍ତି।
