ବାଲେଶ୍ଵର, ୨୮/୬ : ଆବାସିକ ବିଦ୍ୟାଳୟର ପାଣି ଟାଙ୍କି ଭୁଶୁଡ଼ି ଛାତ୍ର ମୃତ। ବାଲେଶ୍ଵର ଜିଲ୍ଲା ଚାନ୍ଦିପୁର ଥାନା ପଦମପୁର ସ୍ଥିତ ବାଞ୍ଛାନିଧି ଇଂଲିଶ ମିଡିୟମ ରେଶିଡେନସାଲ ସ୍କୁଲ (ଆବାସିକ ବିଦ୍ୟାଳୟ)ର ଏଭଳି ଅଭାବନୀୟ ଘଟଣା ଘଟିଛି। ପାଣି ଟାଙ୍କି ଭୁଶୁଡ଼ି ଜଣେ ୧୦ ବର୍ଷର ଛାତ୍ରର ମୃତ୍ୟୁ ହୋଇଛି। ମୃତ ଛାତ୍ର ଜଣକ ହେଲେ ନାରାୟଣ ଟୁଡୁ।
ସୂଚନାନୁଯାୟୀ, ଶୁକ୍ରବାର ସକାଳ ୭ଟା ସମୟରେ ଛାତ୍ର ନାରାୟଣ ଖାଇସାରି ହାତ ଧୋଇବାକୁ ଯାଇଥିଲେ। ଏହି ସମୟରେ ଛାତରେ ଥିବା ପାଣି ଟାଙ୍କି ଭୁଶୁଡ଼ି ନାରାୟଣଙ୍କ ଉପରେ ପଡ଼ିଥିଲା। ତାଙ୍କୁ ଗୁରୁତର ଅବସ୍ଥାରେ ବିଦ୍ୟାଳୟ କର୍ତ୍ତୃପକ୍ଷ ଜିଲ୍ଲା ମୁଖ୍ୟ ଚିକିତ୍ସାଳୟକୁ ନେଇଥିଲେ। ସେଠାରେ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ। ଶିଶୁଟିର ଘର ଖୋର୍ଦ୍ଧା ଜିଲ୍ଲା ବାରଙ୍ଗ ବୋଲି ଜଣାପଡିଛି। ଏହି ଘଟଣା ପରେ ଜିଲ୍ଲାପାଳ ତଦନ୍ତ ନିର୍ଦ୍ଦେଶ ଦେଇଛନ୍ତି। ଅତିରିକ୍ତ ଜିଲ୍ଲାପାଳ ଘଟଣାର ତଦନ୍ତ କରିବେ।