ବାଲିଗୁଡା,୦୩/୧୦: ଦୁର୍ଗlପାଙ୍ଗା ଗ୍ରାମ ପଞ୍ଚାୟତରେ ଝାଡାବାନ୍ତିର ଆତଙ୍କ । ଦୁର୍ଗମ ଇଲାକା କାଣିବାରୁ, ସିନ୍ଧିବାଲି, ବାଡ଼ିପାଙ୍ଗା, ସାକାରଯୋଡି ଭଳି ସାତ ଖଣ୍ଡ ଗାଁରେ ପାଞ୍ଚ ଦିନ ଭିତରେ ସରକାରୀ ରିପୋର୍ଟ ଅନୁଯାୟୀ ୬ ଜଣ ମୃତ୍ୟୁ ବରଣ କରିଥିବାବେଳେ ବେସରକାରୀ ଭାବେ ୧୨ ଜଣ ଝାଡାବାନ୍ତିରେ ଆକ୍ରାନ୍ତ ହୋଇ ମୃତ୍ୟୁ ବରଣ କରିଥିବା ଅଭିଯୋଗ ହୋଇଛି । ଏହା ସହ ୧୫ରୁ ଉର୍ଦ୍ଧ୍ୱ ଆକ୍ରାନ୍ତ ହୋଇଥିବା ଜଣାପଡ଼ିଛି । କନ୍ଧମାଳ ଜିଲ୍ଲା କୋଟଗଡ଼ ବ୍ଲକ ଅନ୍ତର୍ଗତ ଦୁର୍ଗlପାଙ୍ଗା ଗ୍ରାମ ପଞ୍ଚାୟତରେ ଏଭଳି ଘଟଣା ଘଟିଛି । 

ସୂଚନା ମୁତାବକ, କିଛିଦିନ ହେବ ଦୁର୍ଗାପାଙ୍ଗା ଗ୍ରାମ ପଞ୍ଚାୟତର ଦୁର୍ଗମ ଇଲାକା କାଣିବାରୁ, ସିନ୍ଧିବାଲି, ବାଡ଼ିପାଙ୍ଗା,ସାକାରଯୋଡି ଭଳି ସାତ ଖଣ୍ଡ ଗାଁରେ ପାଞ୍ଚ ଦିନ ଭିତରେ ୬ ଜଣଙ୍କ ଜୀବନ ନେଲlଣି ଝାଡ଼ାବାନ୍ତି । ସଚେତନତା ଅଭାବରୁ ସମ୍ପୃକ୍ତ ଗ୍ରାମବାସୀ ଅଖାଦ୍ୟ ଖାଇ ଏବଂ ଦୂଷିତ ଜଳ ବ୍ୟବହାର କରି ଝାଡାବାନ୍ତି ରୋଗରେ ଆକ୍ରାନ୍ତ ହେଉଛନ୍ତି । ଧୀରେ ଧୀରେ ଏହା ମହାମାରୀର ରୂପ ନେଲାଣି l ଗାଁକୁ ରାସ୍ତା ନଥିବାରୁ ଆମ୍ବୁଲାନ୍ସ ଯାଇ ପାରୁନି । ଫଳରେ ମୃତ୍ୟୁ ସଂଖ୍ୟା ବଢିବାରେ ଲାଗିଛି । 

ପ୍ରଶାସନ ପକ୍ଷରୁ ଲୋକଙ୍କୁ ସଚେତନତା କାର୍ଯ୍ୟକ୍ରମ କରାଯାଉ ନଥିବାରୁ ଲୋକେ ଗୁଣି ଗାରେଡିର ସାହାରା ନେଉଛନ୍ତି l ଲୋକଙ୍କୁ ସ୍ୱାସ୍ଥ୍ୟସେବା ଯୋଗାଇ ଦେବାକୁ ଗାଁରେ ପହଞ୍ଚିଛି ଜିଲ୍ଲା ସ୍ୱାସ୍ଥ୍ୟ ଅଧିକାରୀଙ୍କ ଡାକ୍ତରୀ ଟିମ l ଜିଲ୍ଲା ସ୍ୱାସ୍ଥ୍ୟ ଅଧିକାରୀ ଡାକ୍ତର ବିଜୟ କୁମାର ପଣ୍ଡା, ଡାକ୍ତର ପ୍ରସନ୍ନ ତ୍ରିପାଠୀ, ବି. ପି. ଏମ ଶାନ୍ତନୁ କୁମାର ସାହୁ ପାହାଡ଼ ପର୍ବତ ଚଢି ଗାଁରେ ପହଞ୍ଚି ରୋଗର କାରଣ ଖୋଜି ବାହାର କରିଛନ୍ତି l କୋଟଗଡ ଜିଲ୍ଲା ପରିଷଦ ଜିରିମୟ ସୁନାମାଝି ଓ କନ୍ଧମାଳ ସାଂସଦ ପ୍ରତିନିଧି ସୋନୁ ପ୍ରଧାନଙ୍କ ଏକ ଟିମ ଲୋକଙ୍କୁ ସାହାଯ୍ୟ ସହଯୋଗ କରୁଥିବା ଜଣାପଡିଛି l