ଭୁବନେଶ୍ୱର,୧୮/୧୦ : ରାଜ୍ୟରେ ୨୦୨୩ ଜୁନ୍ରୁ ୨୦୨୪ ଜୁନ୍ ମଧ୍ୟରେ ୧ ଲକ୍ଷ ୬୨ ହଜାର ୭୨୬ ଜଣ ମାନସିକ ଦିବ୍ୟାଙ୍ଗ ଚିହ୍ନଟ ହୋଇଥିବାବେଳେ ଏମାନଙ୍କ ମଧ୍ୟରେ ୮୭ ହଜାର ୯୪୮ ଯୁବ ଗୋଷ୍ଠୀ ଅଛନ୍ତି। ଅର୍ଥାତ ୫୪ ପ୍ରତିଶତ ମାନସିକ ଦିବ୍ୟାଙ୍ଗ ହେଉଛନ୍ତି ଯୁବ ଗୋଷ୍ଠୀ। ଏହି ଚିହ୍ନଟ ଯୁବ ଗୋଷ୍ଠୀଙ୍କ ଭିତରୁ ୪୦ ପ୍ରତିଶତ ନିଶା ସେବନ କରନ୍ତି। ସେହିପରି ଆଇଟି କ୍ଷେତ୍ରରେ କାର୍ଯ୍ୟ କରୁଥିବା ବ୍ୟକ୍ତିମାନଙ୍କ ମଧ୍ୟରୁ ୫ ପ୍ରତିଶତ ମାନସିକ ଦିବ୍ୟାଙ୍ଗ।
ଅନ୍ୟପକ୍ଷରେ ମୟୂରଭଞ୍ଜ, ଯାଜପୁର, କୋରାପୁଟ, କେଉଁଝର, କନ୍ଧମାଳ, ବଲାଙ୍ଗିର ଜିଲ୍ଳାରେ ବେଶୀ ମାନସିକ ଦିବ୍ୟାଙ୍ଗ ଥିବା ସ୍ୱାସ୍ଥ୍ୟ ବିଭାଗରୁ ମିଳିଥିବା ସୂଚନାରୁ ଜଣାପଡିଛି । ପାରିବାରିକ କଳହ, ଶିକ୍ଷା କ୍ଷେତ୍ରରେ ବିଫଳତା, ଉଚ୍ଚ ଆଶା ସଫଳ ନ ହେବା, ଅର୍ଥ ଅଭାବ, ପ୍ରେମରେ ବିଫଳତା ଓ କର୍ମକ୍ଷେତ୍ରରେ ଅତ୍ୟଧିକ ମାନସିକ ଚାପ ଯୁବ ଗୋଷ୍ଠୀଙ୍କ ମଧ୍ୟରେ ବିଷାଦ ବଢ଼ାଉଛି । ସେମାନେ ମାନସିକ ସନ୍ତୁଳନ ହରାଇ ନିଶାର ସାହାରା ନେଉଛନ୍ତି । ଗତ ଦୁଇ ବର୍ଷ ଭିତରେ ରାଜ୍ୟର ବିଭିନ୍ନ ହସ୍ପିଟାଲ୍ ଓପିଡିରେ ୨ ଲକ୍ଷ ୩୩ ହଜାର ୯୮୮ ଜଣ ଚିକିତ୍ସିତ ହୋଇଛନ୍ତି । ସେହିପରି ଏହି ସମୟ ମଧ୍ୟରେ ୧ଲକ୍ଷ ୮୪ ହଜାର ୧୭୭ ଜଣଙ୍କ କାଉନସେଲିଂ କରାଯାଇଛି ।
