ଭବାନୀପାଟଣା, ୨୩/୧୨: ଦୁର୍ଦ୍ଦଶାରେ ଚାଷୀ । ଦୁଃଖ ବଢ଼ାଇଛି ଲଘୁଚାପ । କୋହଲା ପାଗ ସାଙ୍ଗକୁ ଝିପିଝିପି ବର୍ଷା କଳାହାଣ୍ଡି ଜିଲ୍ଲାର ଚାଷୀଙ୍କୁ ଚିନ୍ତାଗ୍ରସ୍ତ କରିଦେଇଛି । ଏମିତିରେ ମଣ୍ଡିରେ ଅବ୍ୟବସ୍ଥା ହଟୁନାହିଁ । ଏଫ୍ଏକ୍ୟୁ ଧାନ ଓ ଗ୍ରେନ୍ ଏନାଲାଇଜର ଜିଦ୍ରେ ଅଟଳ ପ୍ରଶାସନ । ମିଲର୍ସଙ୍କ କଟ୍ନୀ ଛଟ୍ନୀ ଗଣିତ ଛିଣ୍ଡୁନି । ଆଗକୁ ରବି ଚାଷ ପାଇଁ ପ୍ରସ୍ତୁତି ଆବଶ୍ୟକ । ଏଭଳି ସ୍ଥିତିରେ ଚାଷୀ କଷ୍ଟୋପାର୍ଜିତ ଧାନକୁ ଖରା-ବର୍ଷା ଶୀତ-କାକରରେ ପକାଇ ରଖିବାକୁ ଚାହୁଁନାହାନ୍ତି । ୫ରୁ ୭ କେଜି ଯାଏ ଧାନ କାଟି କିଣିନେବାକୁ ମିଲର୍ସଙ୍କୁ ନିଜ ଆଡୁ ପ୍ରସ୍ତାବ ଦେଉଛନ୍ତି । ଶତାଧିକ ଚାଷୀ ଏଭଳି ଭାବେ ଧାନ ବିକ୍ରି ମଧ୍ୟ କରି ସାରିଲେଣି ।
ଚଳିତବର୍ଷ ଜିଲ୍ଲାରେ ମୋଟ ୧ ଲକ୍ଷ ୭୬ ହଜାର ୫୪୭ ହେକ୍ଟର ଜମିରେ ଧାନଚାଷ ହୋଇଛି । ୮ ଲକ୍ଷ ୪୧ ହଜାର ୪୧୦ ମେଟ୍ରିକ ଟନ୍ ଧାନ ଉତ୍ପାଦନ ଲକ୍ଷ୍ୟ ରହିଥିବା ବେଳେ ଜିଲ୍ଲାରେ ମୋଟ ୧ ଲକ୍ଷ ୧୪ ହଜାର ୭୫୮ ଚାଷୀ ଧାନ ବିକିବାକୁ ପଞ୍ଜିକୃତ ହୋଇଛନ୍ତି । ନଭେମ୍ବର ୨୯ରୁ ଖରିଫ ଧାନ ସଂଗ୍ରହ ଆରମ୍ଭ ହୋଇଛି । ଚଳିତବର୍ଷ ପ୍ରଥମ କରି ସରକାରଙ୍କ ପକ୍ଷରୁ ଏଆଇ ଗ୍ରେନ୍ ଏନାଲାଇଜର୍ ମେସିନରେ ଧାନର ମାନ ଯାଞ୍ଚ ବ୍ୟବସ୍ଥା କାର୍ଯ୍ୟକାରୀ ହୋଇଛି । ଏଫ୍ଏକ୍ୟୁ ମାନର ଧାନକୁ ପ୍ରାଧାନ୍ୟ ଦେବାକୁ ନିର୍ଦ୍ଦେଶ ଦିଆଯାଇଛି । ଏହି କାରଣରୁ ପ୍ରଥମରୁ ହିଁ ଜିଲ୍ଲାର ମଣ୍ଡି ଝୁଣ୍ଟିଛି । ଧାନ ଖର୍ଦ୍ଦିରେ ବ୍ୟାପକ ଅବ୍ୟବସ୍ଥା ଦେଖିବାକୁ ମିଳିଛି । ଧାନ କିଣାବିକାକୁ ନେଇ ଟଣାଓଟଣା ଭିତରେ ୧୫ ଦିନ ଅନ୍ତରରେ ଦୁଇଦୁଇ ଥର ଲଘୁଚାପ ବର୍ଷା ଓ କୋହଳା ପାଗ ଚାଷୀଙ୍କୁ ଚିନ୍ତାରେ ପକାଇ ଦେଇଛି । ୫ ଦିନ ଭିତରେ ଆଉ ଏକ ଲଘୁଚାପ ଆସୁଥିବାରୁ ଚାଷୀମାନେ ପ୍ରମାଣ ଗଣିଲେଣି ।
ଚଳିତବର୍ଷ ଜିଲ୍ଲାର ଜୟପାଟଣା, କଲମପୁର, ଜୁନାଗଡ଼ ଓ ଭବାନୀପାଟଣା ବ୍ଲକରେ ବମ୍ପର କ୍ରପ୍ ହୋଇଛି । ଉତ୍ପାଦନ ଭଲ ହୋଇଥିଲେ ମଧ୍ୟ ଧାନ କିଣା ପ୍ରକ୍ରିୟା ଯେତିକି ଜୋର୍ ଧରିବା କଥା, ତାହା ପରିଲକ୍ଷିତ ହୋଇନାହିଁ । ତେଣୁ ଚାଷୀ ପ୍ରଶାସନ କିମ୍ବା କୌଣସି ବ୍ୟବସ୍ଥାକୁ ଅପେକ୍ଷା ନ କରି ୫ କେଜି ଯାଏ ଧାନ କାଟିବାକୁ ମିଲର୍ସଙ୍କୁ ନିଜ ଆଡୁ ପ୍ରସ୍ତାବ ଦେଉଛି ।
