ମାଲକାନଗିରି, ୭/୯ : ବନ୍ଦେ ଉତ୍କଳ ଲୋକ କଳା ଓ ଲୋକ ସଂସ୍କୃତି ମହାସଂଘ ଓଡ଼ିଶା ଶାଖା ମାଲକାନଗିରି ଜିଲ୍ଲା ପକ୍ଷରୁ ଏକ ଅଭିନବ ସାଂସ୍କୃତିକ କାର୍ଯ୍ୟକ୍ରମର ଆୟୋଜନ କରାଯାଇଛି । କୋରୁକୋଣ୍ଡା ବ୍ଲକ ଅନ୍ତର୍ଗତ ଶିରାଗୁଡ଼ା କଳା ଗ୍ରାମରେ ଏହି କାର୍ଯ୍ୟକ୍ରମ ହୋଇଛି । ଜିଲ୍ଲା ସଭାପତି ଧନୁର୍ଜୟ ହନ୍ତାଳ ଏଥିରେ ଅଧ୍ୟକ୍ଷତା କରିଥିଲେ । ଏହି ଅବସରରେ ମୁଖ୍ୟ ଅତିଥି ଭାବେ ଆଦିବାସୀ ନେତା ଡଃ କାମରାଜ କବାସି, ମୁଖ୍ୟବକ୍ତା ରୂପେ ସମାଜସେବୀ ଘେନୁ ମୁଦୁଲି, ସମ୍ମାନୀତ ଅତିଥି ଭାବେ ଅମଳ ମଣ୍ଡଳ ଯୋଗଦେଇ କଳାକାରମାନଙ୍କୁ ଉତ୍ସାହିତ କରିଥିଲେ I
ଡଃ କାମରାଜ କବାସି କଳାକାରମାନଙ୍କ ଭୂମିକା ଉପରେ ଆଲୋକପାତ କରି ନିଜ ସଂସ୍କୃତି ଓ ପରମ୍ପରାକୁ ଉଜ୍ଜୀବିତ କରି ରଖିବା ପାଇଁ ପରାମର୍ଶ ପ୍ରଦାନ କରିଥିଲେ I ସେହିଭଳି ଶ୍ରୀ ମୁଦୁଲି ନିଜ ବକ୍ତବ୍ୟରେ ସମସ୍ତଙ୍କ ସହଯୋଗ ନିତାନ୍ତ ଆବଶ୍ୟକ ଥିବା କଥା ପ୍ରକାଶ କରିଥିଲେ । ଅନ୍ୟପଟେ ସଂଗଠନକୁ ସୁଦୃଢ କରିବା ପାଇଁ ଶ୍ରୀ ମଣ୍ଡଳ ଅନୁରୋଧ କରିଥିଲେ । ସଭାପତି ଶ୍ରୀ ହନ୍ତାଳ, କଳାକାରମାନଙ୍କୁ କିଛି କିଛି ଲେଖିବା ନିମନ୍ତେ ପରାମର୍ଶ ଦେଇଥିଲେ । ପରେ କମ୍ପୁଦିରୀ ରାଜଧାନୀର ଗର୍ବ ଗାରିମାକୁ ସମାଜରେ ପ୍ରତିଷ୍ଠିତ କରାଇବା ପାଇଁ ଉକ୍ତ ନାଟଗୁରୁ ଓ କଳାକାରମାନଙ୍କୁ“ କମ୍ପୁଦିରୀ କଳାରତ୍ନ ସମ୍ମାନ – ୨୦୨୪”ର ମାନପତ୍ର ପ୍ରଦାନ କରାଯାଇଥିଲା।
ସନ୍ଧ୍ୟାରେ ବିଭିନ୍ନ ଆଦିବାସୀ ସାଂସ୍କୃତିକ ଦଳମାନେ ନିଜ ନିଜର କଳା ପ୍ରଦର୍ଶନ କରିଥିଲେ । ଶିରାଗୁଡ଼ା କଳା ଗ୍ରାମର ଢେମେସା, ନୀଳାଦ୍ରି ନଗରରୁ ସଂକୀର୍ତ୍ତନ, ଡାଇକ୍ ୩ ଗ୍ରାମରୁ ସଂଗୀତ ପରିବେଷଣ ସହ ପଡ଼ିଆ ବ୍ଲକର ଇରାଲଗନ୍ଦୀ ଗ୍ରାମରୁ ଆସିଥିବା “କୁପରଲିଙ୍ଗା କୋୟା ନୃତ୍ୟ" ସମସ୍ତଙ୍କୁ ଆକର୍ଷିତ କରିଥିଲା । ସୁଶ୍ରୀ ସୋନାଲି ପଡିଆମିଙ୍କ ନେତୃତ୍ୱରେ ଉକ୍ତ କୋୟା ନୃତ୍ୟ ପରିବେଷିତ ହୋଇଥିବାରୁ ସୁଶ୍ରୀ ପଡିଆମୀଙ୍କୁ ଦର୍ଶକ ମଣ୍ଡଳୀ ବହୁତ ପ୍ରଶଂସା କରିଥିଲେ I