ଧଉଳି, ୨୧/୦୯ (ବିଭୁତି ଭୂଷଣ ପ୍ରଧାନ): ‘ବଞ୍ଚିଥିବା ଯାଏଁ ମୋ ଗାଁକୁ କେବେବି ସ୍ୱଚ୍ଛତା ଲାଗି ନିନ୍ଦିତ ହେବାକୁ ଦେବି  ନାହିଁ । ଗାଁର ସମସ୍ତ ଅଞ୍ଚଳ ୩୬୫ ଦିନ ଅର୍ଥାତ ବରଷକ ଯାକ ସଫା ରଖିବି । ଏ  ପିଣ୍ଡରେ ପ୍ରାଣ ଥିବା ପର୍ଯ୍ୟନ୍ତ ମୁଁ ସ୍ୱଚ୍ଛତା  ଲାଗି ଶ୍ରମ ଦାନ କରୁଥିବି’ ।  

ଏହା କୌଣସି ରାଜନେତାଙ୍କର ଜନତାଙ୍କ ପ୍ରତି ମିଛ ପ୍ରତିଶ୍ରୁତି ପରି  ଲାଗୁଥାଇପାରେ । କିନ୍ତୁ ଏହା ହେଉଛି  ଜଣେ ମଳିମୁଣ୍ଡିଆ ତଥା ଅପାଠୁଆ  ସାଧାରଣ ଲୋକର ଦୃଢ଼ୋକ୍ତି । ସ୍ୱଚ୍ଛତା  ଲାଗି ନିଜକୁ ସମ୍ପୂର୍ଣ୍ଣ ଭାବେ ସମର୍ପିତ କରିଥିବା ମଣିଷଟିଏର ଏହା ହେଉଛି  ଅନ୍ତରର କଥା । ଏପରି ନିଃସ୍ୱାର୍ଥପର  ସେବା ମନୋବୃତ୍ତି ସମ୍ପନ୍ନ ବ୍ୟକ୍ତି ଜଣକ  ହେଉଛନ୍ତି ବାଲିଅନ୍ତା ବ୍ଲକ ଅନ୍ତର୍ଗତ  ଝିଣ୍ଟିପଞ୍ଚାୟତ ଅଧୀନ ଝିଣ୍ଟି ନାୟକ ସାହିର ବୃଦ୍ଧ ବେଣୁଧର ନାୟକ । ବୟସ ୬୦ ଛୁଇଁଲାଣି । ହେଲେ ସ୍ୱଚ୍ଛତା  ଅଭିଯାନରେ ତାଙ୍କ ଅଂଶୀଦାରୀ କେବେ ବି  ଥକି ଯାଇନି । ଦଳିତ ସମ୍ପ୍ରଦାୟର ହୋଇ  ବି ସେ ସମାଜରେ ଯେଉଁ ପରିବର୍ତ୍ତନର  ଆଶାଟିକକ ନିଜ ମନ ଭିତରେ ସଞ୍ଚାର  କରିଛନ୍ତି ତାହା ଅନେକଙ୍କ ଲାଗି  ଉଦାହରଣ ପାଲଟିବ ନିଶ୍ଚୟ । 

ବେଣୁଙ୍କ ଏହି ପ୍ରୟାସ ମାନନୀୟ  ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ସ୍ୱଚ୍ଛ  ଭାରତ ପରିକଳ୍ପନାର ବହୁ ପୂର୍ବରୁ  ଆରମ୍ଭ ହେଲାଣି । କେହି କେହି ତ  ତାଙ୍କର ଏପରି କାର୍ଯ୍ୟକୁ ଅଜବ ଅଭ୍ୟାସ  ବା ପାଗଳାମି କହି ପ୍ରଥମେ ପ୍ରଥମେ  ଥଟ୍ଟା ପରିହାସ କରୁଥିଲେ । ମାତ୍ର  ତାଙ୍କ ଉଦ୍ୟମରେ ଯେଉଁ ପରିବର୍ତ୍ତନ  ଆସିଲା ଏବେ ତାହାକୁ ଦେଖି ପରିହାସ  କରୁଥିବା ଲୋକେ ପ୍ରଶଂସା ନକରି  ରହିପାରୁନାହାନ୍ତି ।  

