ଛତ୍ରପୁର, ୧୮/୧୦ : ଜଳବାୟୁ ପରିବର୍ତନ ହେତୁ ଦିନକୁ ଦିନ କୂଳ ଲଙ୍ଘିବାରେ ଲାଗିଛି ସମୁଦ୍ର। ବିପଦରେ ଗଞ୍ଜାମ ଜିଲ୍ଲାର ଅନେକ ତଟବର୍ତ୍ତୀ ଅଞ୍ଚଳ। ଭୟଭୀତ ଅବସ୍ଥାରେ ଅଛନ୍ତି ସମୁଦ୍ରକୂଳିଆ ଲୋକେ। ଦୈନିକ ଜଳପତନ ବୃଦ୍ଧି ହେବା ସହ ସମୁଦ୍ରର ଉଚ୍ଚ ଜୁଆର ସ୍ଥଳଭାଗ ଆଡକୁ ମାଡିଆସୁଛି। ଗଞ୍ଜାମ ଜିଲ୍ଲା ସଦର ମହକୁମା ଛତ୍ରପୁର ବ୍ଲକ ଅନ୍ତର୍ଗତ ଆର୍ଯ୍ୟପଲ୍ଲୀ ଗ୍ରାମରେ ଏଭଳି ଘଟଣା ଦେଖିବାକୁ ମିଳିଛି। ସମୁଦ୍ର ଧିରେ ଧିରେ କୂଳ ଲଙ୍ଘିବାରୁ ଆର୍ଯ୍ୟପଲ୍ଲୀ ପଞ୍ଚାୟତବାସୀ ଭୟଭୀତ ଅବସ୍ଥାରେ ରହିଛନ୍ତି।
ଗୁରୁବାର ସମୁଦ୍ର ଅଶାନ୍ତ ହେବା ସହ ଉଚ୍ଚ ଜୁଆର ସୃଷ୍ଟି ହୋଇଥିଲା। ଫଳରେ କେ.ଆର୍ଯ୍ୟପଲ୍ଲୀ ସମୁଦ୍ର ନିକଟରେ ମତ୍ସ୍ୟଜୀବୀଙ୍କ ପାଇଁ ନିର୍ମାଣ ହୋଇଥିବା ଏକ ସେଡ୍ ଭାଙ୍ଗି ସମୁଦ୍ରରେ ଲୀନ ହୋଇଯାଇଛି। ସମୁଦ୍ରର ଅତି ନିକଟରେ କିଛି ଘର ଥିବାରୁ ସେମାନେ ଏବେ ଭୟଭୀତ ଅବସ୍ଥାରେ ରହିଛନ୍ତି। ଗ୍ରାମବାସୀଙ୍କ କହିବା ମୁତାବକ ପୂର୍ବରୁ ସମୁଦ୍ର ଗ୍ରାମ ଠାରୁ ୨ କି.ମି ଦୂରରେ ଥିଲା। ସମୁଦ୍ର ଅଶାନ୍ତ ଯୋଗୁଁ ଏବେ ସମୁଦ୍ର ଗ୍ରାମ ନିକଟବର୍ତ୍ତୀ ହେବାରେ ଲାଗିଛି। ଗ୍ରାମ ଠାରୁ ମାତ୍ର ଆଉ କିଛି ମିଟର ଦୂରରେ ରହିଛି। ଏବେ ଜଳବାୟୁ ପରିବର୍ତ୍ତନ ସମେତ ବାରମ୍ବାର ଳଘୁଚାପଜନିତ ସାମୁଦ୍ରିକ ବାତ୍ୟା ଯୋଗୁଁ ସମୁଦ୍ରର ଜଳରାଶି ଦିନକୁ ଦିନ ଗ୍ରାମ ମୁହାଁ ହେଉଛି। ଯାହାଫଳରେ ଆଗାମୀ ଦିନରେ ବହୁ ଗ୍ରାମ ସମୁଦ୍ରରେ ଲୀନ ହୋଇଯିବାର ଆଶଙ୍କା ରହିଛି। ଏପରିକି ଗଞ୍ଜାମ ମାନଚିତ୍ରରୁ ଆର୍ଯ୍ୟପଲ୍ଲୀ ପଞ୍ଚାୟତ ଲିଭିଯିବ ବୋଲି ଆଶଙ୍କା କରାଯାଉଛି।
ଆର୍ଯ୍ୟପଲ୍ଲୀ ଗାଁ ଧୀରେ ଧୀରେ ସମୁଦ୍ର ଆଁରେ ପଶିଯିବାର ସମ୍ଭାବନା ରହିଛି। ଏଥିପ୍ରତି ପ୍ରଶାସନ ହସ୍ତକ୍ଷେପ ନକଲେ ବହୁ ଘର ସମୁଦ୍ର ଭିତରେ ଲୀନ ହୋଇଯିବ ତାହ ତିଳେ ମାତ୍ରେ ସନ୍ଦେହ ନାହିଁ। ଏପରିକି ପୂର୍ବରୁ ସମୁଦ୍ର ନିକଟରେ ଥିବା ରାସ୍ତା ଧୋଇ ହୋଇଯିବା ସହ ସେଠାରେ ଥିବା ଛୋଟ ଛୋଟ ମନ୍ଦିର ସବୁ ସମୁଦ୍ର ଜୁଆର ମାଡରେ ଭାଙ୍ଗି ନଷ୍ଟ ହୋଇଯାଇଥିବା ଦେଖିବାକୁ ମିଳିଛି। ଏଣୁ ପ୍ରଶାସନ ଯଥାଶୀଘ୍ର ଏଥିପ୍ରତି ଦୃଷ୍ଟି ଦେବାକୁ ଆର୍ଯ୍ୟପଲ୍ଲୀ ପଞ୍ଚାୟତବାସୀ ଦାବି କରିଛନ୍ତି ।
