ଭୁବନେଶ୍ଵର,୨୬/୦୭ : ଶୁକ୍ରବାର ଖାଦ୍ୟ ଯୋଗାଣ ଓ ଖାଉଟି କଲ୍ୟାଣ ମନ୍ତ୍ରୀ କୃଷ୍ଣଚନ୍ଦ୍ର ପାତ୍ର ଆଳୁ ଗୋଦାମରେ ଚଢାଉ କରିଛନ୍ତି । ଆଇଗିଣିଆସ୍ଥିତ କୁବେରପୁରୀ ପରିବା ମଣ୍ଡି ପରିଦର୍ଶନ କରିଛନ୍ତି ଯୋଗାଣ ମନ୍ତ୍ରୀ । ଭୁବନେଶ୍ୱରର ବିଭିନ୍ନ ହୋଲସେଲ , ଆଳୁ  ଓ  ପରିବା ଗୋଦାମ  ଶୀତଳ ଭଣ୍ଡାର ପରିଦର୍ଶନ କରିବାର ସହ ଷ୍ଟକ୍ ଯାଞ୍ଚ କରାଯାଇଛି । ବିଶେଷ ଭାବେ ଆଳୁ ଶୀତଳ ଭଣ୍ଡାର ଯାଞ୍ଚ କରିଛନ୍ତି । ପଶ୍ଚିମବଙ୍ଗରୁ ଓଡିଶାକୁ ଆଳୁ ଆସି ପାରୁ ନଥିବା ହେତୁ ଏଭଳି ସ୍ଥିତି ଉପୁଜିଛି ।

ସୂଚନା ଅନୁଯାୟୀ, ପଶ୍ଚିମବଙ୍ଗରୁ ଓଡିଶାକୁ ଆଳୁ ଆସୁନଥିବାରୁ କିଛି ବ୍ୟବସାୟୀ  ଚଢା ଦରରେ ଆଳୁ ବିକ୍ରି କରୁଛନ୍ତି । ମନ୍ତ୍ରୀଙ୍କ କହିବା ଅନୁଯାୟୀ ଏବେ ଓଡିଶାରେ ଆଳୁ ମହଜୁଦ୍ ଅଛି ଏବଂ ଏହା ଆଉ କିଛି ଦିନ ଯିବ । ତେବେ ଅଧିକା ଦରରେ ବିକ୍ରି କରୁଥିବା  ବ୍ୟବସାୟୀ ବିରୋଧରେ ଜର୍ଯ୍ୟାନୁଷ୍ଠାନ ନିଆଯିବ ବୋଲି କହିଛନ୍ତି ମନ୍ତ୍ରୀ । କିଣା ଦରରୁ ସର୍ବାଧିକ  ୫ ଟଙ୍କା ଲାଭ କରି  ବିକି ପାରିବେ । ତେବେ ଏପରି ସ୍ଥିତିରେ ଉତ୍ତରପ୍ରଦେଶରୁ ଆଳୁ ଆଣିବାକୁ ବ୍ୟବସ୍ଥା କରାଯାଉଥିବା ନେଇ ସୂଚନା ଦେଇଛନ୍ତି ।

ଅନ୍ୟପଟେ ଏହି ଆଳୁ ଦର ବଢିବା ନେଇ ପୂର୍ବ ସରକାରକୁ ଦୋଷ ଦେଇଛନ୍ତି ଯୋଗାଣ ମନ୍ତ୍ରୀ । ଆଳୁ ଏବଂ ପିଆଜ ପାଇଁ  ଓଡିଶାରେ ପର୍ଯ୍ୟାପ୍ତ ଶୀତଳ ଭଣ୍ଡାର ନାହିଁ । ପୂର୍ବ ସରାକାରଙ୍କ ଆଳୁ ମିଶନ ଫେଲ୍ ମାରିଲା ବୋଲି କହିଛନ୍ତି । ପରେ ପରିବା ମଣ୍ଡି ପରିଦର୍ଶନ କରି କିଣା ଦର ସହ ବିକ୍ରି ଦରର ମେଳ କରାଇଛନ୍ତି । ଏହି ସମୟରେ ୨୭ ଟଙ୍କା ଦରରେ ୫ କିଲୋ ଆଳୁ କିଣିଛନ୍ତି ଖାଦ୍ୟ ଯୋଗାଣ ଓ ଖାଉଟି କଲ୍ୟାଣ ମନ୍ତ୍ରୀ  କୃଷ୍ଣଚନ୍ଦ୍ର ପାତ୍ର ।