ବେଣୁ କୁହନ୍ତି ସେ ୪୦ ବର୍ଷ  ବୟସର ହେବା ଦିନଠୁ ଗାଁ ସଫେଇ  କରୁଛନ୍ତି । ସେ ଏହି କାମ ପାଇଁ  କାହାରିଠାରୁ କେବେ ଅର୍ଥ କିମ୍ବା ଅନ୍ୟ ପାରିଶ୍ରମିକ ଆଶା ରଖନ୍ତି ନାହିଁ ।  ସର୍ବସାଧାରଣଙ୍କ ଉଦ୍ଦେଶ୍ୟରେ ବ୍ୟବହାର  ହେଉଥିବା ସ୍ଥାନ ଗୁଡିକର ସଫେଇ ସେ  ନିୟମିତ କରି ଆସୁଛନ୍ତି । ବିଶେଷ କରି  ମନ୍ଦିର ବେଢା, ବିଦ୍ୟାଳୟର ସମ୍ମୁଖ,  କିଛି ମୁଖ୍ୟ ସଡ଼କକୁ ନିୟମିତ ସଫେଇ  କରିବା ତାଙ୍କର ନିତିଦିନିଆ କାମରେ  ପରିଣତ ହୋଇଗଲାଣି । ୨୦ ବର୍ଷ  ଧରି ନିରବଚ୍ଛିନ୍ନ ଭାବେ ଏହି ସେବାରେ  ନିୟୋଜିତ ଅଛନ୍ତି ।  

ସ୍ଥାନୀୟ ଲୋକଙ୍କ କହିବା ଅନୁଯାୟୀ  ସିନ୍ଦୂରା ଫାଟିବା ବେଳକୁ ବେଣୁ ହାତରେ  ଝାଡ଼ୁ, ବାଲ୍‌ତି ଧରି ପ୍ରଥମେ ହାଜର  ହୋଇଯାଆନ୍ତି ପାଣିକଟା ଗ୍ରାମର  ନୀଳକଣ୍ଠଶ୍ୱର ମହାଦେବଙ୍କ ମନ୍ଦିର  ବେଢାରେ । ଦିଅଁଙ୍କଠାରୁ ତାଙ୍କର  ସଫେଇ ଅଭିଯାନର କାମ ଆରମ୍ଭ  ହୁଏ । ଏହା ପରେ ମେଳଣ ପଡ଼ିଆ  ଓ ବିଦ୍ୟାଳୟମାନଙ୍କୁ ସଂଯାଗ କରୁଥିବା  ପ୍ରମୁଖ ରାସ୍ତା ସମୂହ ଓ ପାଶ୍ୱବର୍ତ୍ତୀ ଅଞ୍ଚଳ  ସବୁ ଜାଗା ଝାଡୁ ମାରି ସଫା କରିବାରେ  ଲାଗି ପଡ଼ନ୍ତି ।  

ପ୍ରାୟ ଦିନ ୧୨ ଟା ଗଡ଼ିଲେ ମଧ୍ୟାହ୍ନ  ଭୋଜନ ନିମନ୍ତେ ଘରକୁ ଫେରନ୍ତି ।  ଅପରାହ୍ଣରେ ଗାଁର ରାସ୍ତା ଝାଡୁ ମାରି  ସଫା କାରନ୍ତି । ଏହା ପରେ ନିଜର  କୌଳିକ ବୃତ୍ତିରେ ଲାଗି ପଡ଼ନ୍ତି । ସେ  ହେଉଛନ୍ତି ବୁଣାକାର ପରିବାରର ପୁଅ ।  ତେଣୁ ପରିବାର ପ୍ରତିପୋଷଣ ଲାଗି  ବେତ ଓ ବାଉଁଶ ପାତ୍ର ବୁଣାବୁଣି କିମ୍ବା  ପର୍ବ ପର୍ବାଣୀରେ ବାଜା ବଜାଇବା ଲାଗି  ବାହାରି ଯାଆନ୍ତି । ସ୍ଥାନୀୟ ଅଞ୍ଚଳରେ  ବେଣୁଙ୍କ ଏପରି ନିଃସ୍ୱାର୍ଥପର ସେବା  ଲୋକଙ୍କ ଲାଗି ପ୍ରେରଣା ସାଜିଛି ।