ନୂଆଦିଲ୍ଲୀ: ଦୁନିଆରେ ଋଣ ଭାର ବଢ଼ିବାରେ ଲାଗିଛି । ପିଲାଟିଏ ଜନ୍ମ ନେବା ମାତ୍ରେ ତା ମୁଣ୍ଡ ଉପରେ ଲକ୍ଷାଧିକ ଟଙ୍କାର ଋଣ ହୋଇଯାଉଛି । ଦୁନିଆରେ ଋଣଭାର ଏତେ ଅଧିକ ହୋଇଯାଇଛି ଯେ, ଯଦି ପ୍ରତି ବ୍ୟକ୍ତିଙ୍କୁ ହିସାବକୁ ନିଆଯାଏ ତେବେ ମୁଣ୍ଡ ପିଛା ଋଣ ୧୧ ଲକ୍ଷ ଟଙ୍କାରୁ ଅଧିକ ହେବ । ଏକ ରିପୋର୍ଟ ଅନୁସାରେ, ବିଶ୍ବ ଉପରେ ମୋଟ ୧୦୨ ଟ୍ରିଲିୟନ ଡଲାର ଅର୍ଥାତ ୮,୬୭,୫୩,୯୫,୮୦,୦୦,୦୦,୦୦୧ ଟଙ୍କାର ଋଣ ରହିଛି । ଦୁନିଆରେ ମୋଟ ଜନସଂଖ୍ୟା ୮.୨ ବିଲିୟନ୍ । ବିଶ୍ବର ସବୁଠାରୁ ବଡ଼ ଅର୍ଥ ବ୍ୟବସ୍ଥା ଆମେରିକା ଉପରେ ଅଧିକ ଋଣ ରହିଥିବା ଜଣାପଡ଼ିଛି ।
ଏହା ବ୍ୟତୀତ ଚୀନ୍, ଜାପାନ, ୟୁରୋପୀୟ ଦେଶ ମଧ୍ୟ ଏହି ତାଲିକାରେ ରହିଛନ୍ତି । ସବୁଠାରୁ ବଡ଼ କଥା ଏହି ତାଲିକାରେ ସପ୍ତମ ସ୍ଥାନରେ ରହିଛି ଭାରତ । ଭାରତ ଉପରେ ୩ ଟ୍ରିଲିୟନ୍ ଡଲାରର ଋଣ ରହିଛି । ଅନ୍ତର୍ଜାତୀୟ ମୁଦ୍ରା କୋଷ (ଆଇଏମଏଫ)ର ରିପୋର୍ଟ ଅନୁସାରେ, ୨୦୨୪ରେ ବିଶ୍ବ ଉପରେ ବଢ଼ୁଥିବା ଋଣ ଚିନ୍ତା ବଢ଼ାଇ ଦେଇଛି । ଦୁନିଆର ସବୁଠାରୁ ବଡ଼ ଇକୋନୋମି ଆମେରିକା ଓ ଚୀନ୍ ଉପରେ ଋଣ ଭାର ଅଧିକ ବୃଦ୍ଧି ପାଇଛି । ବିଶ୍ବର ଋଣ ଭାର ମୋଟ ଜିଡିପିର ୯୩ ପ୍ରତିଶତ ପର୍ଯ୍ୟନ୍ତ ପହଞ୍ଚିସାରିଛି ।
ଅନେକ ଦେଶ ନିଜ ଜିଡିପିରୁ ଅଧିକ ଋଣ ନେଇଛନ୍ତି । ବିଶ୍ବରେ ମୋଟ ଜନସଂଖ୍ୟା ୮୨୦ କୋଟି ଥିବା ବେଳେ ପ୍ରତି ବ୍ୟକ୍ତିଙ୍କ ମୁଣ୍ଡ ଉପରେ ଋଣ ୧୧ ଲକ୍ଷ ଟଙ୍କା । ତେବେ ଏହି ତଥ୍ୟରେ ପରିବର୍ତ୍ତନ ହୋଇପାରେ । କାରଣ ବିଶ୍ବ ଜନସଂଖ୍ୟାର ସଠିକ ଆକଳନ କରିବା ଏତେ ସହଜ ବ୍ୟାପାର ନୁହେଁ ।
$102 Trillion Global Debt in 2024
— World of Statistics (@stats_feed) December 19, 2024
% of world total debt:
🇺🇸 United States: 34.6%
🇨🇳 China: 16.1%
🇯🇵 Japan: 10.0%
🇬🇧 United Kingdom: 3.6%
🇫🇷 France: 3.5%
🇮🇹 Italy: 3.2%
🇮🇳 India: 3.2%
🇩🇪 Germany: 2.9%
🇨🇦 Canada: 2.3%
🇧🇷 Brazil: 1.9%
🇪🇸 Spain: 1.7%
🇲🇽 Mexico: 1.0%
🇰🇷 South Korea:…
ସେପଟେ ଭାରତ କଥା କହିଲେ, ଋଣ ମାମଲାରେ ଆମ ଦେଶ ସପ୍ତମ ସ୍ଥାନରେ ରହିଛି । ଦୁନିଆର ପଞ୍ଚମ ବଡ଼ ଅର୍ଥନୀତି ଭାରତ ଉପରେ ୩.୦୫୭ ଟ୍ରିଲିୟନ ଡଲାରର ଋଣ ରହିଛି । ଭାରତର ମୋଟ ଜିଡିପି ୩.୭ ଟ୍ରିଲିୟନ ଡଲାର । ଯଦିଓ ଜିଡିପି ଠାରୁ ଋଣ କମ୍ ଅଛି, କିନ୍ତୁ ଭାରତ ଭଳି ବିକାଶଶୀଳ ଦେଶ ଲାଗି ଏହା ଭୟଙ୍କର ସାବ୍ୟସ୍ତ ହୋଇପାରେ । ସେହିଭଳି ବିଶ୍ବର ମୋଟ ଋଣରେ ଭାରତର ଭାଗିଦାରୀ ୩.୨ ପ୍ରତିଶତ ରହିଛି । ଅନ୍ୟପଟେ ଇରାକ, ଚିଲି, ଚେକ୍ ଗଣରାଜ୍ୟ, ହଙ୍ଗେରି, ୟୁଏଇ, ବାଂଲାଦେଶ, ୟୁକ୍ରେନ, ତାଇଓ୍ବାନ, ରୋମାନିଆ, ନରଓ୍ବେ, ସ୍ବିଡେନ, କଲୋମ୍ବିଆ, ଆୟର୍ଲାଣ୍ଡ ଏବଂ ଫିନଲ୍ୟାଣ୍ଡ ଉପରେ ଖୁବ କମ୍ ଋଣ ରହିଥିବା ଜଣାପଡ଼ିଛି । ଭାରତର ପଡ଼ୋଶୀ ପାକିସ୍ତାନର ଋଣ ଭାର କିଛି କମ ନାହିଁ। ବିଶ୍ବର ମୋଟ ଋଣର ୦.୩ ପ୍ରତିଶତ ଋଣ ପାକିସ୍ତାନ ମୁଣ୍ଡ ଉପରେ ରହିଛି ।
