ଯାଜପୁର ରୋଡ୍, ୨୯।୯: ଅନ୍ୟ ଜାତିରେ ପ୍ରେମ ବିବାହ କରିବାରୁ ଘରୁ ତଡ଼ିଦେଇଥିଲେ ପରିବାର । ଆଉ ଏବେ ଦେଇଥିବା ଟଙ୍କା ଫେରସ୍ତ ମାଗିବାରୁ ପୁଅକୁ ଜୀବନରୁ ମାରିଦେଲେ । ଏଭଳି ଅଭିଯୋଗ ଆସିଛି ଯାଜପୁର ଜିଲ୍ଲା ସୁକିନ୍ଦା ଅଞ୍ଚଳରୁ । ମୃତକଙ୍କ ପତ୍ନୀ ଥାନାରେ ଏଭଳି ଲିଖିତ ଅଭିଯୋଗ କରିବା ପରେ ଏକ ମାମଲା ରୁଜୁ କରି ଘଟଣାର ତଦନ୍ତ ଆରମ୍ଭ କରିଛି ସୁକିନ୍ଦା ପୋଲିସ । ସେପଟେ ଘଟଣା ପରେ ଫେରାର ହୋଇଯାଇଛନ୍ତି ମୃତକଙ୍କ ପରିବାର ଲୋକେ । 

ସୂଚନା ଅନୁଯାୟୀ, ସୁକିନ୍ଦା ଅଞ୍ଚଳର ଦେବ ରଞ୍ଜନ ସିଂ ସାମନ୍ତଙ୍କ ପୁଅ ସୁଶିଲମୟ ସିଂ ସାମନ୍ତ କଳିଙ୍ଗନଗର ଥାନା ଡ଼ୁବୁରୀ ଅଞ୍ଚଳର ନୀଳମଣି ସାହୁଙ୍କ ଝିଅ ବିଜୟଲକ୍ଷ୍ମୀ ସାହୁଙ୍କୁ ପ୍ରମ ବିବାହ କରିଥିଲେ । ହେଲେ ବିଜୟଲକ୍ଷ୍ମୀ ଦଳିତ ଜାତିର ହୋଇଥିବାରୁ ପୁଅ ବୋହୁଙ୍କୁ ଘରୁ ବାହାର କରିଦେଇଥିଲେ ସୁଶିଲଙ୍କ ପରିବାର ଲୋକେ । ପରେ ଉଭୟ ସୁଶିଲ ଓ ବିଜୟଲକ୍ଷ୍ମୀ ସୁକିନ୍ଦା ଅଞ୍ଚଳରେ ଦୀର୍ଘ ଦିନରୁ ଏକ ଭଡ଼ା ଘରେ ରହିଆସୁଥିଲେ । ଏବେ ତାଙ୍କର ଏକ ୪ ବର୍ଷର ପୁଅଟିଏ ମଧ୍ୟ ରହିଛି । ସୁଶିଲ ବାଙ୍ଗାଲୋରଠାରେ ସୁରକ୍ଷାକର୍ମୀ ଭାବେ କାର୍ଯ୍ୟ କରୁଥିବା ବେଳେ କିଛି ମାସ ହେବ ଘରକୁ ଆସିଥିଲେ । ତାଙ୍କ ପରିବାର ଲୋକେ ପୂର୍ବରୁ ବିଭିନ୍ନ ସମୟରେ ସୁଶିଲଙ୍କଠାରୁ ଉଧାର ଆକାରରେ ଲକ୍ଷାଧିକ ଟଙ୍କା ନେଇଥିଲେ । ହେଲେ ଟଙ୍କା ଆବଶ୍ୟକ ପଡ଼ିବାରୁ ସୁଶିଲ ତାଙ୍କ ବାପାଙ୍କୁ ଦେଇଥିବା ଟଙ୍କା ଫେରସ୍ତ ମାଗିଥିଲେ । ଯାହାକୁ ନେଇ ଆରମ୍ଭ ହୋଇଥିଲା ମତଭେଦ । 

ପରିବାର ଲୋକେ ଟଙ୍କା ନଦେଇ ବିଭିନ୍ନ ଆଳ ଦେଖାଇଥିଲେ । ଗତ କିଛିଦିନ ତଳେ ସୁଶିଲଙ୍କୁ ବାଙ୍ଗାଲୋର ଯିବାପାଇଁ ଟଙ୍କା ଦରକାର ପଡ଼ିବାରୁ ନିଜ ଘରକୁ ଟଙ୍କା ମାଗିବାକୁ ଯାଇଥିଲେ । ହେଲେ ଆଉ ଫେରି ନଥିଲେ । ଏହାର ଠିକ୍ ପରଦିନ ଘର ନିକଟ କୂଅରୁ ତାଙ୍କ ମୃତଦେହ ମିଳିଥିଲା । ତେଣୁ ତାଙ୍କୁ ହତ୍ୟା କରାଯାଇଥିବା ସୁକିନ୍ଦା ଥାନାରେ ଲିଖିତ ଅଭିଯୋଗ କରିଥିଲେ ସୁଶିଲଙ୍କ ପତ୍ନୀ ବିଜୟଲକ୍ଷ୍ମୀ । ଏଥିରେ ତାଙ୍କ ବାପା, ମା', ୫ ଭଉଣୀଙ୍କ ସମେତ ଜଣେ ମାମୁଁ ସମ୍ପୃକ୍ତ ଥିବା ସେ ଅଭିଯୋଗରେ ଦର୍ଶାଇଥିଲେ । ଅଭିଯୋଗ ପାଇବା ପରେ ପୋଲିସ ଏକ ମାମଲା ରୁଜୁ କରି ଘଟଣାର ତଦନ୍ତ ଚଳାଇଛି । ସେପଟେ ସୁଶିଲଙ୍କ ପରିବାର ଲୋକେ ଘଟଣା ପରଠୁ ଫେରାର ରହିଥିବା ଜଣାପଡ଼ିଛି । ଏହି ଘଟଣା ଏବେ ସୁକିନ୍ଦା ଅଞ୍ଚଳରେ ଚାଞ୍ଚଲ୍ୟ ଖେଳାଇଦେଇଛି ।