ଭୁବନେଶ୍ଵର, ୧୮/୧୦ : ଦିପାବଳୀ ସୁଦ୍ଧା ଘୋଷଣା ହୋଇପାରେ ନୂଆ ପିସିସି ସଭାପତିଙ୍କ ନାଁ। ୨୫ ପରେ ଓଡ଼ିଶା ଆସିବେ ଛତିଶଗଡ଼ ବିରୋଧୀ ଦଳ ନେତା ଚରଣ ଦାସ ମହନ୍ତ ଓ ରାହୁଲ ଗାନ୍ଧୀଙ୍କ କୋର୍ ଟିମ୍ରେ କାମ କରୁଥିବା ମୀନାଖି ନଟରାଜନ। ପିସିସି ସଭାପତି ବାଛିବାକୁ ଏହି ଦୁଇ ଜଣଙ୍କୁ ଦାୟିତ୍ଵ ଦିଆଯାଇଛି । ସେମାନେ ଦୁଇ ଦିନ ଓଡ଼ିଶାରେ ରହିବେ। ଦଳର ବରିଷ୍ଠ ନେତା, ପୂର୍ବତନ ସାଂସଦ, ବିଧାୟକ ଓ କର୍ମକର୍ତ୍ତାଙ୍କ ସହ ଆଲୋଚନା କରିବେ। ହାଇକମାଣ୍ଡଙ୍କୁ ସଙ୍ଗଠନ ଓ ନେତୃତ୍ୱ ବାବଦରେ ରିପୋର୍ଟ ଦେବେ।
ପ୍ରକାଶ ଥାଉକି, ଓଡ଼ିଶାରେ ପ୍ରଦେଶ କଂଗ୍ରେସ କମିଟି (ପିସିସି) ସମେତ ଅନ୍ୟ ସମସ୍ତ କମିଟି ଭାଙ୍ଗିବାକୁ ୮୭ ଦିନ ବିତିଲାଣି। ରାଜ୍ୟରେ କଂଗ୍ରେସର କାର୍ଯ୍ୟକ୍ରମ ଏକ ପ୍ରକାର ଠପ୍ ହୋଇଯାଇଛି । କାଁ ଭାଁ ଛାତ୍ର ଓ ଯୁବନେତାମାନେ ବିଭିନ୍ନ କାର୍ଯ୍ୟକ୍ରମ ମାଧ୍ୟମରେ କଂଗ୍ରେସକୁ ବଞ୍ଚାଇ ରଖିଛନ୍ତି । କଂଗ୍ରେସର ବଡ଼ ନେତାମାନେ କେବଳ ଏଆଇସିସିର ନିର୍ଦ୍ଦେଶ ପାଇବା ପରେ ହିଁ ହାତଗଣତି କିଛି କାର୍ଯ୍ୟକ୍ରମ କରିଛନ୍ତି । ଏଭଳି ଅଚଳାବସ୍ଥା ବେଳେ ରାଜ୍ୟ କଂଗ୍ରେସର ବହୁ ନେତା କଂଗ୍ରେସ ଅଧ୍ୟକ୍ଷ ମଲ୍ଲିକାର୍ଜୁନ ଖଡ଼ଗେ ଓ ପୂର୍ବତନ ଅଧ୍ୟକ୍ଷ ରାହୁଲ ଗାନ୍ଧୀଙ୍କୁ ବି ଚିଠି ଲେଖିଛନ୍ତି । ଫଳରେ ଏଆଇସିସି ନିଦ ଭାଙ୍ଗିଛି । ତେଣୁ ପିସିସି ଗଠନ ପାଇଁ ପ୍ରକ୍ରିୟା ଆରମ୍ଭ କରିଛି ଏଆଇସିସି । ଛତିଶଗଡ଼ ବିଧାନସଭାରେ ବିରୋଧୀ ଦଳ ନେତା ତଥା ପୂର୍ବତନ ବାଚସ୍ପତି ଓ ପୂର୍ବତନ କେନ୍ଦ୍ରମନ୍ତ୍ରୀ ଚରଣଦାସ ମହନ୍ତଙ୍କୁ ଓଡ଼ିଶା କଂଗ୍ରେସ ସଜାଡ଼ିବା ଦାୟିତ୍ୱ ଦିଆଯାଇଛି । ସେ ତୁରନ୍ତ ଓଡ଼ିଶା ଗସ୍ତ କରିବେ । ଗସ୍ତ ସମୟରେ ରାଜ୍ୟ କଂଗ୍ରେସର ବିଭିନ୍ନ ନେତା ଓ ସାଧାରଣ ଲୋକଙ୍କୁ କଂଗ୍ରେସ ସମ୍ପର୍କରେ ପଚାରି ବୁଝିବେ । କିଏ କଂଗ୍ରେସର ନେତୃତ୍ୱ ନେଲେ ଓଡ଼ିଶାରେ କଂଗ୍ରେସ ଭଲ କରିବ ତାହା ଜାଣିବେ । ଏହା ସହିତ ଗତ ଦିନମାନଙ୍କରେ କଂଗ୍ରେସର ସାଙ୍ଗଠନିକ ସ୍ଥିତି, କ’ଣ କଲେ ଆହୁରି ଭଲ ହୋଇପାରିବ ସେ ନେଇ ବିସ୍ତୃତ ଭାବେ ସାଙ୍ଗଠନିକ ବ୍ୟାପାର ରିପୋର୍ଟ ଏଆଇସିସିକୁ ପ୍ରଦାନ କରିବେ।
ଏହି କାର୍ଯ୍ୟରେ ଛାତ୍ର କଂଗ୍ରେସର ପୂର୍ବତନ ରାଷ୍ଟ୍ରୀୟ ସଭାପତି ତଥା ସାଧାରଣ ନିର୍ବାଚନ ସମୟରେ ପ୍ରଭାରୀ ଦାୟିତ୍ୱରେ ଥିବା ମୀନାକ୍ଷୀ ନଟରାଜନ ମଧ୍ୟ ଏହି କାର୍ଯ୍ୟରେ ଚରଣଦାସଙ୍କୁ କରିବେ ସହାୟତା । ଏ ବାବଦରେ ଏଆଇସିସି ସାଧାରଣ ସମ୍ପାଦକ କେ. ସି. ଭେନୁଗୋପାଳ ଚରଣଦାସଙ୍କୁ ଚିଠି ଲେଖି ସୂଚିତ କରିଛନ୍ତି । ଏ ଦିଗରେ ଯେତେ ଶୀଘ୍ର ସମ୍ଭବ ପଦକ୍ଷେପ ନେବାକୁ ଅନୁରୋଧ କରିଛନ୍ତି। ଏ ସମ୍ପର୍କରେ ପ୍ରଭାରୀ ଡ. ଅଜୟ କୁମାରଙ୍କୁ ମଧ୍ୟ ଅବଗତ କରାଇଛନ୍ତି । ତେବେ ଅଜୟ କୁମାର ନିଜେ ଝାଡ଼ଖଣ୍ଡରେ ନିର୍ବାଚନ ଲଢ଼ୁଥିବାରୁ ସେ ସମୟ ଦେବା ନେଇ ଆଶା କ୍ଷୀଣ । ତେଣୁ ଚରଣଦାସଙ୍କୁ ଏଆଇସିସି ଦାୟିତ୍ୱ ଦେବା ସହ ଶୀଘ୍ର ପଦକ୍ଷେପ ନେବ ବୋଲି ସୂଚନା ମିଳିଛି । ଦୁଇରୁ ତିନିଦିନ ମଧ୍ୟରେ ସେ ଓଡ଼ିଶା ଆସିବେ ବୋଲି ବରିଷ୍ଠ କଂଗ୍ରେସ ନେତା ସୂଚନା ଦେଇଛନ୍ତି ।