ପୁରୀ, ୧୮/୧୦: ଅକ୍ଟୋବର ମାସ ଅଧାରୁ ଅଧିକ ସରିଗଲାଣି । ହେଲେ ଏପର୍ଯ୍ୟନ୍ତ ହିତାଧିକାରୀଙ୍କୁ ମିଳିଲାନି ଚଳିତ ମାସ ସମେତ ଆସନ୍ତା ୨ ମାସର ମାଗଣା ରାସନ । ଘରେ ଚାଉଳ ସରିଯାଇଥିବାରୁ ଗରିବ ଲୋକେ ନାହିଁ ନଥିବା ହିନସ୍ତା ହେଉଛନ୍ତି । ବାଧ୍ୟ ହୋଇ ପ୍ରତିଦିନ ମୂଲ ଲାଗି ରୋଜଗାର କରୁଥିବା ଅର୍ଥରୁ ଚାଉଳ କିଣି ପରିବାର ପେଟ ପୂରାଉଛନ୍ତି । ଚାଉଳ କିଣିବାକୁ ପଡ଼ୁଥିବାରୁ ଆକାଶ ଛୁଇଁଥିବା ଡାଲି, ତେଲ, ଲୁଣ, ପରିବା କିଣିବା ଗରିବ ପରିବାରଙ୍କ ପାଇଁ ଅସମ୍ଭବ ହେଲାଣି । ପୁରୀ ଜିଲ୍ଲାରେ ରାଜ୍ୟ ଖାଦ୍ୟ ସୁରକ୍ଷା ହିତାଧିକାରୀ ଓ ଜାତୀୟ ଖାଦ୍ୟ ସୁରକ୍ଷା ହିତାଧିକାରୀଙ୍କ ଏଭଳି ଅବସ୍ଥା ଉଦ୍ବେଗ ବିଷୟ ହୋଇଛି । ହେଲେ ପ୍ରଶାସନ କୁମ୍ଭକର୍ଣ୍ଣ ନିଦ୍ରାରେ ଶୋଇଛି । ସେପଟେ ସରକାର ସମସ୍ତ ହିତାଧିକାରୀଙ୍କୁ ଚାଉଳ ଓ ଗହମ ଦେବେ ବୋଲି କହିଥିଲେ ହେଁ ଏପର୍ଯ୍ୟନ୍ତ ଗହମ ଡିଲରଙ୍କ ପାଖରେ ପହଞ୍ଚି ନଥିବାରୁ ଏହାକୁ ନେଇ ଅସନ୍ତୋଷ ଦେଖା ଦେଇଛି ।
ସେହିପରି ଡିଲରମାନଙ୍କୁ ଯୋଗାଇ ବିଭାଗ ଯୋଗାଇ ଦେଇଥିବା ଜିପିଏସ୍ ଯୁକ୍ତ ଓଜନ ମେସିନ୍ ଠିକ୍ ଭାବେ କାମ ନ କରିବା ଖାଉଟି ସାମଗ୍ରୀ ବଣ୍ଟନରେ ଅନ୍ୟ ଏକ ପ୍ରତିବନ୍ଧକ ସୃଷ୍ଟି କରିଥିବା ଡିଲରମାନେ ମତ ଦେଇଛନ୍ତି । ରାସନ ଦେବା ବେଳେ ନେଟ୍ୱାର୍କ ଠିକ୍ ରହୁନଥିବାରୁ ପିଓଏସ୍ ମେସିନ୍ ଠିକ୍ ଭାବେ କାମ ନକରିବା ମଧ୍ୟ ଅଭିଯୋଗ ହୋଇଛି । ନୂଆ ଓଜନ ମେସିନ୍ରେ ଥରକେ ଅତିବେଶିରେ ମାତ୍ର ୧୦ କେଜି ଓଜନ ହୋଇପାରିବା ବ୍ୟବସ୍ଥା ରହିଛି । ତେଣୁ ଆସନ୍ତା ୩ ମାସର ରାସନ ଗୋଟିଏ ପରିବାରକୁ ଓଜନ କରି ଦେବାରେ ମଧ୍ୟ ଡିଲରମାନେ ସମସ୍ୟା ହେଉଛି । ପ୍ରଶାସନ ପକ୍ଷରୁ ମିଳିଥିବା ହିତାଧିକାରୀଙ୍କ ତାଲିକାରେ ଅନେକଙ୍କୁ ଗହମ ଦେବା ନିମନ୍ତେ ସୂଚିତ କରାଯାଇଛି । ତେଣୁ ଏହାକୁ କିପରି ସମାଧାନ କରାଯିବ ଚିନ୍ତାର ବିଷୟ ହୋଇଛି ବୋଲି ଡିଲର କହିଛନ୍ତି ।
ସରକାର କେୱାଇସି ବ୍ୟବସ୍ଥା ଆରମ୍ଭ କରିବା ନିମନ୍ତେ ନିର୍ଦ୍ଦେଶ ପରେ ଜିଲ୍ଲାରେ ପ୍ରାୟ ୭୭ ପ୍ରତିଶତ ପରିବାରଙ୍କୁ ଏହି ପ୍ରକ୍ରିୟାରେ ସାମିଲ କରାଯାଇଛି । ଜିଲ୍ଳାରେ ମୋଟ ପ୍ରାୟ ୧୩ ଲକ୍ଷ ୩ ହଜାର ୭୪୦ ହିତାଧିକାରୀ ଥିବା ବେଳେ ଏହା ମଧ୍ୟରୁ ୧୦ ଲକ୍ଷ ୧୪ ହଜାରରୁ ଅଧିକ ହିତାଧିକାରୀଙ୍କୁ ଇ-କେୱାଇସିରେ ଯୋଡ଼ା ଯାଇଛି । ପୁରୀ ଜିଲ୍ଲା ଏହି ଅଭିଯାନରେ ସପ୍ତମ ସ୍ଥାନରେ ରହିଛି ।
ଏନେଇ ଜିଲ୍ଲା ଯୋଗାଣ ଅଧିକାରୀ ସୁବୋଧ ହୋତା କହିଛନ୍ତି, ତୁରନ୍ତ ସମସ୍ତ ହିତାଧିକାରୀଙ୍କୁ ମାଗଣାରେ ଖାଉଟି ସାମଗ୍ରୀ ଦେବା ନିମନ୍ତେ ଡିଲରମାନଙ୍କୁ ନିର୍ଦ୍ଦେଶ ଦିଆଯିବ । ତେବେ ଗହମ ପହଞ୍ଚି ନଥିବାରୁ ଏହା ହିତାଧିକାରୀଙ୍କୁ ମିଳିବନି । କୌଣସି ଠାରେ ଡିଲରଙ୍କ ମେସିନ୍ ଖରାପ ଥିବା ଅଭିଯୋଗ ମିଳିଲେ ତୁରନ୍ତ ଏହାର ମରାମତି କରିବାକୁ ବୈଷୟିକ କର୍ମଚାରୀ ପହଞ୍ଚିବେ । ସରକାର ଗରିବ ପରିବାରଙ୍କୁ ଯୋଗାଇ ଦେଉଥିବା ମାଗଣା ରାସନ ବ୍ୟବସ୍ଥାରେ ସ୍ୱଚ୍ଛତା ଆଣିବା ନିମନ୍ତେ ବିଭାଗୀୟ ପ୍ରଶାସନ ତତ୍ପରତାର ସହ କାମ କରୁଛି ବୋଲି ଶ୍ରୀ ହୋତା କହିଛନ୍ତି