ଭୁବନେଶ୍ୱର,୧୮/୧୦: ଓଡ଼ିଶାକୁ ମିଳିପାରେ ୪ ଅମ୍ରିତ ଭାରତ ଏକ୍ସପ୍ରେସ୍ । ଯାହା ଦ୍ୱାରା ମଧ୍ୟବିତ୍ତ ଓ ସ୍ୱଳ୍ପ ରୋଜଗାରକ୍ଷମ ସାଧାରଣ ଯାତ୍ରୀ ସେମି ହାଇସ୍ପିଡ୍ ଏକ୍ସପ୍ରେସ ଟ୍ରେନ୍ରେ ଯାତ୍ରା କରିବାର ସୁଯୋଗ ପାଇପାରିବେ । ସ୍ୱଳ୍ପ ଅର୍ଥରେ ଦ୍ୱିତୀୟ ଶ୍ରେଣୀ ଓ ଅଣସଂରକ୍ଷିତ ଟିକେଟରେ ଶୀଘ୍ର ଗନ୍ତବ୍ୟ ସ୍ଥଳରେ ପହଞ୍ଚିପାରିବ । ଏହି ଟ୍ରେନ୍ରେ ଏସି କୋଚ୍ ରହିବ ନାହିଁ । ମାତ୍ର ଅତ୍ୟାଧୁନିକ ପୁସ୍-ପୁଲ୍ ବ୍ୟବସ୍ଥା ଯୋଗୁଁ ଏଥିରେ ଆରାମଦାୟକ ଯାତ୍ରା ମିଳିପାରିବ । ପୁରୀରୁ ସୁରଟ, ପୁରୀରୁ ପୁନେ ଓ ପୁରୀରୁ ଲକ୍ଷ୍ନୌକୁ ଚାଲିବ ଅମ୍ରିତ ଭାରତ ଏକ୍ସପ୍ରେସ୍।
ଏହା ବ୍ୟତୀତ ଅନ୍ୟ ଏକ ଅମ୍ରିତ ଭାରତ ଏକ୍ସପ୍ରେସ୍ ହାଓଡ଼ାରୁ ବେଙ୍ଗାଲୁରୁକୁ ଓଡ଼ିଶା ଦେଇ ଯାତ୍ରା କରିବ । ଯାହା ବାଲେଶ୍ୱର, ଭଦ୍ରକ, କଟକ, ଭୁବନେଶ୍ୱର, ଖୋର୍ଦ୍ଧା ରୋଡ୍ ଓ ବ୍ରହ୍ମପୁର ଷ୍ଟେସନ୍ ହୋଇ ଯିବ । ତେବେ କେଉଁ ଦିନ, କେଉଁ ସମୟରେ ଚଳାଚଳ କଲେ ଠିକ ହେବ, ସେ ନେଇ ମତାମତ ଲୋଡ଼ାଯାଇଛି । ଏହି ରୁଟ୍ରେ କେତେ ଚାହିଦା ରହିଛି ଜାଣିବା ପରେ ରେଳ ବୋର୍ଡ ଚୂଡ଼ାନ୍ତ ନିଷ୍ପତ୍ତି ଦେବ । ଅନୁମତି ମିଳିବା ପରେ ହିଁ ଅମ୍ରିତ ଭାରତ ଏକ୍ସପ୍ରେସ୍ ଚଳାଚଳ କରିବ ବୋଲି ଇଷ୍ଟକୋଷ୍ଟ ରେଲ ଫ୍ୟାନ୍ସର ପ୍ରତିଷ୍ଠାତା ଅଂଶୁମାନ ଶତପଥୀ ସୂଚନା ଦେଇଛନ୍ତି । ତେବେ ଏ ନେଇ ରେଳ ବିଭାଗ ପକ୍ଷରୁ ବିଧିବଦ୍ଧ କୌଣସି ସୂଚନା ମିଳିପାରିନାହିଁ ।
ଏହି ଅମ୍ରିତ ଭାରତ ଏକ୍ସପ୍ରେସ୍ର ପ୍ରତିଟି ଟ୍ରେନ୍ରେ ୨୨ଟି କୋଚ୍ ରହିବ । ସେଥି ମଧ୍ୟରୁ ୧୨ଟି ଦ୍ୱିତୀୟ ଶ୍ରେଣୀ ସ୍ଲିପର୍ କୋଚ୍, ୮ଟି ଅଣସଂରକ୍ଷିତ ତଥା ସାଧାରଣ ଯାତ୍ରୀଙ୍କ ପାଇଁ ଉପଲବ୍ଧ ହେବ । ଅବଶିଷ୍ଟ ୨ଟି କୋଚ୍ ଗାର୍ଡ କମ୍ପାର୍ଟମେଣ୍ଟ ଭାବେ କାର୍ଯ୍ୟ କରିବ । ମୋବାଇଲ୍ ଚାର୍ଜ ପାଇଁ ସ୍ୱତନ୍ତ୍ର ବ୍ୟବସ୍ଥା ଥିବ । ଘଣ୍ଟାପ୍ରତି ସର୍ବାଧିକ ୧୩୦ କିଲୋମିଟର ବେଗରେ ଏହି ଟ୍ରେନ୍ ଗତି କରିବ । ଏହି ଟ୍ରେନକୁ୍ ପ୍ରଥମେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଅଯୋଧ୍ୟା ଧାମ ଷ୍ଟେସନରେ ୨୦୨୩ ଡିସେମ୍ବର ୩୦ ତାରିଖରେ ଲୋକାର୍ପିତ କରିଥିଲେ । ଯାହା ଦରଭଙ୍ଗାରୁ ଅଯୋଧ୍ୟା ଧାମ ହୋଇ ଆନନ୍ଦବିହାର ଟର୍ମିନାଲ୍ ମଧ୍ୟରେ ଚଳାଚଳ କରୁଛି ।
