ନୂଆଦିଲ୍ଲୀ,୧୧/୧୦: ପାହାଡ଼ ଚଢ଼ିବା ଲାଗି ନିରନ୍ତର ଅଭ୍ୟାସ ଓ କଡ଼ା ତାଲିମ ଆବଶ୍ୟକ । ସୁରକ୍ଷାତ୍ମକ ଉପାୟ ଓ ସେଫ୍ଟି ଗିୟର ଜରିଆରେ ଲୋକେ ପାହାଡ଼ ଚଢ଼ିପାରନ୍ତି । ତେବେ, ଚୀନ୍ର ଜଣେ ମହିଳା କୌଣସି ସୁରକ୍ଷାତ୍ମକ ଉପାୟ ଓ ସେଫ୍ଟି ଗିୟର ବିନା ୧୦୮ ମିଟର ଉଚ୍ଚ ପାହାଡ଼ ଚଢ଼ିବାରେ ପାରଙ୍ଗମ । କେବଳ ନିଜ ହାତ ସାହାଯ୍ୟରେ ସେ ୩୦ ମହଲା ଅଟ୍ଟାଳିକା ଭଳି ଉଚ୍ଚ ପାହାଡ଼ ଅତି ସହଜରେ ଚଢ଼ିପାରନ୍ତି । ସାଉଥ୍ ମର୍ନିଂ ଚାଇନା ପୋଷ୍ଟ୍ ଅନୁସାରେ, ଏହି ଅଦ୍ଭୁତ ପ୍ରତିଭା ପାଇଁ ତାଙ୍କୁ ‘ଚାଇନିଜ୍ ସ୍ପାଇଡର ଓମ୍ୟାନ୍’ର ଟାଇଟଲ ମିଳିଛି । ୪୩ ବର୍ଷୀୟା ଲୁଓ ଡେଙ୍ଗପିନ୍ଙ୍କର ଏହି ଅନନ୍ୟ ପ୍ରତିଭା ପଛରେ ମୃତକଙ୍କୁ ପାହାଡ଼ରେ ସମାଧି ଦେବାର ପ୍ରାଚୀନ ମିଆଓ ପ୍ରଥା ରହିଛି । ବାପାଙ୍କ ମାର୍ଗଦର୍ଶନରେ ଲୁଓ ମାତ୍ର ୧୫ ବର୍ଷ ବୟସରୁ ପାହାଡ଼ ଚଢ଼ିବା ଅଭ୍ୟାସ ଜାରି ରଖିଛନ୍ତି ।
ବର୍ତ୍ତମାନ ସେ ନିଜ ଅଞ୍ଚଳର ଏକମାତ୍ର ମହିଳା, ଯିଏକି ବିନା ସୁରକ୍ଷା ଉପକରଣରେ ପାହାଡ଼ ଚଢ଼ିବାରେ ସକ୍ଷମ । ପ୍ରାରମ୍ଭିକ ସମୟରେ ପୁଅଙ୍କ ସହ ପ୍ରତିଯୋଗିତା ଏବଂ ଜୀବିକା ନିର୍ବାହ ଲାଗି ଔଷଧୀୟ ଚେରମୂଳୀ ସଂଗ୍ରହ କରିବା ହିଁ ରକ୍ କ୍ଲାଇମ୍ବିଂ ଶିଖିବା ତାଙ୍କ ପାଇଁ ପ୍ରମୁଖ ପ୍ରେରଣାର ସ୍ରୋତ ଥିଲା । ଏକ ଗଣମାଧ୍ୟମ ସହ ବାର୍ତ୍ତାଳାପରେ ଲୁଓ ଥରେ କହିଥିଲେ, ଲୋକଙ୍କ ଧାରଣା ଯେ ରକ୍ କ୍ଲାଇମ୍ବିଂ କେବଳ ପୁଅଙ୍କ ପାଇଁ । କିନ୍ତୁ ମୋ ମତରେ, ପୁରୁଷ ଓ ମହିଳା ସମାନ । ସେଥିପାଇଁ ମୁଁ ଏହା ଶିଖିଲି । ଏହିଭଳି ଭାବେ ଜଣେ ସ୍ପାଇଡର ଓମ୍ୟାନ୍ ରୂପେ ମୋର ଯାତ୍ରା ଆରମ୍ଭ ହେଲା । ଅନେକ ପିଢ଼ି ଧରି ମିଆଓ ଲୋକେ ସୁଦୂର ଓ ପାହାଡ଼ିଆ କ୍ଷେତ୍ରରେ ରହୁଥିଲେ ଏବଂ ମୃତକଙ୍କୁ ଉଚ୍ଚ ଚଟାଣରେ ସମାଧି ଦେଉଥିଲେ । ମଧ୍ୟ-ଚୀନ୍ରେ ମାନ୍ୟତା ରହିଛି, ମୃତକଙ୍କୁ ଉଚ୍ଚ ସ୍ଥାନରେ ସମାଧି ଦେବା ଦ୍ୱାରା ସେମାନଙ୍କୁ ପୈତୃକ ମାତୃଭୂମିକୁ ଦେଖିବାର ଅନୁମତି ମିଳେ । ସମୟ ସହିତ ମିଆଓ ସମୁଦାୟ କେବଳ ହାତ ସାହାଯ୍ୟରେ ପାହାଡ଼ ଚଢ଼ିବାର କୌଶଳକୁ ଦୃଢ଼ କରିଆସୁଛନ୍ତି । ବର୍ତ୍ତମାନ ଲୁଓ ଏହି ପ୍ରତିଭାକୁ ମନୋରଞ୍ଜନରେ ରୂପାନ୍ତର କରିଛନ୍ତି । ପର୍ଯ୍ୟଟକମାନେ ତାଙ୍କୁ ସେଫ୍ଟି ଗିଅର ବିନା ପାହାଡ଼ ଚଢ଼ିବାକୁ ଅନୁରୋଧ କରନ୍ତି ଏବଂ ତାଙ୍କୁ ପାରିଶ୍ରମିକ ମଧ୍ୟ ଦିଅନ୍ତି ।