ରାଜ୍ୟରେ ଏସ୍ସିବି ଓ ଏମ୍କେସିଜି ମେଡିକାଲ୍ରେ ଟେଲି ମାନସ (ଫୋନ୍ ମାଧ୍ୟମରେ ଦିଆଯାଉଥିବା ମାଗଣା ମାନସିକ ଚିକିତ୍ସା ସେବା) ସେଲ୍ ଖୋଲାଯାଇଛି । ଏହି ଟେଲି ମାନସରେ ଗତ ଦୁଇ ବର୍ଷ ମଧ୍ୟରେ ୧ ଲକ୍ଷ ୧୪ ହଜାର ୧୧୩ ଜଣ ରୋଗୀଙ୍କୁ କାଉନସେଲିଂ କରାଯାଇଛି । ତେବେ ପୂର୍ବ ୨ ବର୍ଷ ତୁଳନାରେ ଏହି ସମୟ ମଧ୍ୟରେ ୪୯ ହଜାର ୮୧୧ ଜଣ ନୂଆ ରୋଗୀ ଚିହ୍ନଟ ହୋଇଛନ୍ତି । ୨୦୧୬ରୁ ରାଜ୍ୟ ସରକାରଙ୍କ ପକ୍ଷରୁ ନାସନାଲ୍ ମେଣ୍ଟାଲ୍ ହେଲ୍ଥ କାର୍ଯ୍ୟକ୍ରମ ଜାରି ରହିଛି । ଏହି କାର୍ଯ୍ୟକ୍ରମ ଜରିଆରେ ମାନସିକ ରୋଗୀଙ୍କୁ ଚିହ୍ନଟ କରାଯିବା ସହ ସେମାନଙ୍କ ଲାଗି ସ୍ୱତନ୍ତ୍ର ଚିକିତ୍ସା ବ୍ୟବସ୍ଥା କରାଯାଇଛି । ଏଥିରେ ମାନସିକ ରୋଗୀ ଓ ନିଶାଖୋରଙ୍କ ଟିହ୍ନଟ କରାଯିବା ସହ ସେମାନଙ୍କର କାଉନ୍ସେଲିଂ ଓ ଚିକିତ୍ସା କରାଯାଉଛି ।
ଏସ୍ସିବି, ଏମ୍କେସିଜି, ଭୀମ୍ସାର, ଅନୁଗୁଳ ମୁଖ୍ୟ ଚିକିତ୍ସାଳୟ, ମୟୂରଭଞ୍ଜ ମୁଖ୍ୟ ଚିକିତ୍ସାଳୟ, ବଲାଙ୍ଗିର ମୁଖ୍ୟ ଚିକିତ୍ସାଳୟ, ପୁରୀ ମୁଖ୍ୟ ଚିକିତ୍ସାଳୟ, କ୍ୟାପିଟାଲ ହସ୍ପିଟାଲ୍ ଓ ରାଉରକେଲା ଆଇଜିଏଚ୍ରେ ‘ଡି-ଆଡିକ୍ସନ୍ ସେଣ୍ଟର’ ଖୋଲାଯାଇଛି । ୨୦୧୮ ମସିହାରେ ନୂଆଦିଲ୍ଲୀର ଏମ୍ସ ଓ ବେଙ୍ଗାଲୁରୁର ନିମ୍ହାନ୍ସ ସହିତ ଏମ୍ଓୟୁ ହୋଇଥିଲା । ଏହି ଏମ୍ଓୟୁ ଫଳରେ ଏହି ଦୁଇ ସଂସ୍ଥା ମାନସିକ ରୋଗୀ ଓ ନିଶାଖୋରଙ୍କ ଚିକିତ୍ସା କ୍ଷେତ୍ରରେ ରାଜ୍ୟର ଡିଏମ୍ଏଚ୍ପି (ଡିଷ୍ଟ୍ରିକ୍ଟ ମେଣ୍ଟାଲ୍ ହେଲ୍ଥ ପ୍ରୋଗ୍ରାମ୍)ରେ କାର୍ଯ୍ୟ କରୁଥିବା କର୍ମଚାରୀଙ୍କ ତାଲିମରେ ସହଯୋଗ କରୁଛନ୍ତି । ଏହାଦ୍ୱାରା ଅଭିଜ୍ଞ ମନସ୍ତତ୍ତ୍ୱବିତ୍ ଓ ଡାକ୍ତର, ମୋବାଇଲ୍ ହେଲ୍ଥ ୟୁନିଟ୍ ସହ ଡି-ଆଡିକ୍ସନ୍ ସେଣ୍ଟରକୁ ଯାଇ ଚିକିତ୍ସା କରୁଥିବା ଜଣାପଡିଛି ।
