ଭୁବନେଶ୍ୱର,୦୫/୧୦: ରାଜଧାନୀରେ ଏମିତି କୌଣସି ଛକ ନାହିଁ, ଯେଉଁଠି ଭିକାରୀ ନାହାନ୍ତି । ଏମାନେ ମନ୍ଦିର, ମସଜିଦ୍ ସାମ୍ନାରେ ବସୁଥିବା ଭିକାରୀଙ୍କ ପରି ନୁହନ୍ତି । ଛିଣ୍ଡା, ଫଟା ପୋଷାକ, ଲୁଗା ପିନ୍ଧି ନଥାନ୍ତି କିମ୍ବା ହାତରେ ଧରି ନଥାନ୍ତି ଫଟା ବେଲା କି ଥାଳି । ସ୍ମାର୍ଟ ସିଟି ଭୁବନେଶ୍ୱରର ସ୍ମାର୍ଟ ଭିକାରୀଙ୍କ ବେଶଭୂଷା ଟିକେ ଅଲଗା । ଏମାନଙ୍କ ଭିତରୁ କେତେକ ନକଲି କିନ୍ନର ବେଶରେ, କଲମ ଆଦି କିଛି ଜିନିଷ ବିକ୍ରି କରିବା ଆଳରେ ପାଖକୁ ଆସନ୍ତି । ଆଉ ହାତ ପତାଇ ଟଙ୍କା ମାଗନ୍ତି । କିନ୍ତୁ ସରକାର କହୁଛନ୍ତି ଖୋର୍ଦ୍ଧା ଜିଲ୍ଲାରେ ମାତ୍ର ୧୫୦ ଭିକାରୀ ଥିବା ବେଳେ ସାରା ରାଜ୍ୟରେ ଅଛନ୍ତି ୩ ହଜାର ୯ ଜଣ ଭିକାରୀ । ମନ୍ଦିର ସାମ୍ନାରେ ଜରି ଅଖା ଉପରେ ବସି କମ୍ବଳ ଘୋଡ଼ାଇ ହାତରେ କଂସା ଧରି ଭିକ ମାଗୁଥିଲେ ଖାଲି ଭିକାରୀ ବୋଲି ହିସାବ କରନ୍ତି ସରକାର । ବେଶ ବଦଳାଇ ସହର ସାରା ବୁଲି ବୁଲି ଲୋକଙ୍କୁ ଟଙ୍କା ମାଗୁଥିବା ଲୋକ ଯେ ଭିକାରୀ ଭିତରେ ଗଣାଯାଇ ପାରିବ ସେ ହିସାବ ସରକାରଙ୍କ ପାଖରେ ନାହିଁ ।
ନାଲକୋ ଛକ ହେଉ କି ମ୍ୟାଗନେଟିକ୍ ଛକ, ଜୟଦେବ ବିହାର ହେଉ କି ସିଆରପି ଛକ, ରସୁଲଗଡ ଆଦି ସହରର ଅଧିକାଂଶ ଛକରେ ଟ୍ରାଫିକ୍ ଅଟକିଥିବା ସମୟରେ ଏଭଳି ଭିକାରୀମାନେ ଆସି ପହଞ୍ଚି ଯାଆନ୍ତି । ମୁହଁରେ ଅସହାୟ ଭାବ ନେଇ ଟ୍ରାଫିକ୍ ସବୁଜ ସଂକେତକୁ ଅପେକ୍ଷା କରିଥିବା ପ୍ରତ୍ୟେକ ବ୍ୟକ୍ତିଙ୍କୁ ଏମାନେ ହାତ ପତାଇ ମାଗନ୍ତି ଟଙ୍କା । ଏଭଳି ବିଭିନ୍ନ ବର୍ଗର ବ୍ୟକ୍ତି ଟଙ୍କା ମାଗୁଥିବା ଦେଖିବାକୁ ମିଳୁଛି ଭିକାରୀ ମୁକ୍ତ ସହର ଭୁବନେଶ୍ୱରରେ । ବିଏମ୍ସି ଜରିଆରେ ଅନେକ କିନ୍ନର ସ୍ୱାବଲମ୍ବୀ ହୋଇଥିଲେ ମଧ୍ୟ ଅନେକ ଏବେବି ଛକରେ ଭିକ୍ଷାବୃତ୍ତି କରୁଛନ୍ତି। ତେବେ ଏମାନେ କିନ୍ନର ବେଶଧାରୀ ନା ପ୍ରକୃତରେ କିନ୍ନର ତାହା ସ୍ପଷ୍ଟ ହେଉନି ।
