ନୂଆଦିଲ୍ଲୀ: ରାଜଧାନୀ ଦିଲ୍ଲୀରେ ଭୟଙ୍କର ଦୁର୍ଘଟଣା। ଶନିବାର ଉତ୍ତରପୂର୍ବ ଦିଲ୍ଲୀରେ ଏକ ଚାରି ମହଲା କୋଠା ଭୁଶୁଡି ୧୧ ଜଣଙ୍କ ମୃତ୍ୟୁ ହୋଇଥିବା ବେଳେ ଅନେକ ଲୋକ ଫଶି ରହିଛନ୍ତି ବୋଲି ପୋଲିସ ସୂଚନା ପ୍ରଦାନ କରିଛି।
ଶନିବାର ସକାଳ ପ୍ରାୟ ୩ଟା ୨ ସମୟରେ ଦିଲ୍ଲୀର ମୁସ୍ତଫାବାଦ ଅଞ୍ଚଳରେ ଏହି ଦୁର୍ଘଟଣା ଘଟିଥିଲା। ଏପର୍ଯ୍ୟନ୍ତ ଯାଏ ଧ୍ୱଂସସ୍ତୁପ ମଧ୍ୟରୁ ମୋଟ ୧୪ ଜଣଙ୍କୁ ଉଦ୍ଧାର କରାଯାଇଥିବା ବେଳେ ସମସ୍ତଙ୍କୁ ଜିଟିବି ଡାକ୍ତରଖାନାକୁ ସ୍ଥାନାନ୍ତରିତ କରାଯାଇଥିଲା। ତେବେ ଏହି ଦୁର୍ଘଟଣାରେ ମୋଟ ୧୧ ଜଣଙ୍କ ମୃତ୍ୟୁ ହୋଇଛି ବୋଲି ଘୋଷଣା କରାଯାଇଛି।
ଉଦ୍ଧାରକାର୍ଯ୍ୟକୁ ତ୍ୱରାନ୍ୱିତ କରବାକୁ ଜାତୀୟ ବିପର୍ଯ୍ୟୟ ମୁକାବିଲା ବଳ(ଏନଡିଆରଏଫ), ଅଗ୍ନିଶମବାହିନୀ ଓ ଦିଲ୍ଲୀ ପୋଲିସ ଘଠଣାସ୍ଥଳରେ ଉପସ୍ଥିତ ରହିଛନ୍ତି। ତେବେ ଏ ପର୍ଯ୍ୟନ୍ତ ଯାଏ ଘର ଭୁଶୁଡିବା ସମ୍ପର୍କରେ କୌଣସି ତଥ୍ୟ ମିଳିପାରିନାହିଁ ବୋଲି ପୋଲିସ ସୂଚନା ପ୍ରଦାନ କରିଛି। ଜଣେ ବରିଷ୍ଠ ଏନଡିଆରଏଫ ଅଧିକାରୀ କହିଛନ୍ତି ଯେ, ଆମ ଦଳ ଭୁଶୁଡି ପଡିଥିବା ଘରର ଭଙ୍ଗା ଅଂଶକୁ କାଢିବାକୁ ଭାରି ଯନ୍ତ୍ରାଂଶର ବ୍ୟବହାର କରିପାରୁ ନାହୁଁ। କାରଣ ଘରର ଭଙ୍ଗା ଅଂଶ ତଳେ ଏବେବି ଅନେକ ଲୋକ ଚାପି ହୋଇ ରହିଛନ୍ତି। ଯେଉଁଥିପାଇଁ ଉଦ୍ଧାରକାର୍ଯ୍ୟରେ ବିଳମ୍ୱ ପରିଲକ୍ଷିତ ହେଉଛି।
ଏହି ଘଟଣା ସାମ୍ନାକୁ ଆସିବା ପରେ ଦିଲ୍ଲୀ ମୁଖ୍ୟମନ୍ତ୍ରୀ ରେଖା ଗୁପ୍ତା ଏଥିନେଇ ଦୁଃଖବ୍ୟକ୍ତ କରିଛନ୍ତି। ଏହା ସହ ଏହି ଦୁର୍ଘଟଣାର କାରଣ କଣ ସେନେଇ ତଦନ୍ତ ଜାରି ଚାଲିଛି। ଏହା ପଛର କାରଣ ମିଳିଲେ ଦୋଷିଙ୍କ ବିରୁଦ୍ଧରେ କଡା କାର୍ଯ୍ୟାନୁଷ୍ଠାନ ନିଆଯିବ ବୋଲି ସେ ସୂଚନା ପ୍ରଦାନ କରିଛନ୍ତି।
ଗତ ସପ୍ତାହରେ ମଧ୍ୟ ଦିଲ୍ଲୀ-ଏନସିଆର ଅଞ୍ଚଳରେ ଦୁଇଟି ଭିନ୍ନ ଭିନ୍ନ ଦୁର୍ଘଟଣାରେ ଦୁଇଜଣ ଲୋକଙ୍କ ମୃତ୍ୟୁ ହେବ ସହ ତିନିଜଣ ଲୋକ ଗୁରୁତର ଆହତ ହୋଇଛନ୍ତି। ଗୋଟିଏ ଦୁର୍ଘଟଣାରେ ଗୋଟିଏ ଘର ଭୁଶୁଡି ପଡିବା ସହ ଆଉ ଏକ ଦୁର୍ଘଟଣାରେ ଏକ କାନ୍ଥ ଭୁଶୁଡି ପଡିଥିଲା।
ଦିଲ୍ଲୀର ମଧୁ ବିହାର ଅଞ୍ଚଳରେ ଏକ ନିର୍ମାଣଧିନ ଘରର ୬ ତାଲାରେ ତିଆରି ହେଉଥିବା କାନ୍ଥ ଗଳିପଡିବାରୁ ଜଣେ ୬୭ ବର୍ଷିୟ ବୃଦ୍ଧଙ୍କର ଘଟଣାସ୍ଥଳରେ ମୃତ୍ୟୁ ଘଟିଥିଲା। ଠିକ ସେହିଭଳି ଦିଲ୍ଲୀର କରୋଲବାଗ ଅଞ୍ଚଳରେ ତିନି ମହଲା ଉପରୁ ଜଣେ ୧୩ ବର୍ଷିୟ ବାଳକ ଉପରେ ନୂଆ ତିଆରି ହୋଇଥିବା ପାଚେରୀ ଗଳିପଡିବା କାରଣରୁ ତାଙ୍କର ମୃ୍ତ୍ୟୁ ହୋଇଯାଇଥିଲା।
