କୋଣାର୍କ, ୨୭/୦୭ : ଗୋପ ଥାନା ଅରୁଆଳି ଗ୍ରାମରେ ବଧୂ ହତ୍ୟା ଅଭିଯୋଗ। ଝିଅକୁ ଶାଶୁଘର ଲୋକେ ହତ୍ୟା କରିଥିବା ଅଭିଯୋଗ ଆଣିଲେ ବାପଘର ଲୋକେ। ଗୋପ ମେଡିକାଲ ପରିସରରେ ଉତ୍ତେଜନା। ଘଟଣାସ୍ଥଳରେ ତଦନ୍ତ ଚଳାଇଛି ଗୋପ ପୋଲିସ। ସେପଟେ ଶାଶୁଘର ଲୋକ ଫେରାର୍।
ସୂଚନାନୁଯାୟୀ, ଗୋପ ଥାନା ଅନ୍ତର୍ଗତ ମଦରଙ୍ଗ ଗ୍ରାମର କୁମର ବେହେରାଙ୍କ ବଡ଼ ଝିଅ ଭାଗ୍ୟବତୀ ବେହେରା ଅରୁଆଳି ଗ୍ରାମର ପପୁନି ବେହେରାଙ୍କୁ ପାଞ୍ଚ ବର୍ଷ ତଳେ ବୈଦିକ ରୀତିରେ ବିବାହ କରିଥିଲେ। ଭାଗ୍ୟବତୀଙ୍କ ଦେଢ ବର୍ଷ ଓ ୪ ବର୍ଷର ଦୁଇଟି ଶିଶୁକନ୍ୟା ଅଛନ୍ତି। ଶନିବାର ସକାଳୁ ହଠାତ୍ ଭାଗ୍ୟବତୀଙ୍କ ଶାଶୁଘର ଲୋକ ବାପଘର ଲୋକଙ୍କୁ ଫୋନ କରି ଡାକିଥିଲେ। ଝିଅର ଦେହ ଖରାପ ଅଛି ଗୋପ ମେଡିକାଲକୁ ଆସ ବୋଲି କହିଥିଲେ। ଭାଗ୍ୟବତୀଙ୍କ ବାପା କୁମର ମେଡିକାଲରେ ପହଞ୍ଚିଲା ବେଳକୁ ଝିଅର ଶବ ପଡ଼ିଥିବା ଦେଖିବାକୁ ପାଇଥିଲେ। ଏହାପରେ ମେଡିକାଲ ପରିସରରେ ଉତ୍ତେଜନାମୂଳକ ପରିସ୍ଥିତି ସୃଷ୍ଟି ହୋଇଥିଲା। ଝିଅକୁ ଶାଶୁଘର ଲୋକ ହତ୍ୟା କରିଥିବା କୁମର ଅଭିଯୋଗ କରିଛନ୍ତି। ଘଟଣାସ୍ଥଳରେ ଗୋପ ପୋଲିସ ପହଞ୍ଚି ତଦନ୍ତ ଚଳାଇଛି। ସେପଟେ ଶାଶୁ ଘର ଲୋକ ଫେରାର୍ ହୋଇଯାଇଛନ୍ତି।