ବାଲିଗୁଡା, ୧୮/୧୦: କିଡ୍ନୀ ଚେରି ଅଭିଯୋଗ ପରେ ଗାଁ ମଶାଣିରୁ କବର ଖୋଳି କଢାହେଲା ମୃତଦେହ । କଫିନରୁ ବାହାରିଲା ମୃତ ଦେହ । ପୋଲିସ,ମାଜିଷ୍ଟ୍ରେଟଙ୍କ ଉପସ୍ଥିତିରେ ଗ୍ରାମବାସୀ ଖୋଳିଲେ ଶବ । କନ୍ଧମାଳ ଜିଲ୍ଲା ବାଲିଗୁଡା ଥାନା ଅନ୍ତର୍ଗତ ସୁଡ୍ରା ଗ୍ରାମ ପଞ୍ଚାୟତର ଟିକରପାଜୁ ଗାଁରେ ଏଭଳି ଘଟଣା ଦେଖିବାକୁ ମିଳିଛି ।
ସୂଚନା ମୁତାବକ, ଚଳିତ ମାସ ୧୩ ତାରିଖରେ ବାବୁଲା ଡିଗାଲ ତୁମୁଡିବନ୍ଧ ନିକଟସ୍ଥ ଡଡ଼ଙ୍ଗ ଘାଟିରେ ସଡ଼କ ଦୁର୍ଘଟଣାରେ ଗୁରତର ହୋଇ ପ୍ରଥମେ ବାଲିଗୁଡା ମେଡିକାଲ ପରେ ଫୁଲବାଣୀ ମୁଖ୍ୟ ଚିକିତ୍ସାଳୟ ରେ ଚିକିତ୍ସାପାଇଁ ଭର୍ତ୍ତି ହୋଇଥିଲେ । ତାଙ୍କ ସ୍ୱାସ୍ଥ୍ୟାବସ୍ଥା ଗୁରୁତର ହେବାରୁ ଡାକ୍ତର ଭୁବନେଶ୍ୱର ସ୍ଥିତ ଏମ୍ସ ମେଡିକାଲକୁ ରେଫର୍ କରିଥିଲେ । ମେଡିକାଲରେ ଷ୍ଟ୍ରାଇକ ଯୋଗୁଁ ଭୁବନେଶ୍ୱରର ଏକ ବ୍ରୋକର୍ ଭୁବନେଶ୍ୱରର ରୁଦ୍ର ନାମକ ଏକ ଘରୋଇ ମେଡିକାଲରେ ଚିକିତ୍ସା ପାଇଁ ପରିବାର ଲୋକଙ୍କୁ ନେଇ ଯାଇଥିଲେ । ଅପରେସନ ହେବ କହି ରୋଗୀଙ୍କ ସମ୍ପର୍କୀୟଙ୍କୁ ଏକ ଲକ୍ଷ ଟଙ୍କା ଦାବି କରିଥିଲେ । ତେବେ ବାବୁଲା ଡିଗାଲଙ୍କ ମୃତ୍ୟୁ ଘଟିଥିବା ବେଳେ ଅପରେସନ୍ ସଫଳ ହୋଇଥିବା କଥା ମେଡିକାଲ ପକ୍ଷରୁ କୁହାଯାଇଥିଲା ।
ପରେ ପରିବାର ଲୋକେ ପେଟ ନିକଟରେ କଟା ହୋଇଥିବା ଦେଖି କିଡ୍ନୀ ଚୋରି ହୋଇଥିବା ସନ୍ଦେହ କରି ବାଲିଗୁଡା ଥାନାରେ ଲିଖିତ ଅଭିଯୋଗ କରିଥିଲେ । ଏହି ଘଟଣାରେ ବାଲିଗୁଡା ଥାନା ପୋଲିସ ଏକ ମାମଲା ରୁଜୁ କରିଛି । ଥାନା ଅଧିକାରୀ ସୁଶାନ୍ତ କୁମାର ସାହୁ, ଏଏସଆଇ ଯୁଗଳ ନାୟକ ଟିକରପାଜୁ ଗାଁକୁ ଯାଇ ମାଜିଷ୍ଟ୍ରେଟ ହରେକୃଷ୍ଣ ରାଉତଙ୍କ ଉପସ୍ଥିତିରେ ମଶାଣିରୁ ଶବଖୋଳି ଜବତ କରି ବ୍ୟବଚ୍ଛେଦ ନିମନ୍ତେ ବାଲିଗୁଡା ଉପଖଣ୍ଡ ମେଡିକାଲକୁ ପଠାଇଛି । ଏହା ସହ ଘଟଣାର ତଦନ୍ତ ମଧ୍ୟ ଜାରି ରଖିଛନ୍ତି । ଏହିଭଳି ଅମାନବୀୟ କାମ କରିଥିବା ରୁଦ୍ର ମେଡିକାଲ ବିରୋଧରେ କଡା କାର୍ଯାନୁଷ୍ଠାନ ନେବା ସହିତ କ୍ଷତି ପୂରଣ ଦେବାକୁ ପରିବାର ଲୋକ ସମେତ ଗ୍ରାମବାସୀ ଦାବି କରିଛନ୍ତି ।