ଦ୍ୱିତୀୟ ବର୍ଗ ହେଲେ ଯାଯାବର । ସହରର ଛକରେ କେତେକ ଅଣଓଡିଆ ନାବାଳକ ନାବାଳିକା, କିଶୋର କିଶୋରୀ, ମହିଳା ହାତରେ ଗଣ୍ଡାଏ ପେନ୍ କିମ୍ବା ଘର ସଜ୍ଜା ଜିନିଷ ବିକ୍ରି ପାଇଁ ଧରିଥାନ୍ତି, କିନ୍ତୁ ଉଦ୍ଦେଶ୍ୟ ଥାଏ ଭିକ୍ଷାବୃତ୍ତି । ଟଙ୍କା ମାଗିଲା ବେଳେ ମଧ୍ୟ ସେମାନେ ନିଜର ଅସହାୟତା ପ୍ରକାଶ କରୁଥାନ୍ତି ଏବଂ କିଛି ସାମଗ୍ରୀ କିଣିବାକୁ ବାଧ୍ୟ କରୁଥାନ୍ତି । କିନ୍ତୁ ଅଧିକାଂଶ ଲୋକେ ଅନାବଶ୍ୟକ ପେନ୍, ଖେଳନା ଚଢ଼େଇ ନ କିଣି ଖାଲିରେ ସେମାନଙ୍କୁ କିଛି ଟଙ୍କା ଧରେଇ ଦିଅନ୍ତି । ତାଛଡ଼ା ଟ୍ରାଫିକ୍ ଛକରେ ଜବରଦସ୍ତ ଆସି କିଛି ଲୋକ ମଥାରେ ଚନ୍ଦନ, ସିନ୍ଦୂର ଟୋପା ଲଗାଇ ଦିଅନ୍ତି, ଆଉ ଟଙ୍କା ମାଗନ୍ତି । ଟଙ୍କେ କି ଦୁଇଟଙ୍କା ଏମାନେ ନିଅନ୍ତି ନାହିଁ । ସେହିପରି ରାଜଧାନୀ ଉପକଣ୍ଠରୁ କିମ୍ବା ସହରର ଆଖପାଖ ଅଞ୍ଚଳରୁ ଆସି କିଛି ଦିବ୍ୟାଙ୍ଗ ମଧ୍ୟ ଭିକ୍ଷାବୃତ୍ତି କରୁଥିବା ଦେଖାଯାଉଛି ।
ତେବେ ସେମାନେ କଣ ଭିକାରୀ ନୁହନ୍ତି! ଏ ବାବଦରେ ବିଏମସି ଅଧିକାରୀଙ୍କ ସହ ଆଲୋଚନା ବେଳେ ଜଣାପଡିଛି, ଗତ ୬ ମାସରେ ପ୍ରାୟ ୩୦ରୁ ୩୫ ଜଣ ଭିକାରୀଙ୍କୁ ଉଦ୍ଧାର କରି ଥଇଥାନ କରାଯାଇଛି । ରାଜଧାନୀକୁ ଭିକାରୀ ମୁକ୍ତ ସହର କରିବା ଉଦ୍ଦେଶ୍ୟରେ ବିଏମସି, କମିଶନରେଟ୍ ପୋଲିସ ଏବଂ ୪ଟି ଏଜେନ୍ସି ମିଳିତ ଭାବରେ କାମ କରୁଛନ୍ତି । ବର୍ତ୍ତମାନ ସହରରେ ୫ଟି ପୁନର୍ବାସ କେନ୍ଦ୍ର ରହିଛି। ଯେଉଁଥିରୁ ଗୋଟିଏ କେନ୍ଦ୍ର କେବଳ ମହିଳା ଓ ଶିଶୁଙ୍କ ପାଇଁ ଉଦ୍ଦିଷ୍ଟ । ପ୍ରତ୍ୟେକ କେନ୍ଦ୍ରରେ ସର୍ବାଧିକ ୧୦୦ ଭିକ୍ଷୁକଙ୍କ ଲାଗି ରହିବା ବ୍ୟବସ୍ଥା କରାଯାଇଛି । ବର୍ତ୍ତମାନ ପ୍ରତ୍ୟେକ ପୁନର୍ବାସ କେନ୍ଦ୍ରରେ ପ୍ରାୟ ୯୦ରୁ ଅଧିକ ଅନ୍ତେବାସୀ ରହୁଛନ୍ତି । ଅର୍ଥାତ୍ ପ୍ରାୟ ୪୫୦ରୁ ଅଧିକ ଭିକ୍ଷୁକ ରହୁଛନ୍ତି । ତେବେ ଆଗକୁ ଭିକ୍ଷାବୃତ୍ତି କରୁଥିବା କିନ୍ନରଙ୍କ ଲାଗି ମଧ୍ୟ ଏକ ସ୍ୱତନ୍ତ୍ର ପୁନର୍ବାସ କେନ୍ଦ୍ର ଖୋଲିବାକୁ ଆଲୋଚନା ଚାଲିଛି । କିନ୍ତୁ ଯାଯାବର ଭିକ୍ଷୁକଙ୍କ ଲାଗି କୌଣସି ସମାଧାନ ବାହାରିପାରି ନାହିଁ । ସେମାନେ ପୁନର୍ବାସ କେନ୍ଦ୍ରରେ ସମସ୍ତଙ୍କ ସହ ନ ରହି ପରିବାର ଭଳି ଅଲଗା ରହିବାକୁ ଦାବି କରୁଛନ୍ତି । ଏଣୁ ସେମାନଙ୍କୁ ଉଦ୍ଧାର କରି ସ୍ୱାବଲମ୍ବୀ କରିବା ସମ୍ଭବ ହୋଇପାରୁନି ବୋଲି ବିଏମସି ଅଧିକାରୀ କହିଛନ୍ତି ।