ନୂଆଦିଲ୍ଲୀ,୨୫/୦୫: ହେନ୍ରିଚ୍ କ୍ଳାସେନଙ୍କ ଧୂଆଁଧାର ଶତକ ସାଂଗକୁ ଟ୍ରାଭିସ୍ ହେଡ୍ଙ୍କ ଦର୍ଶନୀୟ ଅର୍ଦ୍ଧଶତକ। ଛକା ଚୌକା ବର୍ଷାରେ କମ୍ପିଲା ଷ୍ଟାଡିୟମ। ହାଇଦ୍ରାବାଦ ଦଳର ଘାତକ ପ୍ରଦର୍ଶନ ଆଗରେ ଧ୍ବସ୍ତବିଧ୍ବସ୍ତ କୋଲକାତା ବୋଲର। ଆଇପିଏଲ୍ ୨୦୨୫ର ୬୮ତମ ମ୍ୟାଚ୍ ସନ୍ରାଇଜର୍ସ ହାଇଦ୍ରାବାଦ ଏବଂ କୋଲକାତା ନାଇଟ୍ ରାଇଡର୍ସ ମଧ୍ୟରେ ନୂଆଦିଲ୍ଲୀର ଅରୁଣ ଜେଟଲି ଷ୍ଟାଡିୟମରେ ଖେଳାଯାଇଥିଲା। ଟସ୍ ଜିତି ପ୍ରଥମେ ବ୍ୟାଟିଂ ନିଷ୍ପତ୍ତି ନେଇଥିଲା ହାଇଦ୍ରାବାଦ। ନିର୍ଦ୍ଧାରିତ ୨୦ ଓଭରରେ ଦଳ ୨୭୮ ରନ୍ର ବିଶାଳ ସ୍କୋର୍ କରିଥିଲା।
ଦଳ ପକ୍ଷରୁ ହେନ୍ରିଚ୍ କ୍ଳାସେନ୍ ୩୯ ବଲ୍ରେ ୭ ଚୌକା ୯ ଛକା ସହାୟତାରେ ୧୦୫ରନ୍ର ଆକର୍ଷଣୀୟ ଶତକୀୟ ପାଳି ଖେଳି ଅପରାଜିତ ରହିଥିବା ବେଳେ ଟ୍ରାଭିସ୍ ହେଡ୍ ୪୦ ବଲ୍ରେ ୬ ଟି ଚୌକା ଓ ୬ଟି ଛକା ସହାୟତାରେ ୭୬ ରନ୍ କରିଥିଲେ। ଅନ୍ୟମାନଙ୍କ ମଧ୍ୟରେ ଅଭିଶେକ ଶର୍ମା ୧୬ ବଲ୍ରେ ୪ ଚୌକା ୨ଟି ଛକା ସହାୟତାରେ ୩୨ ରନ୍ କରିଥିବା ବେଳେ ଇଶାନ କିଶନ ୨୯ ଏବଂ ଅନିକେତ ଶର୍ମା ୧୨ ରନ୍ କରି ଅପରାଜିତ ରହିଥିଲେ। କେକେଆର୍ ବୋଲରଙ୍କ ମଧ୍ୟରେ ସୁନିଲ ନାରିନ ୨ଟି ଓ୍ବିକେଟ ନେଇଥିବା ବେଳେ ବୈଭବ ଆରୋରାଙ୍କୁ ଗୋଟିଏ ସଫଳତା ମିଳିଥିଲା। ବର୍ତ୍ତମାନ କୋଲକାତା, ହାଇଦ୍ରାବାଦ ଦେଇଥିବା ୨୭୯ ରନ୍ର ବିଜୟଲକ୍ଷ୍ୟକୁ ପୂରଣ କରିବାକୁ ମଇଦାନକୁ ଓହ୍ଲାଇବ।
