ଅହମ୍ମଦାବାଦ: ଚେନ୍ନାଇ ସୁପର କିଙ୍ଗ୍ସ IPL 2025 ରେ ବିଜୟ ସହିତ ନିଜର ଯାତ୍ରା ଆରମ୍ଭ କରିଥିଲା ଏବଂ ବିଜୟ ସହିତ ଶେଷ କରିଛି । ଅହମ୍ମଦାବାଦରେ ଖେଳାଯାଇଥିବା ମ୍ୟାଚ୍ରେ ଏମ୍ଏସ୍ ଧୋନିଙ୍କ ଅଧିନାୟକତ୍ୱରେ ଚେନ୍ନାଇ ପ୍ଲେଅଫ୍ରେ ପହଞ୍ଚିସାରିଥିବା ଏବଂ ଫାଇନାଲ୍ ପାଇଁ ଦାବିଦାର ବିବେଚିତ ଗୁଜରାଟ ଟାଇଟାନ୍ସକୁ ୮୩ ରନ୍ରେ ପରାସ୍ତ କରିଛି । କିନ୍ତୁ ଏହି ବିଜୟ ସତ୍ତ୍ୱେ, CSK ଚଳିତ ଆଇପିଏଲୁ ବିଦାୟ ନେଇଛି । ଆଇପିଏଲ ଇତିହାସରେ ଏହା ପ୍ରଥମ ଥର ଯେ, ଚେନ୍ନାଇ ପଏଣ୍ଟ ଟେବୁଲର ଶେଷ ସ୍ଥାନରେ ରହି ସିଜିନରୁ ବିଦା ହୋଇଛି ।
ବ୍ୟାଟର ପରେ ବୋଲରଙ୍କ ଚମତ୍କାର ପ୍ରଦର୍ଶନ ଯୋଗୁଁ ସିଏସକେ ଗୁଜରାଟ ଟାଇଟନ୍ସକୁ ୮୩ ରନରେ ପରାସ୍ତ କରିଛି । ପ୍ରଥମେ ବ୍ୟାଟିଂ କରି CSK ୨୦ ଓଭରରେ ୫ ୱିକେଟ ହରାଇ ୨୩୦ ରନ କରିଥିଲା । ଜବାବରେ, ଗୁଜରାଟ ଦଳ ୧୮.୩ ଓଭରରେ ୧୪୭ ରନରେ ଅଲଆଉଟ୍ ହୋଇଛି । ଏହିପରି ଗୁଜରାଟ କ୍ରମାଗତ ଦୁଇଟି ମ୍ୟାଚରେ ପରାସ୍ତ ହୋଇଛି । ଆଇପିଏଲରେ ରନ ଦୃଷ୍ଟିରୁ ସିଏସକେ ବିପକ୍ଷରେ ଗୁଜରାଟର ସବୁଠାରୁ ବଡ଼ ପରାଜୟ । ଏହି ମ୍ୟାଚ୍ରେ ଗୁଜରାଟର ବ୍ୟାଟିଂ ବହୁତ ଖରାପ ଥିଲା ଏବଂ ଦଳର କୌଣସି ବ୍ୟାଟର ବଡ଼ ଇନିଂସ ଖେଳିପାରି ନଥିଲେ।
ଟାର୍ଗେଟର ପିଛା କରି ଗୁଜୁରାଟର ଓପନର ସାଇ ସୁଦର୍ଶନ ସର୍ବାଧିକ ୪୧ ରନ କରିଥିଲେ । ଅରଶଦ ଖାନ ୨୦, ଶାହରୁଖ ଖାନ ୧୯, ରାହୁଲ ତେୱତିଆ ୧୪, ଅଧିନାୟକ ଶୁଭମନ ଗିଲ ୧୩ ଏବଂ ରସିଦ ଖାନ ୧୨ ରନ କରିଥିଲେ । ୱିକେଟକିପର-ବ୍ୟାଟର ଜସ୍ ବଟଲର୍ ଏବଂ ଜେରାଲ୍ଡ କୋଏତଜୀ ପାଞ୍ଚ ରନ୍ କରି ଆଉଟ ହୋଇଥିଲେ। ଗୁଜରାଟ ପକ୍ଷରୁ ଅଂଶୁଲ କାମ୍ବୋଜ ଏବଂ ନୁର ଅହମ୍ମଦ ତିନୋଟି ଲେଖାଏଁ ୱିକେଟ୍ ନେଇଥିବା ବେଳେ ରବିନ୍ଦ୍ର ଜାଡେଜା ଦୁଇଟି ୱିକେଟ୍ ନେଇଥିଲେ। ସେହିପରି ଖଲିଲ ଅହମ୍ମଦ ଏବଂ ମଥିଶା ପାଥିରାନା ଗୋଟିଏ ଲେଖାଏଁ ୱିକେଟ ପାଇଥିଲେ ।
