ସମ୍ବଲପୁର ୧୭/୦୫ : ଟ୍ରେନ୍ ଉପରକୁ ପଥର ମାଡ଼। ତପସ୍ବିନୀ ଏକ୍ସପ୍ରେସକୁ ପଥରମାଡ଼ କଲେ ଦୁର୍ବୃତ୍ତ। ପୁରୀରୁ ହାଟିଆ ଯାଉଥିବା ଏହି ଟ୍ରେନ ଉପରକୁ ରେଙ୍ଗାଲି ଷ୍ଟେସନ ନିକଟ ଲପଙ୍ଗାରୁ ବୃନ୍ଦମାଲ ମଝିରେ ପଥର ମାଡ ହୋଇଛି। ପଥର ମାଡରେ ଟ୍ରେନ୍ ଏସି କୋଚର କାଚ ଭାଙ୍ଗିବା ସହ ଅନେକ କ୍ଷୟକ୍ଷତି ହୋଇଥିବା ଜଣାପଡିଛି । ଟ୍ରେନ୍ରେ ଥିବା ଯାତ୍ରୀ ଭୟଭୀତ ଥିବା ଜଣାପଡିଛି। ଘଟଣାକୁ ନେଇ ତଦନ୍ତ ଚାଲିଥିବା କହିଛି ସମ୍ବଲପୁର ଜିଆରପି।
ସୂଚନା ଅନୁଯାୟୀ, ଶନିବାର ଭୋର ୫ଟା ୪୫ ମିନିଟ୍ରେ ସମୟରେ ସମ୍ବଲପୁର ରେଙ୍ଗାଲି ଷ୍ଟେସନ ନିକଟ ଲପଙ୍ଗାରୁ ବୃନ୍ଦମାଲ ମଝିରେ ମଝିରେ ତପସ୍ୱିନୀ ଏକ୍ସପ୍ରେସ୍କୁ ପଥରମାଡ଼ କରିଛନ୍ତି ଦୁର୍ବୃତ୍ତ। ଯେଉଁଥିରେ ଟ୍ରେନ୍ର ଏସି କୋଚର କାଚ ଭାଙ୍ଗିବା ସହ ଅନେକ ସିଟ୍ ମଧ୍ୟ ନଷ୍ଟ ହୋଇଛି । ଏସି କୋଚର ବି-୬ ୧୫ ନମ୍ବର ସିଟ୍ ଏବଂ ବି- ୭ର ପଥର ମାଡ଼ ହୋଇଥିବା ସୂଚନା ମିଳିଛି । ତେବେ କେଉଁ କାରଣରୁ ଦୁବୃତ୍ତମାନେ ପଥଡ଼ ମାଡ଼ କରିଛନ୍ତି ଜଣାପଡିନାହିଁ। ଏନେଇ କୌଣସି ସ୍ପଷ୍ଟ ସୂଚନା ମିଳିପାରିନାହିଁ। ତେବେ ଜିଆରପି ଘଟଣାର ତଦନ୍ତ କରଥିବା ଜଣାପଡିଛି।
ଟ୍ରେନରେ ଥିବା କର୍ମଚାରୀଙ୍କ ସୂଚନା ଅନୁସାରେ, ଆଜି ଭୋରରୁ ସମ୍ବଲପୁର ସିଟି ଷ୍ଟେସନ ଅତିକ୍ରମ କରିବା ପରେ ଟ୍ରେନର ଏସି ବଗି ଯାତ୍ରୀ ଚିତ୍କାର କରିଥିଲେ। ଟ୍ରେନର ଏସି ବଗିରେ ଥିବା ଝରକା କାଚ ଭାଙ୍ଗି ଯାଇଥିଲା। କେହି ଗୁଳି କରିଥିବା ଶବ୍ଦ ଶୁଣିଥିବା ଯାତ୍ରୀଜଣକ ତାଙ୍କୁ କହିଥିଲି। ଝରକା କଚାକୁ ଗୁଳି ମାଡ଼ ହୋଇଥିବା ଭୟଭୀତ ଅବସ୍ଥାରେ ଯାତ୍ରୀ କହିଥିଲେ। ଟ୍ରେନ ଆଟେଣ୍ଡର ବଗିରେ ପହଞ୍ଚି ଦେଖିଲା ବେଳକୁ ଝରକା କାଚଟି ସମୂର୍ଣ୍ଣ ଭାଙ୍ଗି ଯାଇଛି। ତେଣୁ ସେ ତୁରନ୍ତ ଏନେଇ ଟିଟିଇଙ୍କୁ ସୂଚନା ଦେଇଥିଲେ। ପରେ ଜିଆରପି ଅଧିକାରୀ ଓ କର୍ମଚାରୀ ପହଞ୍ଚି ତଦନ୍ତ କରୁଛନ୍ତି। ତେବେ ଏଭଳି ଘଟଣା ସମ୍ବଲପୁରରେ ପ୍ରଥମ ନୁହେଁ। ପୂର୍ବରୁ ମଧ୍ୟ ସମ୍ବଲପୁର ରେଙ୍ଗାଲି ଷ୍ଟେସନ ମଧ୍ୟରେ ଅନେକ ଥରେ ଚଳନ୍ତା ଟ୍ରେନ ଉପରକୁ ପଥର ମାଡ଼ ହୋଇଛି। ଏମିତି କି ଗତ କିଛି ମାସ ପୂର୍ବରୁ ଜଗନ୍ନାଥ କଲୋନୀ ନିକଟରେ ପଥର ମାଡ଼ ହୋଇ ଜଣେ ଯାତ୍ରୀ ଆହତ ହୋଇଥିଲେ।