ଜୟପାଟଣା ବ୍ଲକ ସୁନ୍ଧରିଯୋର ଗାଁର ଚାଷୀ ଜୟନ୍ତ ଖଡ଼ିକାର, ରାଜାରାମ ଛତ୍ରିଆଙ୍କ କହିବା ହେଲା, ଧାନମଣ୍ଡିରେ ପୂର୍ବରୁ ଯେମିତି ଅବ୍ୟବସ୍ଥା ରହିଥିଲା ତାହା ଏଥର ମଧ୍ୟ ରହିଛି । ମୁଣ୍ଡ ଉପରେ ରବି ଚାଷ ଚିନ୍ତା । ତେଣୁ କଟ୍ନୀଛଟନୀ ବିବାଦରେ ନ ପଡି କେମିତି ଧାନ ଶୀଘ୍ର ଉଠିବ ତାହା ଗୁରୁତ୍ୱପୂର୍ଣ୍ଣ । ଅଞ୍ଚଳର ଶତାଧିକ ଚାଷୀ ୫ କେଜି କଟ୍ନୀଛଟନୀରେ ଧାନ ବିକିଥିବା ସେମାନେ କହିଛନ୍ତି । ସେହିପରି ଭବାନୀପାଟଣା ବ୍ଲକ ମେଦିନୀପୁର, ଦେପୁର ଓ ଅନ୍ୟାନ୍ୟ ଅଞ୍ଚଳରେ ଏଥର ପ୍ରଚୁର ଧାନ ଅମଳ ହୋଇଛି । ଏଠାରେ ମଧ୍ୟ ପ୍ରତିକୂଳ ପାଗ ଦାଉ ସାଧୁଛି ।
ଧାନ ନଷ୍ଟ ହୋଇଥିବା ଆଶଙ୍କାରେ ଚାଷୀ ୭ କିଲୋ ଯାଏ କଟ୍ନୀଛଟ୍ନୀରେ ଧାନ ବିକିଛନ୍ତି । ଲକ୍ଷ୍ମୀପର ଅଞ୍ଚଳର ଚାଷୀ ଶରତ ବୁଦ୍ଧିଆ କହିଛନ୍ତି, ବିନା କଟ୍ନୀଛଟ୍ନୀରେ କୌଣସି ମିଲର୍ସ ମଣ୍ଡିରୁ ଧାନ ଉଠାଇବାକୁ ମଙ୍ଗୁନାହାନ୍ତି । ୫ କିଲୋ କଟନୀ ଓ ୨ କିଲୋ ବସ୍ତା ବାବଦକୁ ସହମତି ପରେ ମଣ୍ଡିରୁ ଧାନ ଉଠିଛି । ଧର୍ମଗଡ଼ ଟିପିଗୁଡ଼ା, ଡୁମେରଗୁଡ଼ା ମଣ୍ଡିରେ ମଧ୍ୟ ଅନୁରୂପ ଦୃଶ୍ୟ ଦେଖିବାକୁ ମିଳିଛି । ୬ କିଲୋ କଟ୍ନୀଛଟ୍ନୀରେ ଧାନ ମଣ୍ଡିରୁ ଉଠୁଛି । ତେବେ ଚଳିତଥର ଏମ୍ଏସପିଠାରୁ ଅଧିକ ୮୦୦ ଟଙ୍କା ଇନ୍ପୁଟ୍ ସବ୍ସିଡି ମିଳୁଥିବାରୁ ଚାଷୀ ବିବାଦରେ ଛନ୍ଦି ନ ହୋଇ ଧାନ ଉଠିଯାଉ ବୋଲି ସାମୂହିକ ନିଷ୍ପତ୍ତିରେ ମିଲର୍ସକୁ ଧାନ ଉଠାଇବାକୁ ସୁଯୋଗ ଦେଇଥିବା ଜଣାପଡ଼ିଛି ।
ମୋଟାମୋଟି ଭାବେ କହିବାକୁ ଗଲେ ଚଳିତ ଖରିଫ୍ରେ ଚିରାଚରିତ ମଣ୍ଡି ଅବ୍ୟବସ୍ଥା ଦେଖାଯାଇଛି । ମାତ୍ର ରାଜ୍ୟ ସରକାରଙ୍କ ଇନ୍ପୁଟ୍ ସବସିଡି ଯୋଗୁଁ ଚାଷୀ ମହଲରେ ପୂର୍ବଭଳି ଅସନ୍ତୋଷ ପ୍ରତିଫଳିତ ହେଉନାହିଁ । ଏନେଇ ଜିଲ୍ଲା ମୁଖ୍ୟ ଯୋଗାଣ ଅଧିକାରୀ ପବିତ୍ର ସାହୁଙ୍କୁ ପଚାରିବାରୁ ବର୍ତ୍ତମାନ ସୁଦ୍ଧା ୨୧୭ଟି ମଣ୍ଡିରୁ ୮ ଲକ୍ଷ କ୍ୱିଣ୍ଟାଲ ଧାନ ସଂଗ୍ରହ ହୋଇଛି । ଜିଲ୍ଲାକୁ ୫୦ ଲକ୍ଷ ୮୦ ହଜାର କ୍ୱଣ୍ଟାଲ ଧାନ ସଂଗ୍ରହ କରିବାକୁ ଟାର୍ଗେଟ ରହିଛି ବୋଲି ସେ କହିଥିଲେ।
