ଭୁବନେଶ୍ୱର, ୧୮/୧୦ : ଆଳୁ ମିଶନ ଉପରେ ଗୁରୁତ୍ୱ ଦେଉଛନ୍ତି ରାଜ୍ୟ ସରକାର । ୨୦୨୪-୨୫ ରବି ଫସଲ ଲାଗି ରାଜ୍ୟରେ ୧୪,୪୨୩ ହେକ୍ଟର ଜମିରେ ଆଳୁ ଚାଷ ପାଇଁ ଲକ୍ଷ୍ୟ ରଖିଛନ୍ତି ରାଜ୍ୟ ସରକାର । ଏଥିପାଇଁ ୧ ଲକ୍ଷ ୮୭ ହଜାର ୫୦୦ କ୍ୱିଣ୍ଟାଲ ବିହନ ଆବଶ୍ୟକ । କିନ୍ତୁ ଜିଲ୍ଲାୱାରୀ ଉଦ୍ୟାନ ଉପନିର୍ଦ୍ଦେଶକଙ୍କ ହିସାବ ଅନୁଯାୟୀ ମୋଟ ୧ ଲକ୍ଷ ୮୨ ହଜାର ୫ ଶହ ୫୯ କ୍ୱିଣ୍ଟାଲ୍ ବିହନ ଆବଶ୍ୟକ କରୁଛି ରାଜ୍ୟ । ଯାହାକୁ ପ୍ରତି ଜିଲ୍ଲାରେ ନଭେମ୍ବର ଦ୍ୱିତୀୟ ସପ୍ତାହ ସୁଦ୍ଧା ବଣ୍ଟନ କରାଯିବାକୁ ସମୟ ଧାର୍ଯ୍ୟ କରାଯାଇଛି । ସମୁଦାୟ ୧ ଲକ୍ଷ ୫୫ ହଜାର ୨୦୭ କ୍ୱିଣ୍ଟାଲ୍ ଆଳୁ ବିହନ ଲାଗି ରାଜ୍ୟ ବିହନ ନିଗମ ଅର୍ଡର ଦେଇଛି । ୩୦ ଜିଲ୍ଲାକୁ ୧ ଲକ୍ଷ ୮୨ ହଜାର ୫ ଶହ ୫୯ କ୍ୱିଣ୍ଟାଲ ବିହନ ଆବଶ୍ୟକ ଥିବା ବେଳେ ବାକି ୨୭,୩୫୨ କ୍ୱିଣ୍ଟାଲ ବିହନ କେଉଁଠୁ ଆସିବ ବୋଲି ପ୍ରଶ୍ନ ଉଠିଛି ।
କୃଷି ଓ କୃଷକ ସଶକ୍ତୀକରଣ ବିଭାଗ ପକ୍ଷରୁ ମିଳିଥିବା ସଦ୍ୟତମ ତଥ୍ୟ ଅନୁସାରେ, ୩ଟି ଏଜେନ୍ସିକୁ ନ୍ୟାସନାଲ୍ ସିଡ୍ କର୍ପୋରେସନ, ଧୀରାଜ ଫାର୍ମସ୍ ଏବଂ ଏଚଆଇଏଲ୍(ଇଣ୍ଡିଆ) ଲିମିଟେଡକୁ ଆଳୁ ବିହନ ଯୋଗାଣର ଦାୟିତ୍ୱ ଦିଆଯାଇଛି । ଉନ୍ନତ ମାନର ଆଳୁ ବିହନ ଯୋଗାଣ ଉପରେ ଗୁରୁତ୍ୱ ଦେଉଛନ୍ତି ରାଜ୍ୟ ସରକାର । ଏଥିଲାଗି ବିହନ ଏବଂ ଏହାର ଉତ୍ସକୁ ମଧ୍ୟ ଯାଞ୍ଚ କରାଯାଉଛି ।
ଏହି ପରିପ୍ରେକ୍ଷୀରେ କୃଷି ବିଭାଗ ଅବସରପ୍ରାପ୍ତ ଯୁଗ୍ମ ନିର୍ଦ୍ଦେଶକ ଅମେରେଶ୍ୱର ମିଶ୍ର କହିଛନ୍ତି, ଆମ ରାଜ୍ୟକୁ ୯୦ ଦିନିଆ ଅମଳ ଉପଯୋଗୀ ବିହନ ଆବଶ୍ୟକ । କିନ୍ତୁ କେଉଁ କିସମର ଆଳୁ ବିହନ ଯୋଗାଇ ଦିଆଯାଉଛି ତାକୁ ନେଇ କୈଣସି ସରକାରୀ ତଥ୍ୟ ନାହିଁ । ରିପୋର୍ଟରେ ଆଳୁ ବିହନର କିସମ ଦର୍ଶାଇବାକୁ ଶ୍ରୀ ମିଶ୍ର ଅନୁରୋଧ କରିଛନ୍ତି । ଆଗାମୀ ୨-୩ ବର୍ଷ ଭିତରେ ଆଳୁ ଉତ୍ପାଦନରେ ଆତ୍ମନିର୍ଭର ହେବ ରାଜ୍ୟ । ଆସନ୍ତାବର୍ଷରୁ ଆଳୁ ଚାଷର କ୍ଷେତ୍ର ବୃଦ୍ଧି ହେବା ସହ ଉନ୍ନତ ମାନର ଆଳୁ ବିହନ ସଠିକ ସମୟରେ ଚାଷୀଙ୍କ ପାଖରେ ପହଞ୍ଚିବ । ଆଉ ବିହନ ଲାଗି ପଞ୍ଜାବ କିମ୍ବା ଆଳୁ ଲାଗି ୟୁପି ଏବଂ ପଶ୍ଚିମବଙ୍ଗ ଉପରେ ନିର୍ଭର ହେବାକୁ ପଡ଼ିବନି ବୋଲି କହିଛନ୍ତି ଯୁବ କୃଷି ବିଶେଷଜ୍ଞ ଅବିନାଶ ମହାନ୍ତି ।
