କନ୍ଧମାଳ,୦୨/୧୦: ନାଳରେ ବୁଡ଼ି ଚାଲିଗଲା ମହିଳାଙ୍କ ଜୀବନ । ମୃତକ କୁଡୁତୁଲି ପଞ୍ଚାୟତ ମୁଣ୍ଡାରଗାଁର ବିଦୁର ପାତ୍ରଙ୍କ ସ୍ତ୍ରୀ ଶ୍ରୀମତୀ ପାତ୍ର ବୋଲି ଜଣାପଡ଼ିଛି । କନ୍ଧମାଳ ଜିଲ୍ଲା କ.ନୁଆଗାଁ ଥାନା ଅଞ୍ଚଳରେ ଏଭଳି ଦୁଃଖଦ ଘଟଣା ଘଟିଛି ।
ସୂଚନା ମୁତାବକ, ଶ୍ରୀମତୀ ପାତ୍ର ସବୁଦିନ ଭଳି ବୁଧବାର ମଧ୍ୟ ଗାଁ ନିକଟସ୍ଥ ଡିଗିରିପଡ଼ି ନାଳକୁ ଗାଧୋଇବାକୁ ଯାଇଥିଲେ । ସେ ଘରକୁ ଫେରିବାରେ ବିଳମ୍ବ ହେବାରୁ ପରିବାର ଲୋକେ ଖୋଜିବାକୁ ବାହାରିଥିଲେ । ଗାଧୋଇବାକୁ ଯାଇଥିବା ନାଳ ନିକଟକୁ ଯାଇ ଦେଖିବା ବେଳେ ମହିଳାଙ୍କ ମୃତଦେହ ପାଣିରେ ଭାସୁଥିବା ଦେଖିଥିଲେ । ସେଠାରୁ ତାଙ୍କ ମୃତଦେହ ଉଦ୍ଧାର କରି କ.ନୁଆଗାଁ ଡାକ୍ତରଖାନାକୁ ନେଇଥିଲେ । ସେଠାରେ ଡାକ୍ତର ଶ୍ରୀମତୀ ପାତ୍ରଙ୍କୁ ମୃତ ଘୋଷଣା କରିବା ସହ କ.ନୁଆଗାଁ ଥାନା ପୋଲିସକୁ ସୂଚନା ଦେଇଥିଲେ । ଖବର ପାଇ କ.ନୁଆଗାଁ ପୋଲିସ ଘଟଣାସ୍ଥଳରେ ପହଞ୍ଚି ମୃତଦେହ ଜବତ କରି ତଦନ୍ତ ଆରମ୍ଭ କରିଛି । ଏହା ସହ ଶବ ବ୍ୟବଚ୍ଛେଦ ପାଇଁ ବାଲିଗୁଡ଼ା ଉପଖଣ୍ଡ ଚିକିତ୍ସାଳୟକୁ ପଠାଇଛି । ସେପଟେ ବର୍ତ୍ତମାନ ସୁଦ୍ଧା ମୃତ୍ୟୁର କାରଣ ଅସ୍ପଷ୍ଟ ରହିଥିବାବେଳେ ବ୍ୟବଚ୍ଛେଦ ରିପୋର୍ଟ ଆସିବାପରେ ମୃତ୍ୟୁର ପ୍ରକୃତ କାରଣ ଜଣାପଡ଼ିବ ବୋଲି ପୋଲିସ ପକ୍ଷରୁ ସୂଚନା ମିଳିଛି ।
