ଭୁବନେଶ୍ୱର,୦୬/୦୭: ସପ୍ତଦଶ ବିଧାନସଭାର ପ୍ରଥମ ଅଧିବେଶନ ଆରମ୍ଭ ହେଉଛି ଆସନ୍ତା ୨୨ ତାରିଖରୁ । ଏହି ଅଧିବେଶନରେ ୨୦୨୪-୨୫ ଆର୍ଥିକ ବର୍ଷ ପାଇଁ ପୂର୍ଣ୍ଣାଙ୍ଗ ବଜେଟ ଆସିବ । ୨୫ରେ ଗୃହରେ ବଜେଟ୍ ଆଗତ କରିବେ ମୁଖ୍ୟମନ୍ତ୍ରୀ ମୋହନ ଚରଣ ମାଝୀ।
କାର୍ଯ୍ୟସୂଚୀ ଅନୁସାରେ ଜୁଲାଇ ୨୨ ରେ ରାଜ୍ୟପାଳ ରଘୁବର ଦାସ ବିଧାନସଭାରେ ଅଭିଭାଷଣ ରଖିବେ । ଏହାପରେ ରାଜ୍ୟପାଳଙ୍କ ଅଭିଭାଷଣ ଉପରେ ଧନ୍ୟବାଦ ପ୍ରସ୍ତାବ ଆସିବ । ୨୩ରେ ଉପବାଚସ୍ପତି ନିର୍ବାଚନ ନେଇ ଘୋଷଣା ହେବ । ଆବଶ୍ୟକ ପଡ଼ିଲେ ୨୪ ତାରିଖରେ ଉପବାଚସ୍ପତି ପଦ ପାଇଁ ଗୃହରେ ଭୋଟ ହେବ । ୨୩ରୁ ରାଜ୍ୟପାଳଙ୍କ ଅଭିଭାଷଣ ଉପରେ ଗୃହରେ ଧନ୍ୟବାଦ ପ୍ରସ୍ତାବ ଆଲୋଚନା ଆରମ୍ଭ ହେବ ।
ଆସନ୍ତା ୨୫ରେ ମୁଖ୍ୟମନ୍ତ୍ରୀ ମୋହନ ଚରଣ ମାଝୀ ଗୃହରେ ଅର୍ଥ ମନ୍ତ୍ରୀ ଭାବେ ୨୦୨୪-୨୫ ଆର୍ଥିକ ବର୍ଷ ପାଇଁ ପୂର୍ଣ୍ଣାଙ୍ଗ ବଜେଟ ଉପସ୍ଥାପନ କରିବେ । ସେପ୍ଟେମ୍ବର ୧୦ରେ ଗୃହରେ ବ୍ୟୟ ମଞ୍ଜୁରୀ ବିଲ୍ ଆଗତ ହେବ । ନୂଆ ସରକାରର ଏହା ହେବ ପ୍ରଥମ ବଜେଟ୍ । ହେଲେ ପୂର୍ଣ୍ଣାଙ୍ଗ ବଜେଟ ପାଇଁ ବ୍ୟୟ ମଞ୍ଜୁରୀ ବିଲ୍ ପାରିତ ହେବା ପୂର୍ବରୁ ବିଧାନସଭାରେ ଆଉ ଏକ ମାସ ପାଇଁ ଲେଖାନୁଦାନ ଆଗତ କରାଯିବ । ଜୁଲାଇ ୩୦ରେ ଲେଖାନୁଦାନ ପ୍ରସ୍ତାବ ଆସିବ । ୩୧ ଜୁଲାଇରେ ଲେଖାନୁଦାନ ପାଇଁ ବ୍ୟୟମଞ୍ଜୁରୀ ବିଲ୍ ଆଗତ ହେବ ।
ଦୁଇଟି ପର୍ଯ୍ୟାୟରେ ବିଧାନସଭାର ବଜେଟ ଅଧିବେଶନ ବସିବ । ଏଥିରେ ମୋଟ ୨୭ଟି କାର୍ଯ୍ୟ ଦିବସ ରହିଛି । ପ୍ରଥମ ପର୍ଯ୍ୟାୟ ଜୁଲାଇ ୨୨ରୁ ୩୧ ତାରିଖ ପର୍ଯ୍ୟନ୍ତ ଚାଲିବ । ଅଗଷ୍ଟ ୧ରୁ ୧୯ ତାରିଖ ପର୍ଯ୍ୟନ୍ତ ଅଧିବେଶନ ନାହିଁ । ପୁନର୍ବାର ଅଗଷ୍ଟ ୨୦ରୁ ଗୃହ କାର୍ଯ୍ୟ ଆରମ୍ଭ ହୋଇ ସେପ୍ଟେମ୍ବର ୧୩ ପର୍ଯ୍ୟନ୍ତ ଚାଲିବା ନେଇ କାର୍ଯ୍ୟସୂଚୀ ଜାରି ହୋଇଛି ।
୨୪ ବର୍ଷର ବିଜେଡି ସରକାର ହଟିବା ପରେ ପ୍ରଥମ ଥର ରାଜ୍ୟରେ ବିଜେପି ସରକାର ଗଢ଼ିଛି । କ୍ଷମତାକୁ ଆସିବା ପରେ ବିଜେପି ସରକାର ପ୍ରଥମ ଥର ବିଧାନସଭାରେ ବଜେଟ ଉପସ୍ଥାପନ କରିବେ । ଏହା ଉପରେ ସାରା ରାଜ୍ୟବାସୀଙ୍କ ନଜର ରହିଛି । ଅନ୍ୟପଟେ ପ୍ରଥମ ଥର ପାଇଁ ବିଜେଡି ବିଧାନସଭାରେ ବିରୋଧୀ ଦଳ ଭୂମିକା ତୁଲାଇବ । ନବୀନ ପଟ୍ଟନାୟକ ଗୃହରେ ପ୍ରଥମ ଥର ବିରୋଧୀ ଦଳ ନେତା ଭାବେ ଦାୟିତ୍ୱ ତୁଲାଇବେ । ଉଭୟ ଦଳ ପାଇଁ ଏହି ବିଧାନସଭା ଅଧିବେଶନ ଚାଲେଞ୍ଜିଂ ହେବ ।
