ଦାରିଙ୍ଗବାଡି,୧୧/୧୦ : ବେଆଇନ ପଥର ବ୍ଲାଷ୍ଟିଙ୍ଗ ସହ ବେଆଇନ ପଥର ଖାଦାନ ଫଳରେ ସରକାରଙ୍କ ଲକ୍ଷାଧିକ ଟଙ୍କାର ରାଜସ୍ବ କ୍ଷତି ହେଉଥିବା ଦେଖିବାକୁ ମିଳିଛି । ଏଭଳି କିଛି ଦେଖିବାକୁ ମିଳିଛି ଦାରିଙ୍ଗବାଡି ଥାନା ଅନ୍ତର୍ଗତ ପର୍ତମାହା ପଞ୍ଚାୟତର ଡ଼ଲାବାଡ଼ି ଗ୍ରାମରେ । ଉକ୍ତ ଗ୍ରାମରେ ରହିଥିବା ପାହାଡ଼ରେ ବେଆଇନ ଭାବେ ପଥର ଖାଦାନ କରିବା ସହ ପଥର ବ୍ଲାଷ୍ଟିଙ୍ଗ କରାଯାଉଥିବା ଦେଖିବାକୁ ମିଳିଛି । ପଥର ଖାଦାନ ପାଇଁ ଖଣି ବିଭାଗ ପକ୍ଷରୁ କୌଣସି ଅନୁମତି ଅଣା ଯାଇନଥିବାବେଳେ ବ୍ଲାଷ୍ଟିଙ୍ଗ ପାଇଁ ଜିଲ୍ଲାପାଳଙ୍କ କାର୍ଯ୍ୟାଳୟ ପକ୍ଷରୁ କୌଣସି ଅନୁମତି ଅଣାଯାଇନାହିଁ । ହେଲେ ବଡ଼ ବଡ଼ ଚାଞ୍ଚାଡ଼ା ପଥର ବ୍ଲାଷ୍ଟିଙ୍ଗ କରାଯାଉଛି ।
ଏଭଳି କି ଆଉ କିଛି ପଥର ବ୍ଲାଷ୍ଟିଙ୍ଗ ପାଇଁ ଗର୍ତ୍ତ ମଧ୍ୟ କରାସରିଛି । ଉକ୍ତ ପାହାଡ଼ର ୩୦୦ ମିଟର ଦୂରରେ ଏକାଧିକ ଘର ରହିଥିବାବେଳେ ପଥର ଉଡ଼ି ଆସି ଘର ଉପରେ ପଡ଼ିବାର ମଧ୍ୟ ଭୟ ରହିଛି । ହେଲେ ଏଭଳି ବେଆଇନ କାର୍ଯ୍ୟ ଚାଲିଥିଲେ ସୁଧା ସ୍ଥାନୀୟ ପ୍ରଶାସନ କିଭଳି ଜାଣି ପାରୁନାହିଁ ନା ସବୁ ଜାଣି ନଜାଣିବାର ଅଭିନୟ କରୁଛି ସେନେଇ ଅଞ୍ଚଳବାସୀ ପ୍ରଶ୍ନ କରିଛନ୍ତି । ଏଭଳି ବେଆଇନ କାର୍ଯ୍ୟ ଯୋଗୁଁ ସରକାରଙ୍କ ଲକ୍ଷାଧିକ ଟଙ୍କାର ରାଜସ୍ବ କ୍ଷତି ହେଉଛି । ହେଲେ ଠିକାଦାର ମାଲେମାଲ ହେଉଛନ୍ତି । ଏ ନେଇ ଠିକାଦାରଙ୍କୁ ପଚାରିବାରୁ ସେ କହିଲେ ସ୍ଥାନୀୟ ପ୍ରଶାସନ ସହ କଥା ହୋଇ କାମ କରୁଛୁ । କୌଣସି ଅନୁମତି ନେଇନୁ ବୋଲି କହିଥିଲେ । ଏଥିରୁ ସ୍ପଷ୍ଟ ଜଣାପଡୁଛି କି ସ୍ଥାନୀୟ ପ୍ରଶାସନ ସହ ସଲା ସୁତରା ହୋଇ ବେଆଇନ କାମ ଚାଲିଛି । ଏଣୁ ଏହାର ସଠିକ୍ ତଦନ୍ତ କରାଯାଇ କାର୍ଯ୍ୟାନୁଷ୍ଠାନ ଗ୍ରହଣ କରିବା ପାଇଁ ଦାବି ହୋଇଛି ।
