ଧର୍ମଶାଳା,୨୫/୦୯: ୧୬ ନମ୍ବର ଜାତୀୟ ରାଜପଥ ପାଖରୁ ଅଚିହ୍ନା ଯୁବକଙ୍କ କ୍ଷତାକ୍ତ ମୃତଦେହ ଉଦ୍ଧାର । ଯୁବକ ଜଣକ ଅର୍ଦ୍ଧ ଉଲଗ୍ନ ଥିବାବେଳେ ତାଙ୍କ ମୁଣ୍ଡ ଓ ମୁହଁରେ ସହ ଜଙ୍ଘରେ କ୍ଷତ ଚିହ୍ନ ରହିଛି । ଯୁବକଙ୍କ ମୃତ୍ୟୁର କାରଣ ଅସ୍ପଷ୍ଟ ରହିଥିବାବେଳେ ଯାଜପୁର ଜିଲ୍ଲା ଧର୍ମଶାଳା ଥାନା ଜାରକା ଦେଉଳି ଗ୍ରାମ ନିକଟସ୍ଥ ୧୬ ନମ୍ବର ଜାତୀୟ ରାଜପଥ ପାଖରେ ଏହି ଘଟଣା ଘଟିଛି ।

ସୂଚନା ମୁତାବକ, ବୁଧବାର ଭୋର ସମୟରେ ୧୬ ନମ୍ବର ଜାତୀୟ ରାଜପଥ ପାଖରେ ଜଣେ ଯୁବକଙ୍କ ମୃତଦେହ ପଡ଼ିଥିବାର ଦେଖିଥିଲେ ସ୍ଥାନୀୟଲୋକେ । ଏହା ଦେଖି ତୁରନ୍ତ ପୋଲିସକୁ ଖବର ଦେଇଥିଲେ । ଖବର ପାଇ ଧର୍ମଶାଳା ପୋଲିସ ଘଟଣାସ୍ଥଳରେ ପହଞ୍ଚିଥିଲା । ସେଠାରେ ପହଞ୍ଚି ଯବକଙ୍କ ମୃତଦେହକୁ ଜବତ କରିଥିଲା । ଯୁବକଙ୍କ ମୁଣ୍ଡ ଓ ମୁହଁରେ କ୍ଷତ ଚିହ୍ନ ଥିବା ସହ ଜଙ୍ଘଟି କ୍ଷତ ବିକ୍ଷତ ହୋଇଯାଇଛି ଏବଂ ସେ ଅର୍ଦ୍ଧ ଉଲଗ୍ନ ଅବସ୍ଥାରେ ସେଠାରେ ପଡ଼ିରହିଥିଲେ । ଯୁବକଙ୍କ ବେକରେ ଏକ ସୁନା ଚେନ୍‌ ମଧ୍ୟ ରହିଛି । ତେବେ ଯୁବକ ଜଣକୁ କେହି ସେଠାରେ ଫିଙ୍ଗି ଦେଇ ଚାଲି ଯାଇଥିବା ପାରିପାର୍ଶ୍ଵିକ ଅବସ୍ଥାରୁ ଅନୁମାନ କରାଯାଉଛି । ମୃତ ଯୁବକର କୌଣସି ପରିଚୟ ମିଳି ପାରିନଥିବା ବେଳେ ଘଟଣାସ୍ଥଳରେ ଧର୍ମଶାଳା ପୋଲିସ ତଦନ୍ତ ଚଳାଇଛି ।