ମୁମ୍ବାଇ: ମହାରାଷ୍ଟ୍ର ବିଧାନସଭା ନିର୍ବାଚନ ପୂର୍ବରୁ ମହାବିକାଶ ଅଘାଡ଼ି ମେଣ୍ଟରେ ଆସନ ବୁଝାମଣାକୁ ନେଇ ବିବାଦ ଦେଖାଦେଇଛି ।  ଶୁକ୍ରବାର ଶିବସେନା (ୟୁବିଟି) ସଂଜୟ ରାଉତ ଆସନ ବୁଝାମଣାରେ ହେଉଥିବା ବିଳମ୍ବକୁ ନେଇ କଂଗ୍ରେସକୁ ସମାଲୋଚନା କରିଛନ୍ତି । ରାଜ୍ୟ କଂଗ୍ରେସର ନେତା ନିଷ୍ପତ୍ତି ନେବାରେ ଅକ୍ଷମ ବୋଲି ଅଭିଯୋଗ କରିଛନ୍ତି ସଂଜୟ ରାଉତ । ଶୁକ୍ରବାର ଗଣମାଧ୍ୟମ ପ୍ରତିନିଧିଙ୍କୁ ପ୍ରତିକ୍ରିୟା ଦେଇ ସେ କହିଛନ୍ତି, ୨୮୮ ବିଧାନସଭା ଆସନ ମଧ୍ୟରୁ ୨୦୦ ଆସନରେ ସହମତି ହୋଇଛି । କିନ୍ତୁ ବାକି ଆସନକୁ ନେଇ ଏବେ ବି ବିଚାର ଚାଲିଛି । ତେବେ ମହାବିକାଶ ଅଘାଡ଼ି ମେଣ୍ଟରେ କଂଗ୍ରେସ, ଶିବସେନା (ୟୁପିଟି) ଏବଂ ଏନସିପି (ଏସ୍‌ପି) ସାମିଲ ଅଛି । 

ଶାସନରେ ଥିବା ମହାୟୁତି ବିରୋଧରେ ନିର୍ବାଚନ ଲଢ଼ିବ ମହାବିକାଶ ଅଘାଡ଼ି । ସଂଜୟ ରାଉତ ଆହୁରି କହିଛନ୍ତି, ମହାରାଷ୍ଟ୍ରର କଂଗ୍ରେସ ପ୍ରଭାରୀ ରମେଶ ଚୋନ୍ନିଥଲା, ମୁକୁଲ ବାସନିକଙ୍କ ସହ ଆଲୋଚନା ହୋଇଛି । ଏନେଇ ରାହୁଲ ଗାନ୍ଧୀଙ୍କ ସହ ଆଲୋଚନା ହେବ । ଶୀଘ୍ର ଆସନ ବୁଝାମଣା କରିବାକୁ ଚେଷ୍ଟା କରାଯିବ ବୋଲି ସେ କହିଛନ୍ତି ।  ସଂଜୟ ରାଉତ କହିଛନ୍ତି ଯେ , ମୋତେ ଲାଗୁଛି ମହାରାଷ୍ଟ୍ରର କଂଗ୍ରେସ ନେତା ନିଷ୍ପତ୍ତି ନେବାରେ ଅକ୍ଷମ । କେତେକ ଆସନକୁ ନେଇ ନିଷ୍ପତ୍ତି ହୋଇପାରି ନାହିଁ । ଖୁବଶୀଘ୍ର ନିଷ୍ପତ୍ତି ନିଆଯିବା ଦରକାର ।  

ସେପଟେ ଏନସିପି (ଏସପି) ଏବଂ ଶିବସେନା (ୟୁବିଟି) ମଧ୍ୟରେ କୌଣସି ମତଭେଦ ନାହିଁ । କଂଗ୍ରେସ ସହ ମଧ୍ୟ ସେଭଳି କିଛି ବିବାଦ ନାହିଁ । କିନ୍ତୁ କିଛି ଆସନକୁ ନେଇ ୩ ଦଳ ଦାବି କରୁଛନ୍ତି । ୨୦୦ ଆସନକୁ ନେଇ ସହମତି ପ୍ରକାଶ ପାଇଥିବା ବେଳେ ଅନ୍ୟ କେତେକ ଆସନକୁ ନେଇ ଅସୁବିଧା ହେଉଛି । ଏନେଇ ଉଦ୍ଧବ ଠାକରେ ଯଦି କିଛି ପରାମର୍ଶ କରନ୍ତି ତେବେ ମୁଁ ଏହାର ପାଳନ କରିବି ବୋଲି ସଂଜୟ ରାଉତ କହିଛନ୍ତି । 

ଶିବସେନା ନେତା ଆହୁରି କହିଛନ୍ତି, ବିଜେପିକୁ ପରାସ୍ତ କରିବାକୁ ଚାହୁଁଛୁ । ବିଜେପି ସହ କିଭଳି ଲଢ଼ିବୁ ଜାଣିଛୁ । ଅମିତ ଶାହ, ବିଜେପି ଏବଂ ସିନ୍ଦେ ଗୋଷ୍ଠୀ ଆମକୁ ବେଶୀ ହଇରାଣ କରିଛନ୍ତି । ସିନ୍ଦେ ଗୋଷ୍ଠୀ ବିଜେପିର ବିଷ୍ଣୋଇ ଗ୍ୟାଙ୍ଗ, ତା ପାଖରେ କୌଣସି ଅସ୍ତ୍ର ନାହିଁ । କିନ୍ତୁ ଇଡି ଏବଂ  ସିବିଆଇକୁ ଲଗାଇ ଆମକୁ ହଇରାଣ କରୁଛନ୍ତି ବୋଲି ସଂଜୟ ରାଉତ ଦାବି କରିଛନ୍ତି । ସୂଚନାଯୋଗ୍ୟ, ଆସନ ବୁଝାମଣାକୁ ନେଇ ଗୁରୁବାର ମହାବିକାଶ ଅଘାଡ଼ି ନେତାଙ୍କ ମଧ୍ୟରେ ମାରାଥନ୍‌ ଆଲୋଚନା ହୋଇଥିଲା । କିନ୍ତୁ ଏବେ ଯାଏଁ କୌଣସି ନିଷ୍କର୍ସ ବାହାରିପାରି ନାହିଁ ।